12.04.2018

türkiye awazi radiyosi: «‹sabah› géziti», «jumhur reis rejep tayyip erdoghan amérika qoshma ishtatliri pirézidénti donald tramp bilen téléfonda körüshti» serlewhilik xewiride, töwendiki uchurlarni oqurmenlirining diqqitige sundi:

jumhur reislik sariyi teripidin élan qilinghan yazma bayanatta eskertilishiche, jumhur reis rejep tayyip erdoghan bilen amérika qoshma ishtatliri pirézidénti donald tramp téléfonda körüshken. erdoghan bilen tramp, téléfon söhbitide, süriyediki özgirishler heqqide özara pikir almashturghan.

bu heqte aqsaray teripidin élan qilinghan bayanatta, mundaq déyildi: «jumhur reis rejep tayyip erdoghan bilen pirézidént donald tramp xelqara jemiyetning küntertipidiki mesililer heqqide dawamliq alaqe qilip turidu.»

«‹star› géziti», «türkiye iqtisadiy jehettiki suyiqestlik oyunni tarmar qildi» serlewhilik xewiride, töwendiki melumatlarni oqurmenlirining diqqitige sundi:

jumhur reis rejep tayyip erdoghan bezi küchlerning her jehettin tereqqiy qiliwatqan türkiyege tosalghu bolush üchün bolupmu iqtisadiy jehettin oyniliwatqan suyiqestlik oyunni tarmar qilghanliqlirini, buningdin kéyinmu dawamliq shundaq qilidighanliqlirini éytti.

bezi küchlerning térrorizm we éréwot nisbitini kozér süpitide ishlitiwatqanliqini qeyt qilghan erdoghan, türkiyege iqtisadiy jehettin suyiqestlik tuzaq qurulghanliqini eskertish bilen bir waqitta, suyiqestlik pilanlarning perde arqisidiki küchlerge xitap qilip mundaq dédi: «siler qanche qilmanglar, hergizmu meqsitinglargha yételmeysiler.»

«‹weten› géziti», «irandin türkiye iqrari» serlewhilik xewiride, töwendiki bayanlargha orun ajratti:

iran – qatar birleshme soda uyushmisining bashliqi ednan musapur, türkiyening diplomatik we iqtisadiy qurulmiliridiki imkaniyetlerdin paydilinip, qatar bazarlirida bashqa döletlerning aldigha ötüp ketkenlikini éytti.

qatar we bezi ereb elliri otturisida kirizis yüz bergendin kéyin, qatar bazarlirida türkiyening üstünlükke érishkenlikini qeyt qilghan iranliq sodiger musapur, «türkiyedin qalsa, yawropa döletliri ikkinchi orunda, iran üchinchi orunda turidu» dédi.

u yene, türkiyening hem tiransport, bankichiliq we éksport paaliyetlirini qollash mesilisidiki artuqchiliqlirini jari qildurup, hem diplomatiye we iqtisadiy ewzellikliridin paydilinip, rayonda otturigha chiqqan pursetlerdin toluq behrimen boluwatqanliqinimu sözlirige ilawe qildi.

«‹yéngi shepeq› géziti», «<zeytun shéxi> chégra éghizi may éyida pütidu» serlewhilik xewiride, töwendiki uchurlarni oqurmenlirining diqqitige sundi:

tamozhna we soda ishliri ministiri bülent tüfenkji, süriyening térrorchilardin tazilanghan afrin rayonigha insanperwerlik yardem buyumlirini yetküzüp bérish üchün pilanlanghan «<zeytun shéxi> chégra éghizi» ning may éyining axirliri pütidighanliqini éytti.

bülent tüfenkji mundaq dep körsetti: «tereqqiyat ishliri ministirliqi we döletlik memuriy xadimlar bashqarmisi bilen ortaq muzakirilerni élip bériwatimiz. muzakiriler axirlashqandin kéyin, zeytun shéxi chégra éghizi qurulushini tamamlap, ishqa kirishtürimiz.»