somali pirézidénti erdoghan teripidin qarshi élindi

türkiye awazi radiyosi xewiri: erdoghan bilen fermaju murasimdin kéyin ayrim we heyetler ara uchrishishlarda boldi.

uchrishishlarda, ikki terep munasiwetliri, rayonluq we xelqaraliq mesililer muzakire qilindi, medeniyet we tereqqiyat saheliride hemkarliq kélishimi imzalandi.

jumhur reis erdoghan somali pirézidénti bilen birlikte ötküzgen qoshma axbarat élan qilish yighinida, somali xelqining 15 – iyul herbiy isyan urunushigha qarshi enqere we türkiye xelqini qollighanliqini, buning barliq döletlerge ülge bolushini ümid qilidighanliqini éytti hemde tunji qétim 2011 – yili ziyarette bolghandin buyan somalining jiddiy özgirishlerni bashtin kechürüwatqanliqini, jümlidin xelqara jemiyet teripidin chetke qéqilghan bir dölettin muqim halette alghan ilgirileydighan bir döletke aylanghanliqini tekitlidi.

afriqida köpinchisi balilar we ayallardin teshkil tapidighan 14 milyon kishining acharchiliqning derdini tartiwatqanliqini eskertken erdoghan mundaq dep körsetti: «tereqqiy tapqan nurghun gherb döletlirining somali duch kéliwatqan acharchiliq aldida ikki yüzlimichilik qiliwatqanliqini körüwatimiz. bashqilar yoqsulluq we acharchiliqqa qarshi tirkishiwatqan mezlumlarni körmeske salsimu, emma biz ularning derdige derman boluwatimiz, buningdin kéyinmu shundaq qilimiz.  hemme shuni bilishi kérekki, balilar acharchiliqtin ölüp kétiwatqan bir dunyada huzur, tinchliq we muqimliqing bolushi esla mumkin emes.»

mart éyida  «mezlum insanlarning ümidi bolung» seperwerlik heriketlirining ishqa kirishtürülgenlikini eskertken erdoghan, türkiye qizilay jemiyitining sherqiy afriqida qurghaqchiliqning éghir zerbisige uchrighan rayonlargha insanperwerlik yardem buyumliri yetküzüp bergenlikini, jiddiy ehwallargha taqabil turush qomandanliq merkizi, türkiye hemkarliq we maslashturush orgini we ammiwi teshkilatlarning bu rayonlarda qoyuq insanperwerlik paaliyetlirini élip bériwatqanliqini tekitlidi.

deslepki qedemde yémek – ichmek, dora qatarliq éhtiyajliq buyumlardin teshkil tapqan 15 ming tonniliq insanperwerlik yardem buyumlirini ramizan éyida somalidiki muhtajlargha yetküzüp béridighanliqlirini qeyt qilghan erdoghan, xususiy karxanilarnimu rayongha meblegh sélishqa teshwiq qilidighanliqlirini tekitlep mundaq dédi: «xelqaraliq shériklirimizningmu somaligha yardem bérishini kütüwatimiz.»

somali pirézidénti fermaju türkiyening somaligha qoshqan töhpilirige köptin köp rehmet éytti hemde türkiyening somalida élip bériwatqan uzaq mezgillik insanperwerlik yardem paaliyetlirining döletning qaytidin qeddini ruslishida muhim rol oynighanliqini eskertken halda mundaq dédi: «somali bu alahide munasiwetning türtkiside dawamliq qollashqa érishidu.»

jumhur reis erdoghan qoshma axbarat élan qilish yighinidin kéyin somali pirézidéntining sheripige kechlik tamaq ziyapiti berdi.