11.10.2018

бүгүнки түркийә мәтбуатлиридин таллап тәййарлиған хәвәрлиримизниң қисқичә мәзмунлири төвәндикичә:

11.10.2018

түркийә авази радийоси: «‹сабаһ› гезити», «җумһур рәис рәҗәп таййип әрдоған африқа әллиригә муһим чақириқта болди» сәрләвһилик хәвиридә, төвәндики мәлуматларни оқурмәнлириниң диққитигә сунди:

җумһур рәис рәҗәп таййип әрдоған истанбулда чақирилған «2 – нөвәтлик түркийә – африқа сода – иқтисад мунбири» йиғининиң ечилишида сөзлигән нутиқида, мундақ деди: «биз африқа қитәсидики дипломатик мәвҗудийитимизни күнсери мустәһкәмлидуқ, африқа әллириму түркийәдики дипломатик вакаләтханилириниң санини 10 дин 33 кә йәткүзди. бирләшкән дөләтләр тәшкилати, ислам һәмкарлиқ тәшкилати қатарлиқ хәлқаралиқ сәһниләрдә, түркийәниң йәр шари характерлик тинчлиқ орнитиш вә адаләт бәрпа қилиш нишанини бойлап елип бериватқан һәққаний күришини африқилиқ достлиримиз қизғин қоллиди вә қоллаватиду. әмди барлиқ африқилиқ достлиримизға, қериндашлиримизға шундақ       чақириқта болимән: келиңлар, сода ишлиримизни йәрлик пуллар билән, миллий пуллар билән ишқа ашурайли!»

«‹һөрийәт› гезити», «истанбулдики йеңи айродурумниң беләтлири сетилишқа башлайду» сәрләвһилик хәвиридә, төвәндики учурларни оқурмәнлириниң диққитигә сунди:

түркийә һава йоллири ширкитиниң истанбулдики йеңи айродурум үчүн беләт сетиши бирқанчә күн ичидә башлиниду. наһайити чоң мәркәзниң рәсмий ишқа кириштүрүлүшидин кейин, түркийә һава йоллири ширкити  дөләт ичи-сиртидики бәзи учушлирини бу йәрдин башлайду. учуш сәпәрлири үчүн беләт сетилидиған линийәләр арисида, измир, адана, әнқәрә, анталйа, баку қатарлиқ шәһәрләр билән шималий қибрис түрк җумһурийитиму бар. йеңи айродурумниң йолучилар үлүшиниң % 70 ти түркийә һава йоллири ширкитигә аит болиду. йеңи айродурумға толуқ йөткилиш хизмити болса 30 – 31 – декабир күнлири ишқа ашурулиду.

«‹вәтән› гезити», «<атақ> намлиқ тик учар айропиланлар техникилиқ җәһәттин техиму илғарлаштурулиду» сәрләвһилик хәвиридә, төвәндики мәлуматларға орун аҗратти:

дөләт хәвпсизлик күчлириниң қол илкидики «атақ» намлиқ тик учар айропиланларни техникилиқ җәһәттин техиму илғарлаштуруш хизмити давамлашмақта. бу даиридә «атақ» намлиқ тик учар айропиланларниң учур - алақә вә електронлуқ уруш иқтидарини йәниму өстүрүш нишаниға асасән, йеңи йумшақ деталларни сәпләш паалийити башланди.

 «атақ» намлиқ тик учар айропиланлар үчүн йәнә, йәрлик моторларниң ишләпчиқирилип, 20  миллиметирлиқ системиниң орунлаштуруши нишан қилинмақта.

«‹хәвәр түрк› гезити», «муғлаға кәлгән сайаһәтчиләрниң сани % 32 ашти» сәрләвһилик хәвиридә, төвәндики байанларға орун аҗратти:

йеқинқи 9 ай ичидә муғлаға кәлгән чәт әллик сайаһәтчиләрниң сани бултурниң охшаш мәзгилигә селиштурғанда % 32 ашти.

муғла мәдәнийәт вә сайаһәт ишлири идарисиниң муавин башлиқи филиз қараҗаағачниң билдүрүшичә, муғлаға кәлгән чәт әллик сайаһәтчиләр арисида әнглийәлк сайаһәтчиләр көп санлиқни тәшкил қилидиған болуп, муғлаға кәлгән чәт әллик сайаһәтчиләрдин  900 миң 75 и әнглийәлик, 380 миң 487 и русийәлик, 177 миң 94 и германийәлик, 168 миң 165 и украиналиқ, 132 миң 895 и полшалиқ икән.

«‹стар› гезити», «йәрлик вә чәт әллик  йағач қончақ ойуни қойғучилар пайтәхт әнқәрәдә бир йәргә җәм болиду» сәрләвһилик хәвиридә, төвәндики мәлуматларни оқурмәнлириниң диққитигә сунди:

бу йил 4 – қетимлиқи ишқа ашурулидиған әнқәрә йағач қончақ ойуни қойғучилар фестивалида, 9 дөләттин 36 йағач қончақ ойуни  тамашибинларниң диққитигә сунулиду.

12 – 21 – өктәбир күнлири ишқа ашурулидиған вә әнқәрә тил, тарих вә җуғрапийә факолтетиниң «фараби зали» да «сократниң ахирқи кечиси» намлиқ йағач қончақ ойуни билән башлинидиған фестивал даирисидә, сөһбәтләр вә бәс – муназириләр өткүзүлиду. илмий муһакимә йиғинлиридин сирт йәнә, айшә уйсалниң фото сүрәтлиридин тәшкил тапқан «қара көзлүк персонажлар» намлиқ көргәзмиму сәнәтсөйәрләр билән йүз көришиду.



مۇناسىۋەتلىك خەۋەرلەر