13.10.2017

bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:

13.10.2017

türkiye awazi radiyosi: «‹star› géziti», «erdoghan gherb ellirige signal bérip mundaq dédi:  silerning küchlük türkiyege könüshtin bashqa amalinglar yoq» serlewhilik xewiride, töwendiki melumatlarni oqurmenliri bilen ortaqlashti:

jumhur reis erdoghan jumhur reislik sariyida chaqirilghan «waliylar yighini» da qilghan sözide, amérikini öz ichige alghan pütkül dunya ellirige muhim signallarni berdi hemde türkiyening her jehettin tereqqiy qilip, künséri qudret tépiwatqanliqini tekitlep mundaq dédi: «gherb elliri istiratégiyelik pilanlarni tüzüp, barghanséri tereqqiy qiliwatqan qudretlik türkiyeni hezm qilalmaywatidu. türkiye – amérika otturisidiki wiza kirizisimu buning eng roshen namayendisi, elwette. derweqe, türkiye nöwette héchkimge muhtaj emes.»

«‹xewer türk› géziti», «yerlik qoral – yaraghlar amérikining qoral – yaraghlirigha qarighanda téximu ilghar» serlewhilik xewiride, töwendiki uchurlarni oqurmenliri bilen ortaqlashti:

jumhur reis rejep tayyip erdoghanning «buningdin kéyin saqchilirimiz  Sig Sauer  dep atilidighan qoral – yaraghlarni ishletmeydu. biz nöwette tapancha yaki téximu uzun musapiliq qoral – yaraghlarni öz dölitimizde  ishlepchiqiriwatimiz. chünki biz qoral – yaraghlarni bashqilardin alghanséri horunliship kétidikenmiz. eng yaxshisi, biz özimiz ishlepchiqarghan qoral – yaraghlirimizni ishliteyli» teriqisidiki bayanatidin kéyin, hemmining diqqiti chet el qoral - yaragh sistémiliridin paydilip, yerlik qoral – yaraghlarni ishlepchiqirish layihelirige buraldi. bu layihelerdin biri (MPT-76)  tipliq milliy piyade eskerler miltiqi dunya armiyeliri ishlitidighan piyade eskerler miltiqlirining üstün alahidiliklirini öz ichige alghan asasta layihelendi. igilinishiche, bu nato ning sinaqliridin ötken ilghar qoral - yaragh iken.

«‹sabah› géziti», «amérika konsulxana xadimining fethullahchi térrorluq teshkilati unsurliri bilen chétishliqining barliqigha munasiwetlik delil – ispatlar» serlewhilik xewiride, töwendiki melumatlargha orun ajratti:

amérikining enqere bash elchisi jon bas axbarat élan qilish yighinida, amérikining istanbul konsulxanisi xadimining fethullahchi térrorluq teshkilati unsurliri bilen dawamliq alaqe qilghanliqigha dair héchqandaq delil - ispatning yoqluqini éytqanidi.

«‹sabah› géziti», qolgha élinghan jasusning fethullahchi térrorluq teshkilati unsurliridin teshkil tapqan térroristlar bilen  köp qétim alaqe qilghanliqini ispatlap béridighan delillerni qolgha chüshürdi. bu deliller téléfon körüshüshliridin teshkil tapidighan bolup, mezkur jasusning qandaq waqitta fethullahchi térrorluq teshkilati unsurliri bilen qaysi waqitta körüshkenlikini tepsiliy otturigha qoyidu. nöwette hemmining diqqiti mezkur jasusning fethullahchi térrorluq teshkilati unsurliri bilen élip barghan téléfon uchrishishining tepsilatigha buruldi.

«‹yéngi shepeq› géziti», «türkiye idlibte toqunushmasliq rayoni berpa qilish üchün heriketke ötti» serlewhilik xewiride, töwendiki uchurlarni oqurmenliri bilen ortaqlashti:

deslepki melumatlargha qarighanda, alahide qisimlar charlash paaliyetlirini tamamlighandin kéyin idlibke ketken. heriket saet 23.05 te bashlanghan. 8 tanka, 50 bironéwik we 200 dek türk eskiri kefer  lusin rayonidin idlibke kirgen. daret izze yézisigha yétip barghan aptomobil etritining axirqi menzilgahi istiratégiyelik ehmiyetke ige «beriket töpiliki» bolup, heriket jeryanida bixeterlik tedbirliri qattiq kücheytilgen.  qoralliq ademsiz haaa apparatlirimu aptomobil etritini qoghdap mangghan. etret ötken menzilgahlardiki rayon xelqi türk eskerlirige alqish yangratqan.

«‹weten› géziti», «shiwétsiye türkiyening yawropa ittipaqigha ezaliqini qollaydighanliiqini bildürdi» serlewhilik xewiride, töwendiki melumatlarni oqurmenliri bilen ortaqlashti:

shiwétsiye hökümiti makédoniye bilen türkiyening yawropa ittipaqigha ezaliqi musapisini qollashni dawamlashturidighanliqini bildürdi. shiwétsiye hökümitining resmiy tor bétide élan qilinghan bayanatta mundaq déyildi: «shiwétsiye sherqiy yawropa, gherbiy balqan rayoni we türkiye bilen hasil qilinghan «islahat hemkarliqi istiratégiyesi» kélishimi dairiside mezkur ellerning yawropa ittipaqigha ezaliqi musapisini qollaydu. bu arqiliq rayonning iqtisadiy, démokratik we muhit asrash jehettiki sijil tereqqiyatigha hesse qoshushni nishan qiliwatimiz.»

 



مۇناسىۋەتلىك خەۋەرلەر