07.08.2017

türkiye awazi radiyosi: «<xabertürk> géziti», «türkiye sherqiy jenubiy asiya döletliri ittipaqigha shérik (boldi)» serlewhilik xewiride töwendiki uchurlarni oqurmenliri bilen ortaqlashti: «(türkiye tashqi ishlar ministiri mewlut chawushoghlu, sherqiy jenubiy asiya döletliri ittipaqining 50 – nöwetlik yighinigha ishtirak qilish üchün barghan filippinda bayanat bérip , <türkiye sherqiy jenubiy asiya döletliri ittipaqining saheler boyiche diyalog shériki boldi. yol xeritimizge yuqiri baha bérildi. (buningdin kéyin) rayondiki döletler bilen bolghan hem siyasiy hem organlar ara munasiwetlirimiz téximu küchiyidu. soda – sanaetchilirimiz üchün, muhim pursetler tughulidu> dédi.»

«<sabah> géziti», «sherqiy jenubta ajayip özgirish» serlewhilik xewiride töwendiki uchurlarni oqurmenliri bilen ortaqlashti: «bölgünchi térrorluq teshkilati p k k ning xendek we tosuqliri bilen éghir weyranchiliqqa duch kelgen diyarbakir, shirnaq, jizre, silopi, nusaybin we yüksekowada nöwette toluq menide meblegh sélish seperwerliki dawam qilmaqta. sheherlik hökümetlerning pulliri p k k gha emes, xelqning éhtiyajliri üchün serp qilinghachqa, wilayet we nahiyeler qisqa waqit ichide zamaniwi körünüshke ige boldi. xarabilikke aylanghan sheherlerdiki qurulushlar sayisida ichimlik we kéreksiz su üstqurulmiliri yéngilandi, yollar asfalitlashturuldi, yéngi mektepler, doxturxanilar we baghchilar yasaldi.»

«<weten> géziti», «soda merkizi emes, yermenke sahesi» serlewhilik xewiride töwendiki uchurlarni oqurmenliri bilen ortaqlashti: «qatnash, déngizchiliq we uchur – alaqe ishliri ministiri ehmet arslan, istanbuldiki üchinchi ayrodurumning xizmetke kirishtürülüshidin kéyin atatürk ayrodurumining aqiwitining qandaq bolidighanliqi toghrisida bayanat berdi. u, atatürk ayrodurumi heqqide toxtilip, <istanbulgha nepes alduridu. ayrodurum yermenke sahesi bolidu. qurulush ijaziti bérilip soda merkizi we turalghu berpa qilish mumkin emes> dédi.»

«<hörriyet> géziti», «öyge qaytish charisi» serlewhilik xewiride töwendiki uchurlarni oqurmenliri bilen ortaqlashti: «firat qalqini herikiti arqiliq daéshtin xaliylashturulghan elbab, jerablus – azezge süriyelik puqralarning qaytishliri dawam qilmaqta. aile we ijtimaiy siyasetler ministirliqi bilen b d t  musapirlar aliy komissarliqi mutexessisliri, süriyege qaytishni xalaydighan ayallar, balilar we aililerge pisxik jehette yardem bermekte. türkiyede panahlanghan 3 yérim milyon süriyelikning ijtimaiy jehettin maslishishini qolgha keltürüsh xizmetlirimu dawam qilmaqta.»

«<yéngi shepeq> géziti», «dangliq shexsler türkiyedin waz kechmidi» serlewhilik xewiride töwendiki uchurlarni oqurmenliri bilen ortaqlashti: «mughlaning bodrum nahiyesi, türkiyeni yaxshi köridighan chet ellik soda sanaetchiler, artislar, siyasetchiler, padishahlar, senetchiler dégendek köpligen dangliq shexslerning waz kéchilmes jaylirining biri bolushni dawamlashturmaqta. yéqinqi künlerde nahiyege kelgenlerning arisida shexsiy sayahet paraxoti bilen kelgen ukrainaliq soda – sanaetchi aléksandr yaroslawiski, méksikiliq soda – sanaetchi rikardo salinas piliégo, daniye xan jemeti ailisi ezaliri, engliyelik modél katé mos we biraziliyelik modél adriyana lima qatarliqlardin sirt siyasetchiler we chet ellik zhurnalistlarmu bar. gérmaniye bild gézitining sabiq bash tehriri kai diékmanningmu sayahet qilish üchün bodrumgha kélishi diqqetni tartti.»