12.10.2017

бүгүнки түркийә гезитлиридин таллап тәййарлиған хәвәрлиримизниң қисқичә мәзмунлири төвәндикичә

12.10.2017

түркийә авази радийоси: «<йеңи шәпәқ> гезити», «америка виза киризисини һәл қилиш үчүн һәрикәткә өтти, һәйәт әвәтиду» сәрләвһилик хәвиридә төвәндики учурларни оқурмәнлири билән ортақлашти: америка ташқи ишлар министирлиқидин бир һәйәтниң виза киризиси тоғрисида сөһбәт өткүзүш үчүн алдимиздики һәптә түркийәгә келидиғанлиқи илгири сүрүлди. америка ташқи ишлар министирлиқи әмәлдарлири, һәйәткә америка муавин ташқи ишлар министири җонатан җоһенниң рийасәтчилик қилидиғанлиқини әскәртти. америка әлчиханиси йәкшәнбә күни кечиси тивиттер арқилиқ уқтуруш тарқитип, түркләргә виза беришниң тохтитип қойулғанлиқини уқтурған؛ америкидики түркийә әлчиханисиму охшаш усулда җаваб қайтуруш пиринсипиға асасән америкилиқларға виза беришниң тохтитип қойулғанлиқини тивиттер арқилиқ уқтурғаниди. җумһур рәис рәҗәп таййип әрдоған мушундақ җаваб қайтуруш тоғрисида өзиниң йолйоруқ чүшүргәнликини ейтқаниди. америка консулханисида ишләйдиған бир киши фәтһуллаһчи террорлуқ тәшкилатиға четишлиқ икәнлики илгири сүрүлүп, сот мәһкимиси тәрипидин (түркийәдә) тутқун қилинғаниди.

«<стар> гезити», «түркийә ақ деңиздин үмидвар, тунҗи чоңқур бурғилаш 2018 да» сәрләвһилик хәвиридә төвәндики учурларни оқурмәнлири билән ортақлашти: анталйада чақирилған енергийә йиғинида соалларға җаваб бәргән енергийә вә тәбиий байлиқлар министири бәрат албайрақ, нефит вә тәбиий газ издәш бойичә тунҗи чоңқур бурғилашниң 2018 – йили ақ деңизда башлинидиғанлиқини ейтти. албайрақ, «ақ деңиздин наһайити бәк үмидвармиз» деди. ақ деңизни бурғилаш хизмәтлири сайисида нурғун малийә әвзәлликини қолға кәлтүридиғанлиқлирини тәкитлигән албайрақ, түркийәниң бир балдақ өрлиши үчүн, енергийә сиртқа беқинишни азайтишиниң һалқилиқ әһмийәткә игә икәнликини тәкитлиди.

«<сабаһ> гезити», «террор каридориға төк зәрбә бериш һәрикити» сәрләвһилик хәвиридә төвәндики учурларни оқурмәнлири билән ортақлашти: «түркийәниң ирақ вә сүрийәниң шималида террор каридори шәкилләндүрүш ойуниға қарши йүргүзидиған узун мәзгиллик һәрбий пиланиниң тәпсилати төвәндикичә: хатай – рәйһанли чегра еғизидин башламчи қисимлар сүпитидә идлибқа киргән әркин сурийә армийәси билән түркийә әскәрлириниң тунҗи йетип баридиған йери идлибниң шималидики дар та иззә болиду. һәрикәт пиланидики тунҗи нишан болған идлибтики террорчиларни тазилаш мәқсәтлик «сүпүрүш һәрикити» гә бу йәрдин  қоманданлиқ қилиниду. идлибниң террорчилардин халийлаштурулуши билән идлиб – дар та иззә линийәси, шәкилләндүрүлүши пиланланған «өтүш каридори» ниң биринчи басқучи болиду. һәрикәтниң иккинчи қәдими, өтүш каридорини фират қалқини райониға туташтуруш һәрикити болиду.  «й п г ни боғуш һәрикити» даирисидә, й п г террорлуқ тәшкилатиниң контроллуқи астидики афринниң җәнубидики җиндәриси билән һәләбниң шималидики әрәб нопуси топлишип олтурақлашқан тәл рифат наһийәси терррочи унсурлардин халийлаштурулуп, бихәтәр районға айландурулиду.

«<вәтән> гезити», «түркийә билән иран арисида истихбарат һәмкарлиқи» сәрләвһилик хәвиридә төвәндики учурларни оқурмәнлири билән ортақлашти: йеқиндин буйан дипломатийә алақисини қойуқлаштурған түркийә билән иран, бөлгүнчи террорлуқ тәшкилати п к к ға қарши ортақ күрәшкә атлиниду. террорға қарши чегра бихәтәрлики, истихбарат алмаштуруш вә өзара маслишиш җәһәтләрдә һәмкарлиқ орнитилиду. дәсләпки қәдәмдә, икки дөләт арисида п к к ниң әмәлий алақисиниң үзүп ташлинип, аҗизлитилиши пиланланмақта.

«<хабәртүрк> гезити», «йәрлик мәһсулат <алтай танкиси>, йүрүшләштүрүп ишләпчиқиришқа тәййарланмақта» сәрләвһилик хәвиридә төвәндики учурларни оқурмәнлири билән ортақлашти: мудапиә санаити мәслиһәтчиси исмаил дәмир, дөләт ичидә йасап чиқилған алтай намлиқ танкини йүрүшләштүрүп ишләпчиқириш үчүн елан қилинидиған һөддигә бериш даирисидә тәклип сунулушини күтүватқанлиқлирини ейтти. у, мустәқил сода – санаәтчиләр тәрипидин орунлаштурулған бир йиғинда, алтай танкисиниң йүрүшләштүрүп ишләпчиқирилишиға даир бир соалға «нөвәттә тәклипләрниң сунулушини күтүватимиз» дәп җаваб бәрди. сабиқ мудапиә министири фикри ишиқ ийул ейида йүрүшләштүрүп ишләпчиқириш үчүн һөддигә  бериш йиғини өткүзүлидиғанлиқини елан қилғаниди. дөләт ичидә отокардин башқа FNSS ниң тапанлиқ бироневик аптомобил лайиһәләш вә ишләпчиқириш тәҗрибиси бар. BMC вә катмәрҗиләр чақлиқ бироневик аптомобил ишләпчиқармақта. түмосанниң болса, чақлиқ бироневик аптомобил ишләпчиқириш лайиһәси бар.



مۇناسىۋەتلىك خەۋەرلەر