05.06.2017
bügünki türkiye gézitliridin tallap teyyarlighan xewerlirimizning qisqiche mezmunliri töwendikiche:
türkiye awazi radiyosi: «<hörriyet> géziti», «raqqe (herikiti) bashlidi» serlewhilik xewiride töwendiki uchurlarni oqurmenliri bilen ortaqlashti: «bash ministir binali yildirim, süriyediki aldin pilanlanghan raqqe herikitining 2 – iyunni 3 – iyungha baghlighan kéche bashlighanliqini élan qildi. yildirim, <amérika qoshma ishtatliri herbiy herikettin ilgiri kéreklik melumatlarni ortaqlashti> dédi. u, amérikining bölgünchi térrorluq teshkilati p k k ning süriyediki gumashtisi p y d / y p g gha qiliwatqan yardimi heqqide toxtilip, enqerening naraziliqini ipadiligenliki, amérika qoshma ishtatliriningmu herbiy herikettin kéyin p y d / y p g bilen bolghan munasiwetlerning uzun dawamlashturulmaydighanliqi, buning bir taktika mahiyetlik hemkarliq ikenlikini bildürdi we türkiyege kapalet bérilgenlikini qeyt qildi.»
«<star> géziti», «gabriél p k k pozitsiyesini özgertti» serlewhilik xewiride töwendiki uchurlarni oqurmenliri bilen ortaqlashti: «fethullahchi térrorluq teshkilati we bölgünchi térrorluq teshkilati p k k gha baghrini échip kéliwatqan gérmaniyening tashqi ishlar ministiri sigmar gabriél bügünki türkiye ziyaritidin ilgiri pozitsiyesini özgertti. gabriél, bild am sontang géziti bilen ötküzgen söhbitide, <türkler bizdin p k k gha qarshi téximu qattiq pozitsiye bildürüshimizni kütmekte. p k k bizdimu cheklengen bir teshkilat. ular (p k k) ning maliye menbelirining qurutup tashlinishi we ulargha gérmaniye zéminlirida heriket sahesi bérilmesliki gérmaniye üchünmu nahayiti paydiliqtur. bu, türkiye heqliq rewishte otturigha qoyuwatqan bir nuqtidur> dédi.»
«<sabah> géziti», «tamozhna birlikidiki yéngilinish bilen kirim %1.3 ashidu» serlewhilik xewiride töwendiki uchurlarni oqurmenliri bilen ortaqlashti: «yawropa ittipaqi bilen türkiye 13 – iyunda tamozhna birlikige bezi özgertishlerni kirgüzüsh yighini ötküzidu. yawropa ittipaqi türkiye heyiti bashliqi bash elchi kiristiyan bérgér, bu yéngilinishning türkiyening iqtisadiy éshishigha %1.3 hesse qoshidighanliqini éytti. bérgér, jumhur reis rejep tayyip erdoghanning 25 – maydiki biryussél ziyaritining yawropa ittipaqi – türkiye munasiwetliride yéngi bir dewrning bashlanghuchi bolghanliqini bildürdi. u yene, türkiye bilen yawropa ittipaqi mesile peyda qiliwatqan <térrorning éniqlimisining özgertilishi> mesilisidimu birdeklik hasil qilish mumkinchiliki barliqining signalini bergen halda, <türkiyening térrorizmgha qarshi küresh iqtidarini ajizlitishni xalimaymiz> dédi.»
«<yéngi shepeq> géziti», «somali paraxoti yolgha chiqti» serlewhilik xewiride töwendiki uchurlarni oqurmenliri bilen ortaqlashti: «jumhur reis rejep tayyip erdoghanning yolyoruqigha asasen bashlanghan <ümidi bol> seperwerlik paaliyiti dairiside türk qizil ay jemiyiti, bash ministirliq mehkimisi apet we jiddiy ehwallarni bir terep qilish bashqarmisi we türkiye hemkarliq we kordinatsiye agéntliqi qatarliqlarning orunlashturushi bilen 13 ming tonna ashliq we yardem eshyasi qachilanghan sebat namliq paraxot mersindin yolgha chiqti. bash ministir yardemchisi weysi qaynaq, her küni minglarche insan ölüwatqan afriqigha türkiyediki qérindashlirining bir paraxot ashliq, nerse – kérek we dostluq yollighanliqini éytti.»
«<xabertürk> géziti», «bolliywudqa sépil bolduq» serlewhilik xewiride töwendiki uchurlarni oqurmenliri bilen ortaqlashti: «bashta xolliywud bolup hindistan (bolliywud) we irangha oxshash kino – filim sahede dangq chiqarghan köpligen ellerning rézhissorliri köp meblegh sélinghan filim we téléwiziye tiyatirlirini süretke élishta türkiyeni tallimaqta. ötken yili türkiyede 30 din artuq chet el filim we téléwiziye tiyatiri süretke élindi. bu yil bu sanning 50 din éship kétishi texmin qilinmaqta. medeniyet we sayahet ishliri ministirliqi, rusiye bilen birlikte süretke élinidighan filim we téléwiziye tiyatirlirining qollap – quwwetlinidighanliqini élan qildi.
