04.09.2018

бүгүнки түркийә гезитлиридин таллап тәййарлиған хәвәрлиримизниң қисқичә мәзмунлири төвәндикичә:

04.09.2018

йеңи шәпәқ гезити «техно- фестивал истанбул үчүн тәтүр санаш башлиди»сәрләвһилик хәвиридә муну учурларни оқурмәнлири билән ортақлашти: « техно- фестивал истанбул <миллий технологийә истиратегийәси>даирисидә 20-сентәбирдин 23-сентәбиргичә болған арилиқта дунйа бойичә әң чоң айродурум һесаблинидиған истанбул йеңи айродурумида өткүзүлиду. түркийәниң тунҗи авиатсийәчилик, аләм вә технологийә фестивали болған техно- фестивал истанбулда түркийә тарихида әң йуқири мукапатлиқ технологийә мусабиқисидин сирт авиатсийәчилик паалийәтлири, илмий лексийәләр, хәлқара игилик башқуруш йиғинлири вә паалийәтлири өткүзүлиду.»

һабәр түрк гезити «түрк йүк ширкити 85 районға мулазимәт қилиду» сәрләвһилик хәвиридә муну учурларға орун аҗратти: «һавачилиқ тиранспорт йүк саһәсидә дунйа бойичә тез сүрәттә тәрәққий қилған һава йүк ширкити болған түрк йүк ширкити, мулазимәт даирисигә риванданиң пайтәхти кигали вә оманниң пайтәхти мәсқатниму қошти. шундақ қилип түрк йүк ширкити мулазимәт қилидиған район сани 85гә йәтти.»

ситар гезити «түркийә билән русийә йеза-игилик саһәсидә келишим имзалайду»сәрләвһилик хәвиридә муну учурларни оқурмәнлириниң диққитигә тәқдим қилди: «түркийә билән русийә әтә <5-сентәбир> истанбул хәлқара йәрмәнкә залида өткүзүлидиған сода мунбиридә йеза-игилик саһәсидә келишим имзалайду. <йемәк-ичмәк истанбул>намлиқ йәрмәнкидин кейин, ташқи иқтисадий алақә комитети тәрипидин тәшкилләнгән түркийә-русийә сода кеңиши даирисидә йиғин чақирилиду, бу йиғинға тоқумучилиқ, полат-төмүр, ашлиқ, йеза-игилик мәһсулатлири, аилә сайманлири саһәсидики түрк вә рус карханчилар иштирак қилиду. йиғиндин кейин икки дөләт карханчилири йеза-игилик саһәсидә келишим имзалайду.»

сабаһ гезити «сайаһәтчиләр памуккаләгә сәлдәк ақмақта»сәрләвһилик хәвиридә муну учурларни оқурмәнлири билән ортақлашти: «деңизли вилайитиниң ақ <җәннәт>дәп атилидиған памуккалә районида милади 60-йилларда йәр тәврәш нәтиҗисидә шәкиллинип мисир ханиши килопатраниң йуйунғанлиқи ривайәт қилинған килопатра көлчикигә сайаһәтчиләр сәлдәк ақмақта. қәдимий көлдики тарихий йадикларлиқлар ичидә су үзгән сайаһәтчиләр иссиқ вә шипалиқ икәнлики илгири сүрүлгән судин зоқ алмақта. <килопатраниң гүзәллик көлчики> дәп тәриплинидиған қәдимиий көлчәккә йәрлик вә чәт әллик сайаһәтчиләр билән шипа изидигүчиләрму келиду. ривайәт қилинишичә, һәзирити мәрйәм әфәскә маңғанда биарам болған көзини памуккаләдики су билән йуғанда сақайған икән.»

һүррийәт гезити «даңлиқ кино артиси ван дан түркийәни махтиди»сәрләвһилик хәвиридә муну учурларға орун аҗратти: «бир мукапат тарқитип бериш паалийитигә баһалиғучи сүпитидә қатнишиш үчүн анталийәгә кәлгән даңлиқ кино артиси ван дан, түркийә тәсиратлирини ортақлашти. <түркләр наһайити сәммий вә хуш пиил икән>дегән ван дан түрк таамлири үстидә алаһидә тохтилип мундақ деди:< түрк таамлири һәқиқәтән ләззәтлик икән, бу қетим нурғун таамларни тетиш пурситигә ериштим, бу таамлар бир-биридин тәмлик икән. маңа әң тетиғини тас кавапи болди.> ван дан йәнә түркийәниң тоқумчилиқ саһәсигә мәбләғ селишни пиланливатқанлиқини билдүрди.»



مۇناسىۋەتلىك خەۋەرلەر