08.11.2018

бүгүнки түркийә мәтбуатлиридин таллап тәййарлиған хәвәрлиримизниң қисқичә мәзмунлири төвәндикичә:

08.11.2018

түркийә авази радийоси: «‹хәвәр түрк› гезити», министир ақар америка қошма иштатлириниң бөлгүнчи террорлуқ тәшкилати п к к ниң каттибашлириға алақидар қарари тоғрулуқ тохталди» сәрләвһилик хәвиридә, төвәндики мәлуматларға орун аҗратти:

дөләт мудапиә министири һулуси ақар америка қошма иштатлиридин бөлгүнчи террорлуқ тәшкилати п к к ға охшашла униңдин қилчә пәрқләнмәйдиған й п г тоғрилиқму кәскин позитсийә тутушини күтүватқанлиқлирини ейтти.

судан зийарити даирисидә сәвакин арилида байанат бәргән ақар, америка қошма иштатлириниң бөлгүнчи террорлуқ тәшкилати п к к ниң каттибашлири һәққидә учур йәткүзгүчиләргә мукапат берилидиғанлиқиға алақидар қараридин толиму хурсән икәнликлирини тәкитләп мундақ деди: «иттипақшимизниң бу қәдими наһайити иҗабий, әмма толиму кечиккән бир қәдәмдур, ақар америка қошма иштатлиридин бөлгүнчи террорлуқ тәшкилати п к к ға охшашла униңдин қилчә пәрқләнмәйдиған й п г тоғрилиқму кәскин позитсийә тутушини күтүватимиз. чүнки, й п г лиқ террорчилар иттипақдишимиз америка билән болған достлуқимиз вә һәмкарлиқимизға көләңгә чүшүрмәктә, америка тәрәптин бу хаталиқини дәрһал түзитишини күтүватимиз. дәрвәқә, америка қошма иштатлириниң бир тәрәптин бөлгүнчи террорлуқ тәшкилати п к к ниң каттибашлири тоғрулуқ учур йәткүзгүчиләргә мукапат бериш тоғрулуқ қарар чиқирип, йәнә бир тәрәптин, п к к ниң гумаштиси болған террорлуқ тәшкилати й п г гә йүк аптомобиллири, айропиланлар билән һәрбий әслиһәләр, қорал – йарағлар вә оқ – дорилар билән тәминлишини қобул қилиш әсла мумкин әмәс. бу җәһәттинму  америка қошма иштатлириниң хаталиқини дәрһал түзитишини күтүватимиз.»

«‹һөрийәт› гезити»,  «йавропа иттипақи түркийәниң иттипаққа әзалиқ мусаписини қоллайдиғанлиқини билдүрди» сәрләвһилик хәвиридә, төвәндики учурларни оқурмәнлириниң диққитигә сунди:

йавропа иттипақи комитетиниң байанатчиси маргаритис сичинас, күндилик ахбарат вастилирини хәвәрләндүрүш йиғинида, анадолу агентлиқи мухбириниң, «йавропа иттипақи комитетиниң кеңийиш ишлириға мәсул әзаси җоһаннес һан түркийә билән давамлишиватқан музакириләрни ахирлаштуруш лазимлиқини ейтти, бу, йавропа иттипақиниң рәсмий позитсийәсини әкс әттүрәмду?»  тәриқисидики соалиға җаваб бәргәндә, мундақ деди: «йавропа иттипақи комитетиниң рәсмий позитсийәси тоғрулуқ пәқәт  башлиқ йен клод йаңкерла байанат елан  қилалайду, җүмлидин йавропа иттипақиниң рәсмий нишани түркийә билән болған әзалиқ музакирилирини давамлаштуруштур.»

«‹вәтән› гезити», «түркийә хәлқара телефон, телеграф вә радийо арқилиқ алақә қилиш иттипақиға әза болиду» сәрләвһилик хәвиридә, төвәндики мәлуматларға орун аҗратти:

түркийә дубәйдә өткүзүлгән хәлқара телефон, телеграф вә радийо арқилиқ алақә қилиш иттипақи кеңиши сайламлирида 146 дөләтниң қоллап аваз бериши билән, әза болуш салаһийитигә еришти.

ташқи ишлар министирлиқи тәрипидин бу һәқтә елан қилинған йазма байанатта, йәр шари характерлик сәвийәдә хәвәрлишиш тори билән хәвәрлишиш мулазимитини маслаштуруш мәқситидә бирләшкән дөләтләр тәшкилатиға қарашлиқ алаһидә орган болған хәлқара телефон, телеграф вә радийо арқилиқ алақә қилиш иттипақи кеңиши сайламлириниң 2018 – йили 5 – нойабир күни дәйбәйдә өткүзүлгәнлики тәкитлинип мундақ дейилди: «сайламларда түркийә 146 дөләтниң қоллап аваз бериши билән тунҗи қетим   хәлқара телефон, телеграф вә радийо арқилиқ алақә қилиш иттипақи кеңишигә әза болуш салаһийитигә еришти.»

«‹сабаһ› гезити», «түркийә һава йоллири ширкәтлири йолучилириниң сани 10 ай ичидә 183 милйонға йәтти» сәрләвһилик хәвиридә, төвәндики мәлуматларни оқурмәнлириниң диққитигә сунди:

 түркийә дөләтлик һава йоллири мәйданлирини башқуруш баш идарисиниң өктәбир ейиға алақидар истатискилиқ мәлуматлириға қариғанда, бу мәзгилдә һава йоллири ширкәтлири 182 милйон 709 миң 862 йолучиға мулазимәт қилған, кәлгән – кәткән айропиланларниң сани  ички линийәләрдә 75 миң 583 кә, ташқи линийәләрдә 61 миң 332 гә йәткән.



مۇناسىۋەتلىك خەۋەرلەر