26.01.2016
bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:
türkiye awazi radiyosi xewiri: «‹xewer türk› géziti» wizisiz sayahet diplomatik munasiwetlerni yenimu kücheytishte türtkilik rol oynaydu» serlewhilik xewiride, töwendiki melumatlargha orun ajratti: «tashqi ishlar ministiri mewlüt chawushoghlu türkiye puqralirining sichéngén rayonida wizisiz sayahet qilishining türkiye xelqi bilen yawropa elliri otturisidiki uchur - alaqe ishlirining uchqandek tereqqiy qilishida türtkilik rol oynaydighanliqini eskertti. chawushoghlu: ‹bu arqiliq xelqning neziridiki gumaniy qarashlarnimu asasiy jehettin yoq qilghili bolidu› dédi.»
«‹yéngi shepeq› géziti», «‹reis› filimini ishlesh bashlandi» serlewhilik xewiride, töwendiki jümlilerge orun ajratti: «jumhur reis rejep tayyip erdoghanning hayati mezmun qilinghan ‹reis› namliq filim shimaliy qibris türk jumhuriyitide ishlinishke bashlidi. texminen 4 milyon dollar meblegh ajritilghan filimni ishlesh üchün iskele rayonidiki bir kocha tamamen taqaldi. filimning sénariyesige asasen, tarixni tebiiy rewishte eks ettürüsh meqsitide kochilargha jumhur reis erdoghanning yashliq waqti ötken ‹qasimpasha mehellisi› ning menzirisi eks ettürülmekte. satirashxanidin qehwaxana we baqqalghiche hemme ish tertiplik orunlashturulup, shu dewrning tarixiy menzirisi janliq teswirlenmekte.»
«‹sitar› géziti», «chet ellikler dunya boyiche ikkinchi chong öy jahazliri körgezmisige seldek aqmaqta» serlewhilik xewiride, töwendiki ibarilerge orun ajratti: «xelqara istanbul öy jahazliri körgezmisi bashlandi. 31 – yanwarghiche dawamlishidighan körgezme 15 ming chet ellik xéridarning kélishini kütmekte. körgezmige eng köp iranliqlarning kélishi diqqet qozghidi. uda 12 yildin buyan her yili ötküzülüwatqan körgezmige 524 shirket ishtirak qilmaqta. körgezmidiki eng qimmet bahaliq öy jahazi bolsa 2 ayda pütken, 300 ming dollar qimmitidiki égizliki 3 métir kélidighan qazaq bürküti chüshürülgen texttur.»
«‹sabah› géziti», «osmanli ellamisi matraqchi nasuh» serlewhilik xewiride, töwendiki mezmunlargha orun ajratti: «matraqchi nasuh alim, tarixshunas, tenterbiyechi, matématikchi, ressam, xettat we mikrolitrazhliq senetkaridur. bu ellame senetkarni tonushturush meqsitide istanbulda ötküzülgen ‹16 – esirde yashap ötken ellame matraqchi nasuh› körgezmisi muhim purset sunmaqta. körgezme 30 – yanwarghiche dawamlishidu. körgezmide matraqchining penjirisidin istanbul, baghdad, tebriz, heleb, diyarbaqir, bélgrad we firansiye sheherlirining 400 yil burunqi menzirilirini körüsh mumkin.»
«‹höriyet› géziti», «yémek - ichmek shirketlirining kölin sepiri» serlewhilik xewiride, töwendiki bayanlargha orun ajratti: «türkiyediki shakilat péchine we pirozhne shirketliri dunya boyiche eng katta pirozhne we péchine körgezmisi dep atalghan 2016 – yilliq shakilat, pirozhne we péchine körgezmisige teyyarlanmaqta. türkiyediki dangliq 70 shirket 31 – yanwardin 3 – féwralghiche gérmaniyening kölin shehiride ötküzülidighan körgezmide türkiyening özige xas mehsulatlirini xéridarliri bilen uchrashturidu.»
