06.09.2018

bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:

06.09.2018

türkiye awazi radiyosi: «‹star› géziti», «türkiye idlib hujumi munasiwiti bilen rusiye we beshshar esed hakimiyitige naraziliq bildürdi» serlewhilik xewiride, töwendiki melumatlarni oqurmenlirining diqqitige sundi:

türkiye tashqi ishlar ministiri mewlüt chawushoghlu süriyening idlib shehiride puqrawi ölümlerni keltürüp chiqarghan rusiye we beshshar esed hakimiyitining hujumlirigha naraziliq bildürdi. chawushoghlu bu heqte élan qilghan bayanatida, mundaq dédi: «héchkim héchkimni aldimisun. bu hujumlarning nishani idlibni qolgha keltürüshtur.»

chawushoghlu idlibtiki radikal guruppilarning bahane qilinip, puqralarning bombardiman qilinishigha mundaq naraziliq bildürdi: «eger siler bu guruppilargha qarshi bolsanglar, undaqta, helebtin sherqiy ghutedin, humustin, hetta jenubtin bularni qoral - yaraghliri bilen birlikte némishqa idlibqa kirgüzdünglar?»

«‹weten› géziti», «türkiye 2019 – yili iqtisadiy jehettin uchqandek tereqqiy qilish qedimini yenimu tézilitidu» serlewhilik xewiride, töwendiki uchurlarni oqurmenlirining diqqitige sundi:

xezine we maliye ishliri ministiri berat albayraq meblegh salghuchilarning ishenchisini ashurush arqiliq aldimizdiki künlerning téximu yaxshi bolidighanliqi toghruluq xush xewer yetküzüp mundaq dédi: «yéqinda iqtisadiy jehettin uchqandek tereqqiy qilish qedimini téximu tézlitimiz. bu arqiliq meblegh salghuchilarning ishenchisini ashurimiz. buning türtkiside, xelqaraliq aktiyorlarning dölitimizge qarita meblegh sélish paaliyetlirining hessilep éshiishigha shahit bolimiz. derweqe, türkiye köp yönilishlik iqtisadiy pilan – layiheliri arqiliq meblegh salghuchilarning dölitimizge bolghan ishenchisini hessilep ashurmaqta.»

«‹xewer türk› géziti», «eqil parasetlik kishiler türkiyedin mal - mülük sétiwalmaqta» serlewhilik xewiride, töwendiki melumatlargha orun ajratti:

dunyagha dangliq amérikiliq karxanichi we pul – muamile mutexessissi jeymis rogérs meblegh salghuchilargha türkiyedin mal - mülük sétiwélishini tewsiye qilip mundaq dédi: «eqil parasetlik kishiler nöwette türkiyedin mal - mülük sétiwalmaqta. eger men kélechikim üchün meblegh salidighan bolsam, elwette türkiyedin mal - mülük sétiwalghan bolattim.»

amérika qoshma ishtatlirining türkiyege qarshi émbargo yürgüzüsh toghruluq qarar chiqirishining telwilik ikenlikini eskertken rogérs, bu ehwalning uzaq mezgilde amérika qoshma ishtatlirigha ziyan yetküzidighanliqini qeyt qildi.

«‹yéngi shepeq› géziti», «türk shirketlirining < F-35> tipliq urush ayropilanlirini  ishlepchiqirishqa qoshqan töhpiliri» serlewhilik xewiride, töwendiki bayanlargha orun ajratti:

dölet mudapie ministirliqi, amérika qoshma ishtatliri türkiyeni layihe sirtida qaldurushqa urunuwatqan « F-35» tipliq urush ayropilanlirini ishlepchiqirish layiheside türk shirketliri ishlepchiqarghan mehsulatlarning barliqini jakarlidi.

buninggha asaslanghanda,  « F-35» tipliq urush ayropilanlirining qurulmisidin tartip motorighiche 19 nuqtisida 7 türk mudapie sanaiti shirkitining hessisi bar bolup, bu ayropilanning muhim parchilirini ishlepchiqiridighan türk shirketliri,  « F-35» tipliq urush ayropilanlirini ishlepchiqirish we zdakaz qilghuchilargha öz waqtida tapshurup bérishte muhim rol oynimaqta iken.

«‹sabah› géziti», «türkiye toy sayahiti üchün heriketke ötti» serlewhilik xewiride, töwendiki melumatlarni oqurmenlirining diqqitige sundi:

yéqindin buyan türkiyege toy sayahiti üchün kéliwatqan sayahetchiler sani barghanséri köpeymekte. yéqinqi mezgillerde ottura sherq elliridin toy murasimlirini türkiyede ötküzüsh üchün telep sunuwatqanlarning sani künséri köpeymekte.  bolupmu bu yilning deslepki 7 éyi ichide toy murasimlirini türkiyede ötküzgen hindistan we liwan qatarliq döletlerdin kelgen sayahetchilerning sani közge körünerlik derijide  ashti. hindistandin % 95 lik éshish bilen 93 ming, liwandin bolsa % 43 lik éshish bilen 155 ming sayahetchi türkiyege keldi.



مۇناسىۋەتلىك خەۋەرلەر