03.09.2018

bügünki türkiye gézitliridin tallap teyyarlighan xewerlirimizning qisqiche mezmunliri töwendikiche:

03.09.2018

türkiye awazi radiyosi: «<weten> géziti», «qatarning 5 (soda) guruhi türkiyege meblegh sélishqa bashlidi» serlewhilik xewiride töwendiki uchurlarni oqurmenliri bilen ortaqlashti: qatar döliti tashlighan 15 milyard dollarliq qedemdin kéyin, döletning xususiylar igilikidiki sahelirimu yönilishini türkiye terepke buridi. döletning 5 muhim soda guruhi deslepki qedemde 300 milyon dollar meblegh sélish üchün heriketke ötti. qatar guruhi, essa, nora rashid al dusori, al sumeiti we rashid elqubeysining mebleghlirini bashquruwatqan royal link shirkiti bash mudiri ehmed huseyin ehmed hesen, qatarda meblegh salghuchilargha köngül bölidighan bir ishxana échilghan teqdirde, xususiylar igilikidiki sahelerdin türkiyege sélinidighan mebleghning 50 milyard dollargha yétish éhtimali barliqini éytti.

«<yéngi shepeq> géziti», «borsa istanbul pay chéki baziridiki aptomobil shirketlirining paydisi %25 din ashti» serlewhilik xewiride, borsa istanbul pay chéki bazirida aptomobil sahesi boyiche paaliyet élip bériwatqan 8 shirketning omumiy sap paydisining mushu yilning deslepki yérimida bulturqining oxshash mezgilige sélishturghanda %25 éship, 1 milyard 748 milyon 700 ming türk lirasigha yetkenlikini oqurmenliri bilen ortaqlashti. xewerde, aptomobil shirketlirining omumiy aktip sermayisining ikkinchi charekte 42 milyard türk lirasigha yéqinlashqanliqi, menbelirining bolsa 10 milyard türk lirasidin éship ketkenliki qeyt qilindi.

«<star> géziti», «milliy tik uchar ayropilanning uchidighan waqti mueyyenleshti» serlewhilik xewiride, türkiyening tunji özige xas tik uchar ayropilani T-625 ning matorini sinaq qilish xizmetlirining bashlanghanliqini, chaqpeleklerning tunji qétim aylanghanliqini yazdi. xewerde, türkiyede layihelinip ishlepchiqirilghan tik uchar ayropilanning tunji uchush waqtining 6 – séntebir ikenliki qeyt qilindi. gézit, T-625 tik uchar ayropilanining herqandaq qiyin sharait we rayonlarda, alahide yükseklik, qattiq issiq démestin kéche – kündüz wezipe ötiyeleydighan halette yasap chiqilghanliqini, uning layihelinish we ishlepchiqirilishida yerlik menbelerning ishlitilgenlikini, ayropilangha köp xil wezipe ötesh iqtidarining seplengenlikini eskertti. xewerde, tik uchar ayropilanning yötkesh, izdesh – qutquzush, hawa jiddiy qutquzush ayropilani dégendek nahayiti köp sahede ishlitilishining pilanliniwatqanliqi eskertildi.

«‹sabah› géziti», «dunyaning eng yaxshi 7 yürüsh (méngish) yolining biri türkiyede» serlewhilik xewiride töwendiki uchurlarni oqurmenliri bilen ortaqlashti: mughlaning fethiye nahiyesidin antalyaghiche sozulidighan 540 kilométirliq dunyaning eng yaxshi 7 uzun musapilik méngish (chighir) yolining biri, dep qobul qilinghan likya yoli, méhmanlirigha tengdashsiz menziriliri bilen tarixiy chongqurluq béghishlaydu. ölük déngiz menzirisi bilen bashlinidighan tarixiy yol, tebiet möjiziliri arisida pat – pat insangha tonéllardin ötüwatqandek tuyghu béghishlaydu. fethiye bilen antalya arisidiki aqdéngizgha sozulghan teke yérim arili, tarixta likya, dep atilatti. yérim araldiki bezide taghlarning choqqisini, bezide ajayip güzel su üzüsh köllirini, bezide qedimiy sheherlerni bésip ötidighan isharetlengen chighir yollar likya yoli, dep atilidu.

«‹xaber türk› géziti», «antalya sayahetchilikide awghust rékorti» serlewhilik xewiride töwendiki uchurlarni oqurmenliri bilen ortaqlashti: antalya awghust éyida sayahetchilikte buningdin ilgiriki barliq rékortlarni buzup tashlidi. ötken ay (awghust) sheherge kelgen sayahetchi sani 2 milyon 150 ming 448 gha yetti. 1 – yanwar bilen 31 – awghust arisida sheherge kelgen sayahetchi sani 9 milyon 62 minggha yetti. antalyagha 2018 – yili jemiy 14 milyon sayahetchi kélishi kütülmekte.


خەتكۈچ: metbuat , radiyo , uyghurche , gézit , türkiye

مۇناسىۋەتلىك خەۋەرلەر