13.09.2018

бүгүнки түркийә гезитлиридә асасий салмақни игилигән хәвәрлиримизниң қисқичә мәзмунлири төвәндикичә:

13.09.2018

түркийә авази радийоси: «һөррийәт гезити», җумһур рәис рәҗәп таййип әрдоғанниң түркийә лирасиниң қиммитини қоғдаш пәрманиниң рәсмий гезиттә елан қилинғанлиқини хәвәр қилди.

гезитниң хәвиригә асасланғанда, өй-земин вә көчмә мүлүкләрни елип-сетиш, иҗаригә бериш ишлирида түркийә лираси қоллинилидикән, чәт әл пуллирини асас қилип түзүлгән келшимләр 30 күн ичидә лираға алмаштурулидикән.

«вәтән гезити», қатар ташқи ишлар министири шәйх муһәммәд бин абдурраһман бин җасим әлсаниниң сүрийәниң идлиб районида йүз бериватқан вәқәләрниң кишини чоңқур қайғуға салидиғанлиқини ейтқанлиқини хәвәр қилди.

хәвәрдә, шәйх муһәммәд бин абдурраһман бин җасим әлсаниниң тоқунушмаслиқ райони болған идлибни террорлуқ унсурлиридин тазилашни вә пуқраларниң һайатини қоғдашни, түркийәгә охшаш райондики иттипақдашлар билән һәмкарлишиш арқилиқ әмәлгә ашурғили болидиғанлиқини әскәрткәнлики қәйт қилинди.

хәвәрдә, шәйх муһәммәд бин абдурраһман бин җасим әлсаниниң бәшшар әсәд һакимийитиниң өз хәлқигә қирғинчилиқ йүргүзмәкчи болғанлиқидин пәйда болған қайғусини ипадиләп, дунйаниң бу вәзийәтниң алдини елиш үчүн йетәрлик тиришчанлиқ көрсәтмигәнликини тәкитлигәнлики билдүрүлди.

«йеңи шәпәқ гезити», түркийәдә тунҗи қетимлиқ ракета мусабиқиси өткүзүлидиғанлиқини хәвәр қилди.

хәвәрдә көрситилишичә, ракета мусабиқиси һазирғичә америкада өткүзүлүватқан болуп, түркийәдикиси тунҗи қетимлиқи болидикән. мусабиқигә түркийәдин 157 команда илтимас сунған, түнүгүн бәш команда өзлири лайиһәлигән ракетани қойуп бәргән. ракеталар 2800 метир йирақлиққа мувәппәқийәт билән йетип барған.

«стар гезити», 20-23-сентәбир күнлири истанбул авийатсийә, аләм техникилири фестивалиниң өткүзүлидиғанлиқини хәвәр қилди.

хәвәрдә, фестивалға һәр қайси дөләтләрдики дунйаға даңлиқ кишиләрниң қатнишидиғанлиқи, 12 категорийә бойичә мукапат тарқитилидиғанлиқи билдүрүлди.



مۇناسىۋەتلىك خەۋەرلەر