13.03.2018

бүгүнки түркийә гезитлиридин таллап тәййарлиған хәвәрлиримизниң қисқичә мәзмунлири төвәндикичә:

13.03.2018

ватан гезити «германийәдә йеңи қурулған һөкүмәттин иҗабий сигналлар»сәрләвһилик хәвиридә муну учурларни оқурмәнлири билән ортақлашти: «германийәдә йеңи қурулған һөкүмәт түркийә тоғрисида иҗабий байанатларни беришкә башлиди, германийәдә хиристийан демократчилар бирлик партийәси, хиристийан иҗтимаий бирлик партийәси вә иҗтимаий демократчилар партийәси бирләшмә һөкүмәт қурди. германийә баш минстири ангела меркел түркийә билән йавропа иттипақиниң музакирә өткүзүш йолида издиниши лазимлиқини ейтти, меркел: түркийә билән аримиздики пикир охшимаслиқлирини техиму көпәйтивалсақ болмайду, шуңа алақә йолимиз очуқ болуши лазим, чүнки бизниң бир-биримизгә еһтийаҗимиз бар, түркийә сүрийәдики уруштин қачқан мусапирларға бүйүк хизмәтләрни қилди, 3 милйон мусапирни күтти, бизму түркийә билән аримиздики келишимгә риайә қилишимиз керәк, деди.»

ситар гезити «түркийә мудапиә санаитидә зор бурулуш »сәрләвһилик хәвиридә муну учурларни оқурмәнлири билән ортақлашти: «доһа хәлқара деңиз мудапиә йәрмәнкиси қатарниң пайтәхти доһадики қатар мәмликәтлик мәҗлис залида башлиди, йәрмәнкиниң ечилиш мурасимиға дөләт мудапиә министири нурәттин җаникли, армийә баш қоманданлиқ иштаби башлиқи генерал һулуси акар, мудапиә санаити башқармиси башлиқи исмаил дәмир иштирак қилди. бу қетимқи йәрмәнкигә йәнә түркийә мудапиә вә авиатсийә санаити експортчилар уйушмиси вә 33 түркийә ширкити қатнашти. түркийә ширкәтлири йәрмәнкидин 2413 квадрат метирлиқ җай иҗригә алди.»

хабәр түрк гезити «хәлқарадики деңиз сайаһәт ширкәтлири түркийәгә йүзләнди»сәрләвһилик хәвиридә муну учурларға орун аҗратти: «хәлқарадики деңиз сайаһәт ширкәтлири түркийәгә йүзләнди. истанбул вә мармара, әгә, ақ деңиз, қарадеңиз районлири деңиз содиси уйушмисиниң измирдики шөбисиниң билдүрүшичә, 5-марттин 8-мартқичә болған арилиқта америкиниң филорида иштатида сетред деңиз сайаһити йәрмәнкиси өткүзүлгән болуп, йәрмәнкигә хәлқарадики деңиз сайаһәт ширкәтлири қатнашқан. йәрмәнкигә қатнашқан чоң ширкәтләр 2019-йилдин башлап измир вә анталийәгә йүзлинидиғанлиқлирини билдүргән.»

йеңи шәпәқ гезити «миллий киредит дәриҗигә айриш оргини қурулиду»сәрләвһилик хәвиридә муну учурларни оқурмәнлириниң диққитигә сунди: «хәлқара киредит дәриҗигә айриш оргини моди <moody>ниң өткән һәптә түркийә иқтисадиға адил муамилә қилмай төвән номур қойуши хәлқара киредит дәриҗигә айриш органлири тоғрисида һәр хил талаш-тартишларниң келип чиқишиға сәвәб болди вә бу органларниң ишәнчиликигә гуман пәйда қилди. түркийә бу әһвалға қарита дәрһал һәрикәткә өтти, түркийә банкичилиқ ишлири вә тәптиш идариси тәрипидин бу йил киредит дәриҗигә айриш оргини қурулидиғанлиқи билдүрүлди.»

сабаһ гезити «түркийә һава йоллири<авиатсийә> ширкити рекорт йаратти »сәрләвһилик хәвиридә муну учурларға орун аҗратти: «түркийә һава йоллири<авиатсийә>  ширкитиниң бу йил февралдики йолучи сани бултурқиниң охшаш мәзгилигә селиштурғанда %26 ешип 5 милйон 100миң йолучиға йәтти. түркийә һава йоллири ширкити тарихида тунҗи қетим феврал ейида 5 милйон йолучиға мулазимәт қилди.»



مۇناسىۋەتلىك خەۋەرلەر