12.09.2016

бүгүнки түркийә гезитлиридә асасий салмақни игилигән хәвәрләр төвәндикичә:

12.09.2016

түркийә авази радийоси: «йеңи шәпәқ гезити», дөлитимиз җумһур рәиси рәҗәп таййип әрдоғанниң қазақситандин қайтиш сәпиридә күнтәртиптики мәсилиләр тоғрисида тохталғанлиқини хәвәр қилди.

гезитниң хәвиридә, җумһур рәис рәҗәп таййип әрдоғанниң, «болупму, идлиб тоғрисида мундақ демәкчимән: 14-сентәбир өткүзүлидиған астана йиғини муһим әһмийәткә игә. һазир идлибтә русийә билән келишкинимиз бойичә иш қиливатимиз, ишлар шу бойичә болуватду. русийә билән оттуримизда ихтилап пәйда қилидиған һечқандақ мәсилә йоқ. иран билән сөһбәтлиримиздиму ихтилап пәйда қилидиған һечқандақ мәсилә көрүлмиди. астана йиғинидин кейин башлинидиған өзара учришишларни мушу бойичә давам қилиду, дәп ойлаймән, вәзийәт иҗабий йөнүлүштә илгириләватиду» дегәнлики билдүрүлди.

«стар гезити», җумһур рәис рәҗәп таййип әрдоғанниң башчилиқ қилиши билән, араканға кәң көләмдә йардәм қилиш сәпәрвәрлик паалийитиниң башланғанлиқини хәвәр қилди.

гезитниң хәвиридә, муавин баш министир рәҗәп акдағниң баңладишниң мәсул даирилири билән бу дөләттә панаһланған аракан мусулманлириға узун муддәтлик вә изчил йардәм қилиниши үчүн сөһбәт башлиғанлиқи билдүрүлди.

хәвәрдә, рәҗәп акдағниң, «түрк хәлқиниң мәртләрчә қилған йардими билән топлиған иқтисад арқилиқ араканлиқ қериндашлиримизға йардәм қолимизни йәнә бир қетим узитимиз. түркийә бундақ ишларда инсанийәтниң виҗданиға айланди вә давамлиқ мушундақ болиду. бу бизниң етиқадимизниң вә мәвҗуд болушимизниң зөрүр шәртидур» дәп ейтқанлиқи әскәртилди.

хәвәрдә билдүрүлишичә, сәпәрвәрлик паалити даирәсидә бир интернет тор бети ечилған болуп, йардәм қилмақчи болғанлар www.arakanasahipcik.org адресидин пул әвәтәләйдикән.

«һөррийәт гезити», «бир әнглийәликниң нәзиридә синоп» сәрләвһисидә хәвәр елан қилди.

гезитниң хәвиридә көрситилишичә, б б с (BBC) ниң йазғучилиридин бири болған җошуа ален түркийәниң «җимҗит шәһири» дәп талланған синопқа беришни арзу қилип кәлгән болуп, ахири синопқа қарап йолға чиққан. у синопни түркийәниң «әң хушал шәһири» гә айландурған сәвәбләрни билишкә қизиққан. у синоп тоғрисида тохталғанда, «йунан пәйласопи дийожен синопта туғулған икән, дийожен кишиләргә еришкәнлири билән хушал болуш керәкликини ейтқан икән, синопму бу чақириққа бойсунупту» дегән.

у синопниң тәбиий мәнзирәсидин толиму сиһирләнгәнликини, синоп кичик шәһәр болғанлиқи үчүн кишиләрниң бир-бирини тонуйдиғанлиқини вә кишиләр арисидики бир-биригә болған һөрмәтниң һөкүмран икәнликини, шуңа хатирҗәмликкә толған муһитниң шәкилләнгәнликини тәкитләп, җәмийәттики өзара инақлиқни алаһидә тәкитлигән.

«сабаһ гезити», 16-нөвәтлик «Cityscape Global » йәрмәнкисидә дубәйдә өй-земин ишлири билән шуғуллинидиған ширкәтләргә тунҗи қетим  өй-земин сетиш һоқуқиниң берилгәнликини хәвәр қилди.

хәвәрдә, дубәйдә өй-земин базирини җанландуруш үчүн бундақ иҗазәтниң берилгәнлики билдүрүлди.

йәрмәнкидә елан қилинған санлиқ мәлуматлар әрәб бирләшмә хәлипиликиниң өй-земин саһәсигә мунасивәтлик диққәт қозғайдиған санларни ашкарилған. буниңға асасланғанда, әрәб бирләшмә хәлипиликидә қурулуши давам қиливатқан вә қиммити 227.9 милйард долларлиқ 7 миң 878 өй-земин лайиһәси бар икән. дубәйдики 2 миң 812 лайиһәниң қиммити болса 121.1 милйард доллар икән. лайһәләргә нисбәтән тәләпниң көп болмаслиқи өй-земин сетишқа тайанған дөләт иқтисадида қийинчилиқ пәйда қилған.



مۇناسىۋەتلىك خەۋەرلەر