06.09.2018

бүгүнки түркийә мәтбуатлиридин таллап тәййарлиған хәвәрлиримизниң қисқичә мәзмунлири төвәндикичә:

06.09.2018

түркийә авази радийоси: «‹стар› гезити», «түркийә идлиб һуҗуми мунасивити билән русийә вә бәшшар әсәд һакимийитигә наразилиқ билдүрди» сәрләвһилик хәвиридә, төвәндики мәлуматларни оқурмәнлириниң диққитигә сунди:

түркийә ташқи ишлар министири мәвлүт чавушоғлу сүрийәниң идлиб шәһиридә пуқрави өлүмләрни кәлтүрүп чиқарған русийә вә бәшшар әсәд һакимийитиниң һуҗумлириға наразилиқ билдүрди. чавушоғлу бу һәқтә елан қилған байанатида, мундақ деди: «һечким һечкимни алдимисун. бу һуҗумларниң нишани идлибни қолға кәлтүрүштур.»

чавушоғлу идлибтики радикал гуруппиларниң баһанә қилинип, пуқраларниң бомбардиман қилинишиға мундақ наразилиқ билдүрди: «әгәр силәр бу гуруппиларға қарши болсаңлар, ундақта, һәләбтин шәрқий ғутәдин, һумустин, һәтта җәнубтин буларни қорал - йарағлири билән бирликтә немишқа идлибқа киргүздүңлар?»

«‹вәтән› гезити», «түркийә 2019 – йили иқтисадий җәһәттин учқандәк тәрәққий қилиш қәдимини йәниму тезилитиду» сәрләвһилик хәвиридә, төвәндики учурларни оқурмәнлириниң диққитигә сунди:

хәзинә вә малийә ишлири министири бәрат албайрақ мәбләғ салғучиларниң ишәнчисини ашуруш арқилиқ алдимиздики күнләрниң техиму йахши болидиғанлиқи тоғрулуқ хуш хәвәр йәткүзүп мундақ деди: «йеқинда иқтисадий җәһәттин учқандәк тәрәққий қилиш қәдимини техиму тезлитимиз. бу арқилиқ мәбләғ салғучиларниң ишәнчисини ашуримиз. буниң түрткисидә, хәлқаралиқ актийорларниң дөлитимизгә қарита мәбләғ селиш паалийәтлириниң һәссиләп ешиишиға шаһит болимиз. дәрвәқә, түркийә көп йөнилишлик иқтисадий пилан – лайиһәлири арқилиқ мәбләғ салғучиларниң дөлитимизгә болған ишәнчисини һәссиләп ашурмақта.»

«‹хәвәр түрк› гезити», «әқил парасәтлик кишиләр түркийәдин мал - мүлүк сетивалмақта» сәрләвһилик хәвиридә, төвәндики мәлуматларға орун аҗратти:

дунйаға даңлиқ америкилиқ карханичи вә пул – муамилә мутәхәссисси җәймис рогерс мәбләғ салғучиларға түркийәдин мал - мүлүк сетивелишини тәвсийә қилип мундақ деди: «әқил парасәтлик кишиләр нөвәттә түркийәдин мал - мүлүк сетивалмақта. әгәр мән келәчиким үчүн мәбләғ салидиған болсам, әлвәттә түркийәдин мал - мүлүк сетивалған болаттим.»

америка қошма иштатлириниң түркийәгә қарши ембарго йүргүзүш тоғрулуқ қарар чиқиришиниң тәлвилик икәнликини әскәрткән рогерс, бу әһвалниң узақ мәзгилдә америка қошма иштатлириға зийан йәткүзидиғанлиқини қәйт қилди.

«‹йеңи шәпәқ› гезити», «түрк ширкәтлириниң < F-35> типлиқ уруш айропиланлирини  ишләпчиқиришқа қошқан төһпилири» сәрләвһилик хәвиридә, төвәндики байанларға орун аҗратти:

дөләт мудапиә министирлиқи, америка қошма иштатлири түркийәни лайиһә сиртида қалдурушқа урунуватқан « F-35» типлиқ уруш айропиланлирини ишләпчиқириш лайиһәсидә түрк ширкәтлири ишләпчиқарған мәһсулатларниң барлиқини җакарлиди.

буниңға асасланғанда,  « F-35» типлиқ уруш айропиланлириниң қурулмисидин тартип моториғичә 19 нуқтисида 7 түрк мудапиә санаити ширкитиниң һәссиси бар болуп, бу айропиланниң муһим парчилирини ишләпчиқиридиған түрк ширкәтлири,  « F-35» типлиқ уруш айропиланлирини ишләпчиқириш вә здаказ қилғучиларға өз вақтида тапшуруп бериштә муһим рол ойнимақта икән.

«‹сабаһ› гезити», «түркийә той сайаһити үчүн һәрикәткә өтти» сәрләвһилик хәвиридә, төвәндики мәлуматларни оқурмәнлириниң диққитигә сунди:

йеқиндин буйан түркийәгә той сайаһити үчүн келиватқан сайаһәтчиләр сани барғансери көпәймәктә. йеқинқи мәзгилләрдә оттура шәрқ әллиридин той мурасимлирини түркийәдә өткүзүш үчүн тәләп сунуватқанларниң сани күнсери көпәймәктә.  болупму бу йилниң дәсләпки 7 ейи ичидә той мурасимлирини түркийәдә өткүзгән һиндистан вә ливан қатарлиқ дөләтләрдин кәлгән сайаһәтчиләрниң сани көзгә көрүнәрлик дәриҗидә  ашти. һиндистандин % 95 лик ешиш билән 93 миң, ливандин болса % 43 лик ешиш билән 155 миң сайаһәтчи түркийәгә кәлди.



مۇناسىۋەتلىك خەۋەرلەر