19.06.2017

bügünki türkiye gézitliridin tallap teyyarlighan xewerlirimizning qisqiche mezmunliri töwendikiche:

19.06.2017

türkiye awazi radiyosi: «<weten> géziti», «parizh awiyatsiye yermenkiside türkiye shamili» serlewhilik xewiride töwendiki uchurlarni oqurmenliri bilen ortaqlashti: «dunyaning eng chong awiyatsiye we alem boshluqi mehsulatliri yermenkisi bolghan parizh awiyatsiye yermenkisi ete lé bourgét ayrodurumida échilidu. awiyatsiye sanaitidiki eng yéngi özgirishler körgezme qilinidighan yermenkide bu yil türkiye awiyatsiye sanaiti mehsulatliri gewdilinidu. türkiye, özi layiheligen hawa qatnishi wasitilirini parizh awiyatsiye yermenkiside körgezme qilidu. yermenkide türkiye awiyatsiye sanaiti shirkiti teripidin layihelinip ishlepchiqirilghan hürqush meshiq ayropilani nomur körsitidu. aldimizdiki yili uchushni bashlaydighan 12 orunduqluq 6 tonna éghirliqtiki hem normal hem herbiy ishlarda ishlitilidighan t-625 tipliq tik uchar ayropilanmu körgezmige qoyulidu. türkiye awiyatsiye sanaiti shirkitining t-129 atak, qoralliq uchquchisiz hawa apparatigha aylandurulghan anqa-s mu körgezme qilinidu.»

«<xabertürk> géziti», «amérika qoshma ishtatliri bilen türkiye arisida f-35 kélishimi» serlewhilik xewiride töwendiki uchurlarni oqurmenliri bilen ortaqlashti: «türkiyeni öz ichige alghan 11 dölet kem dégende 440 dane f-35 urush ayropilani sétiwélish üchün kélishti. omumiy sommisining 37 milyard dollargha yétishi kütülüwatqan kélishimning bir rékort ikenliki eskertilmekte. 2006 – yilidin buyan ishlepchiqirilishqa bashlighan mezkur ayropilanlarning eng ilghar üsküniler seplengen yéngi modélliri ete échilidighan parizh awiyatsiye yermenkiside körgezme qilinidu. ötken hepte f-35 sétiwalmaqchi bolghan 11 döletning mesulliri amérikining mariland ishtatidiki baltimor shehiride uchriship, f-35 ayropilanlirining üskünilirini ishlepchiqiridighan  Northrop Grumman zawutini ékskursiye qilip, shertler toghrisida söhbetleshkenidi. türkiye wekilinimu öz ichige alghan döletler awstraliye, daniye, israiliye, italiye, yaponiye, gollandiye, jenubiy koréye, engliye we amérikidin ibaret.»

«<star> géziti», «türkiye eskerliri qatar armiyesi bilen birleshme manéwir ötküzidu» serlewhilik xewiride töwendiki uchurlarni oqurmenliri bilen ortaqlashti: «türkiye bilen qatar arisida hasil qilinghan kélishimning rohigha asasen, qatargha qarap yolgha chiqqan türkiye eskerliri rayongha yétip bardi. ular qatar armiyesi bilen birlikte bir qatar birleshme manéwirlarni ötküzidu. qatarning dangliq médiya orgini <eljezire>, türk eskerlerning rayongha yétip barghanliqini we qatar armiyesi bilen birlikte bir qatar birleshme manéwirlarni ötküzidighanliqini xewer qildi. seudi erebistan, misir, ereb birleshme xelipiliki, behreyn, yemen dégendek döletlerni öz ichige alghan bir qatar pars qoltuqi döliti diplomatik munasiwetlirini üzgen we qatargha bezi émbargolarni yürgüzgenlikini élan qilghanidi. bu bayanatlardin kéyin türkiye büyük millet mejliside bélet tashlash arqiliq qatargha esker ewetish maqullanghanidi.»

«<sabah> géziti», «shepqet paraxoti ghezze yolida» serlewhilik xewiride töwendiki uchurlarni oqurmenliri bilen ortaqlashti: «israiliye teripidin muhasirige éliwélinghan ghezzege 10600 tonna yardem eshyasi yetküzüp béridighan <Acqua Stella> namliq paraxot tünügün yolgha chiqti. yardem eshyaliri arisidiki ashliq mehsulatliridin bashqa oyunchuq, wélisipit we héytliq kiyim – kéchekler bilen pelestinlik balilar bayramni shat – xuram ötküzidu. paraxotta 18100 dane oyunchuq, 32000 yürüsh oqush matériyali, 50000 ozuq – tülük sanduqi, 5000 tonna un, 100 tonna pirenik we bolka, 50000 kiyim – kéchek, 1000 dane héytliq kiyim we 1010 dane wélisipit qatarliqlar bar.»

«<yéngi shepeq> géziti», «daniyede islamni güller bilen chüshendürdi» serlewhilik xewiride töwendiki uchurlarni oqurmenliri bilen ortaqlashti: «daniye silam jamaiti yashlar qaniti, paytext kopnéhagéndiki sheherlik hökümet meydani etrapigha modél munarlar orunlashturulghan chédir tikip, <men musulman> dégen nam astida paaliyet ötküzdi. taratqulardiki islam we musulmanlargha qarshi selbiy obrazgha xatime bérishni nishan qilghan yashlar, gül tarqitip daniyeliklerge islam we musulmanlarni chüshendürdi. pidakar yashlargha xelq we sayahetchiler ijabiy ipade bildürdi. daniye islam jamaiti teripidin yéqinqi 6 yildin buyan islam we musulmanlarni daniyeliklerge chüshendürüsh üchün, her xil paaliyetlerni ötküzüp kelmekte. daniye islam jamaiti, qish ayliridimu xelqqe issiq shakilat we nan tarqitish arqiliq islam we musulmanlarning ijabiy obrazini janlandurushqa tirishqanidi.»



مۇناسىۋەتلىك خەۋەرلەر