20.09.2018

türkiye awazi radiyosi: «‹höriyet› géziti», «jumhur reis erdoghan türkiye – amérika qoshma ishtatliri otturisidiki istiratégiyelik hemrahliq munasiwetlirining sélinma arqiliq qudret tapidighanliqini éytti» serlewhilik xewiride, töwendiki uchurlarni oqurmenlirining diqqitige sundi:

jumhur reis rejep tayyip erdoghan amérikiliq dangliq shirketlerning türkiyediki wekilliri bilen jumhur reislik sariyida bir yerge jem boldi. erdoghan bu yerde qilghan sözide, erkin bazar igiliki pirinsipliridin esla waz kéchilmeydighanliqini tekitlep mundaq dédi: «amérika qoshma ishtatliri bilen türkiye otturisidiki istiratégiyelik hemrahliq munasiwetlirimiz sélinma we soda arqiliq téximu qudret tapidu. diplomatik munasiwetlirimizmu iqtisadiy sahege alaqidar qedemlirimiz we meblegh sélish paaliyetliri arqiliq téximu küchiyidu.»

siyasiy mesililerni iqtisadiy mesililerge sélishturushni toghra dep qarimaydighanliqini eskertken jumhur reis erdoghan, «xudayim buyrisa, saqliniwatqan mesililerni gheyret – shijaet we diplomatiye arqiliq hel qilimiz» dédi.

«‹weten› géziti», «dölet mudapie ministiri hulusi aqar 366 térrorchining bir terep qilinghanliqini éytti» serlewhilik xewiride, töwendiki melumatlargha orun ajratti:

dölet mudapie ministiri hulusi aqar térrorizmgha qarshi  küreshning méwe bérishke bashlighanliqini éytti. aqar jumhur reislik sariyi milliy medeniyet we yighin zalida jumhur reis rejep tayyip erdoghanning ishtirak qilishida ötküzülgen «ghazilar küni» murasimida qilghan sözide, térrorizmgha qarshi  küresh dairiside yéqinqi 45 kün ichide  dölet ichi-sirtida quruqluq hem hawadin élip bérilghan keng kölemlik herbiy heriketlerde kattibashlirinimu öz ichige alghan 366 térrorchining bir terep qilinghanliqini tekitlidi.

«‹star› géziti», «téxnologiye ishliri ministiri warank türkiye – yaponiye otturisidiki erkin soda kélishimi muzakirilirining dawamlishiwatqanliqini éytti» serlewhilik xewiride, töwendiki melumatlarni oqurmenlirining diqqitige sundi:

sanaet we téxnologiye ishliri ministiri mustafa warank tashqi soda munasiwetler komitéti teripidin chaqirilghan «türkiye – yaponiye soda kéngishi qoshma yighini» da qilghan sözide, türkiye – yaponiye munasiwetlirining nahayiti uzungha sozulidighanliqini éytti.

türkiye bilen yaponiye otturisidiki «özara meblegh sélish paaliyetlirini teshwiq qilish we rawajlandurush kélishimi» ning 1993 – yili imzalanghanliqini eskertken warank, mundaq dep körsetti: «emdilikte bolsa bu kélishimning ornigha almishidighan we meblegh salghuchilargha yéngi heq – hoquqlar bérilidighan <erkin soda kélishimi> muzakiriliri dawamlashmaqta. ministirliqimiz  meblegh sélish ishlirigha mesul bolup, nishanimiz, bu muzakirilerni eng kéchikkendimu 2019 – yilning deslepki yérimida tamamlashtur.»

«‹sabah› géziti», «milliy qattiq - suyuq jisimliq parawoz gérmaniyede körgezme qilindi» serlewhilik xewiride, töwendiki bayanlargha orun ajratti:

eskishehirde paaliyet élip bériwatqan türkiye parawoz we motor sanaiti  pay cheklik shirkiti bilen türkiye jumhuriyiti tömür yol tirapsiport we herbiy éléktir sanaiti shirkiti teripidin ishlepchiqirilghan yéngi qattiq - suyuq jisimliq parawoz gérmaniyening paytexti bérlinde ötküzülgen « InnoTrans » yermenkiside körgezme qilindi.

«dunya boyiche eng chong tömür yolliri yermenkisi» dep atalghan  « InnoTrans » yermenkiside körgezme qilinghan qattiq - suyuq jisimliq parawoz héchqandaq ispat telep qilinmastinla ishlepchiqirilghan tunji milliy parawoz bolushi tüpeyli nahayiti zor ehmiyetke ige. türkiye bu layihe arqiliq dunya boyiche bundaq ilghar téxnologiyege  ige 4 – dölet bolup qaldi.

«‹yéngi shepeq› géziti», «téknofést féstiwalida milliy urush ayropilani ziyaretchilening diqqitige sunulidu» serlewhilik xewiride, töwendiki melumatlarni oqurmenlirining diqqitige sundi:

türkiye awiyatsiye we alem qatnishish sanaeiti, istanbul awiyatsiye, alem qatnishi we téxnologiye (téknofést) féstiwali dairiside milliy urush ayropilani iskilati süniy muhit astida ziyaretchilerge échiwétilidu.

türkiye téxnologiye etriti (T3) fondi jemiyiti bilen istanbul sheherlik hökümiti teripidin 20 – 23 – séntebir künliri istanbuldiki yéngi ayrodurumda ötküzülidighan téknofést féstiwali, bir - biridin qélishmaydighan renggareng paaliyetlerge sahibxaniliq qilidu.