21.05.2018
bügünki türkiye gézitliridin tallap teyyarlighan xewerlirimizning qisqiche mezmunliri töwendikiche:
türkiye awazi radiyosi xewiri: «<weten> géziti», «erdoghan, suyiqest qilish teyyarliqi toghrisidiki dewalargha jawab berdi» serlewhilik xewiride töwendiki uchurlarni oqurmenliri bilen ortaqlashti: bosniye – gértségowinada bir künlük dölet ishliri ziyaritide bolghan jumhur reis erdoghan, paytext sarayéwoda pirézidéntliq kéngishi bashliqi bakir izzetbégowich bilen körüshti. erdoghan bilen izzetbégowich ayrim we heyetler uchrishishlardin kéyin qoshma muxbirlarni kütüwélish yighini ötküzdi. suyiqest qilinidighanliqi toghrisidiki xewerler heqqide tunji qétim éghiz achqan erdoghan, «bu xewer mangimu yetti. shuning üchün bu yerdimen» dédi.
«<star> géziti», «erdoghan chet elde yashaydighan türklerge bosniye – gértségowinada bir qatar xushxewerlerni berdi» serlewhilik xewiride töwendiki uchurlarni oqurmenliri bilen ortaqlashti: jumhur reis rejep tayyip erdoghan, sarayéwoda yawropaliq türk démokratlar ittipaqining 6 – nöwetlik omumiy qurultiyida söz qilip, «özünglar yashighan döletlerning puqraliqini choqum élinglar. <almaymen> démenglar, élinglar. béridighanla bolsa élinglar. qosh puqraliqqa ruxset qilidighan döletlerde mesile yoq. bu jehettiki tüzümliri perqliq döletlerde mawi kart bolsimu (élinglar), biz türkiyediki heq – hoquqinglardin qetiy ziyangha uchrimastin paydilinalaydighan charilerni yolgha qoyduq» dédi. u yene, «tashqi péréwot bilen eskerlik wezipisini ada qilishni 6 ming yawrodin ming yawrogha chüshürüsh bilenla qalmiduq, 38 yashtin halqip ketken, biraq tashqi péréwot bilen eskerlik wezipisini ada qilishqa iltimas qilmighan kishilerning mesililirinimu yéqinda hel qilimiz» dédi.
«<sabah> géziti», «yildirim: ümidsizlikke uchriduq (dédi)» serlewhilik xewiride töwendiki uchurlarni oqurmenliri bilen ortaqlashti: bash ministir binali yildirim, girétsiyening heptilik gézitliridin «to wima» ning soallirigha jawab berdi. u, fethullahchi térrorluq teshkilati / parallél dölet qurulmisi 2016 – yili 15 – iyuldiki meghlubiyet bilen axirlashqan xainlarche herbiy – siyasiy özgirish qozghashqa urunghan kéchisi girétsiyege qéchip ketken 8 fethullahchi toghrisida toxtilip, «girétsiye edliyesining qararliridin ümidsizlenduq. chünki bu kishiler bigunah insanlarning hayatliridin ayrilishigha, bigunah kishilerning yarilinishigha seweb bolghan herbiy – siyasiy özgirish qozghashqa urunush herikitige biwasite qatnashti. parlaméntni bombardiman qildi. saylam arqiliq kelgen jumhur reiske qest qildi. démokratik yollar bilen saylanghan hökümetni aghdurup tashlashqa muweppeq bolalmighanliqlirini tonup yetkendin kéyin, bu 8 kishi tik uchar ayropilangha olturup qanunsiz shekilde qachti. eslide girétsiye edliyesi, xelqara qanun – pirinsiplirigha zit halette bularni jazasiz qoyup bérip, qurbanlarningmu heqlirini depsende qildi» dédi.
«<yéngi shepeq> géziti», «sayahet paraxoti resmiyetliri addiylashturuldi» serlewhilik xewiride töwendiki uchurlarni oqurmenliri bilen ortaqlashti: qatnash, déngizchiliq we uchur – alaqe ishliri ministiri ehmet arslan, türkiyeni aqdéngizning eng muhim kéme (paraxot) sayahiti merkezlirining birige aylandurush meqsitide biyurokratik resmiyetlerning asasen nöl dégüdek nuqtigha chüshürülgenlikini eskertip, sayahet paraxotliri türkiyege kirgende bir – bir yérim kün dawamlishidighan salametlik tekshürüsh xizmetlirining mudditini 5 minutqa qisqartqanliqlirini éytti. u, türkiyening paraxot sayahetchilikide aq déngizning qaynaq merkezlirining biri bolushi üchün, muhim xizmetlerni qilghanliqlirini bildürdi we aqdéngizda 1 milyondin artuq sayahet paraxoti barliqini qeyt qildi.
«<xabertürk> géziti», «37 – nöwetlik türk küni yürüshi niyuyorkta ötküzüldi» serlewhilik xewiride töwendiki uchurlarni oqurmenliri bilen ortaqlashti: amérika qoshma ishtatlirining niyuyork shehiride enenige aylanghan türk küni yürüshi, bu yil türkiye armiyesige béghishlandi. türk – amérika jemiyetliri fédératsiyesi teripidin bu yil 37 – qétimliqi ötküzülgen paaliyetke, türk jamaetchilikining wekilliri we niyuyork atatürk mektipi oqughuchilirimu eneniwi kiyimlerni kiyip ishtirak qildi. yürüsh manhattandiki madison yoli bilen 53 – kochisining doqmushidin bashlinip, b d t gha yéqin yerde axirlashti.
