17.05.2018

бүгүнки түркийә мәтбуатлиридин таллап тәййарлиған хәвәрлиримизниң қисқичә мәзмунлири төвәндикичә:

17.05.2018

түркийә авази радийоси: «‹сабаһ› гезити», «җумһур рәис әрдоғанниң пәләстин дипломатийәси давамлашмақта» сәрләвһилик хәвиридә, төвәндики мәлуматларни оқурмәнлириниң диққитигә сунди:

җумһур рәис рәҗәп таййип әрдоған пәләстиндики йеқинқи өзгиришләр тоғрулуқ германийә баш министири ангела меркел, иран пирезиденти һәсән руһани вә русийә пирезиденти виладимир путин билән айрим – айрим һалда телефонда көрүшти.

әрдоған германийә баш министири ангела меркел билән елип барған телефон сөһбитидә, ғәззә районида пәләситнликләрниң исраилийә әскәрлириниң һуҗум нишаниға айлинип қелиши нәтиҗисидә оттуриға чиққан сүркилиш һәққидә өзара пикир алмаштурди. икки рәһбәр, ғәззә районниң һазирқи әһвалиниң мәсилини һәл қилишни қийинлаштурувәткәнликини тәкитләшти.

җумһур рәис әрдоғанниң иран пирезиденти һәсән руһани вә русийә пирезиденти виладимир путин елип барған телефон сөһбәтлиридә, пәләстинниң нөвәттики вәзийити һәққидә музакирә елип берилди.

«‹стар› гезити», «түркийә билән америка қошма иштатлири оттурисидики муһим учришишларниң вақти ениқ болди» сәрләвһилик хәвиридә, төвәндики учурларни оқурмәнлириниң диққитигә сунди:

түркийә ташқи ишлар министири мәвлүт чавушоғлу билән америка қошма иштатлири ташқи ишлар министири майк помпео 4 – ийун күни америка қошма иштатлириниң пайтәхти вашингтонда бир йәргә җәм болиду.

чавушоғлу билән помпеониң учришишида, сүрийә киризиси вә оттура шәрқ районидики өзгиришләр, түркийә америка қошма иштатлири мунасивәтлири, п к к вә фәтһуллаһчи террорлуқ тәшкилати қатарлиқ террорлуқ тәшкилатлириға қарши  күрәш қатарлиқ мәсилиләрниң музакирә қилиниши күтүлмәктә.

«‹вәтән› гезити», «баш иштаб башлиқи һулуси ақар муһим учришишларни елип барди» сәрләвһилик хәвиридә, төвәндики байанларға орун аҗратти:

баш иштаб башлиқи һулуси ақар гиретсийә ва америка қошма иштатлири баш иштаб башлиқлири билән көрүшти. ақар түнүгүн шималий атлантик әһди тәшкилати һәрбий ишлар комитетиниң баш иштаб башлиқлири йиғиниға қатнишиш үчүн йетип барған белгийәниң пайтәхти бирйусселда алди билән гиретсийә баш иштаб башлиқи билән көрүшти. бу, әгә деңизида сүркилиш йүз бәргәндин кейинки икки дөләт оттурисидики тунҗи қетимлиқ алий дәриҗилик рәһбәрләр сәвийәсидики учришиш болди.

һулуси ақарниң америка қошма иштатлири баш иштаб башлиқи җозеф дунфорд билән елип барған учришишида, икки дөләт мунасивәтлири, сүрийә киризиси вә оттура шәрқ районидики өзгиришләр қатарлиқ мәсилиләрни чөридигән һалда өзара пикир алмаштурулди.

«‹һөрийәт› гезити», «муавин баш министир мәһмәт шимшәк иқтисадий ишлар һәққидә муһим байанат елан қилди» сәрләвһилик хәвиридә, төвәндики мәлуматларни оқурмәнлириниң диққитигә сунди:

иқтисадий ишларға мәсул муавин баш министир мәһмәт шимшәк аммиви ортақлишиш тор бети Twitter сәһиписидә елан қилған байанатида, иқтисадниң сайламдин кейин қайтидин җанлинидиғанлиқини әскәртти.

«‹ Bloomberg News › телевизийә қанили» түркийә шөбисиниң мәсули бенҗамин һарвей һәмбәһирләшкән бир хәвәркә инкас қайтурған шимшәк, «сайламдин кейин сийасий ишларму изиға чүшиду, шуниң билән, иқтисадму қайтидин җанлиниду. пиринсиплиқ базар игиликини җанландуш иқтисадий тәрәққийат нишанини ишқа ашуруштики әң муһим һәм бихәтәр йол» деди.

«‹йеңи шәпәқ› гезити», «муавин баш министир рәҗәп ақдағ исраилийә билән мисирниң пәләситнлик йаридарларни түркийәгә кәлтүридиған айропиланни қондурушқа рухсәт бәрмигәнликини ейтти» сәрләвһилик хәвиридә, төвәндики учурларни оқурмәнлириниң диққитигә сунди:

муавин баш министир рәҗәп ақдағ шималий қибрис түрк җумһурийити җумһур рәиси мустафа ақинҗи вә баш министири туфан әрһүрман тәрипидин айрим – айрим һалда қобул қилинди. ақдағ, шималий қибрис түрк җумһурийитидики зийарити җәрйанида елан қилған байанатида, «пәләстиндики йаридарларниң түркийәгә кәлтүрүлүши үчүн исраилийә йаки мисирға айропилан қондурушқа тоғра келиду. һәр икки дөләт буниңға рухсәт бәрмиди» деди.



مۇناسىۋەتلىك خەۋەرلەر