давутоғлу телефон дипломатийәсини ишқа кириштүрмәктә

түркийә авази радийоси хәвири: давутоғлу ғәззә үчүн телефон дипломатийәсини ишқа кириштүрмәктә.
дипломатийә министири әһмәт давутоғлу. пәләстин билән исраилийә оттурисида ишқа кириштүрүлгән 72 саәтлик уруш тохтитиш келишимигә хилаплиқ қилинишиға наразилиқ билдүрди.
исраилийәниң, келишим һасил қилинип техи 3 саәт өтмәйла келишимниң ахирлашқанлиқини елан қилишидин кейин, давутоғлу қойуқ телефон дипломатийәсини ишқа кириштүрди.
давутоғлу, айрим - айрим һалда америка қошма иштатлири дипломатийә министири җон кери, бирләшкән дөләтләр тәшкилати баш катипи бан кимон, һамас рәһбири халид мәшәл, қатар дипломатийә министири халид бин муһәммәд әл әтиййә билән телефон арқилиқ көрүшти.
түнүгүн конйада җүмә намизидин кейин ахбарат елан қилиш йиғини өткүзгән давутоғлу, уруш тохтитиш келишиминиң бозулушиға мунасивәтлик пәләстин тәрәпниң сәвәблирини оттуриға қойди.
давутоғлу, «пәләстин тәрәп, исраилийәниң уруш тохтитиш келишимигә хилаплиқ қилиши нәтиҗисидә 70 кә йеқин пәләстинлик өлүп кәткәндин кейин, буниңға җаваб беришкә мәҗбур болуп қалғанлиқлирини әскәртмәктә» деди.
халид мәшәлниң уруш тохтитиш келишимигә садиқ икәнликлирини әскәрткәнликини ейтқан давутоғлу, бу даиридә пәләстин тәрәптин байанат елан қилинидиғанлиқини тәкитлиди.
давутоғлу, бирләшкән дөләтләр тәшкилатидин бир көзәткүчи һәйәтниң районда тәкшүрүшләрдә болуши лазимлиқини қәйт қилди.
уруш тохтитиш келишимигә қайси тәрәпниң хилаплиқ қилғанлиқиниң ениқлап чиқилишиниң зөрүрлүкини тәкитлигән давутоғлу, дипломатик тиришчанлиқлирини изчил давамлаштуридиғанлиқиниму сөзлиригә илавә қилди.