türkiye bilen qazaqistanning soda munasiwiti barghanche kücheymekte

énérgiye we tebiiy bayliqlar ministiri fatih dönmez türkiye bilen qazaqistan arisidiki soda omumiy sommisini ashurushning ehmiyitini tekitlep ötti.

türkiye bilen qazaqistanning soda munasiwiti barghanche kücheymekte

türkiye awazi radiyosi xewiri: énérgiye we tebiiy bayliqlar ministiri fatih dönmez, türkiye bilen qazaqistan arisidiki soda sommisini bir nechche yil ichide 10 milyard dollargha yetküzüshni nishan qilghanliqlirini éytti.

fatih dönmez enqerede chaqirilghan türkiye-qazaqistan sélinma munbiride: soda sommisini 10 milyard dollargha yetküzüsh üchün soda munasiwitimizni téximu kücheytishimiz kérek, dédi.

yéqinqi mezgillerde türkiye bilen qazaqistanning birlikte yolgha qoyup kéliwatqan aktip tashqi siyasitining dunya tinchliqi üchün muhim ehmiyetke ige ikenlikini alahide eskertip ötken dönmez mundaq dédi: «rayonimizning amanliqi we bayashatliqi üchün astana we istanbulda dawamlishiwatqan muzakiriler türkiye bilen qazaqistanning zor tirishchanliqlirining ipadisidur. ortaq tarix we yiltizdin kelgen türkiye bilen qazaqistan arisidiki munasiwet özge döletler arisidiki munasiwetlerge qarighanda téximu küchlük.»

qazaqistandiki türk karxanchilirining sélinma sommisining 3 milyard 200 milyon dollargha yetkenlikini éytqan dönmez, rusiye we xitaydin qalsa türkiyening qazaqistanda eng köp sélinmisi bolghan 3-dölet ikenlikini eskertti.

fatih dönmez türk shirketlirining qazaqsitanda télégraftin bankichiliq we pul-muamilegiche, énérgiyedin ayrodurum bashqurushqiche bolghan nurghun sahege meblegh salghanliqini, qazaqistan pirézidénti nursultan nezerbayéwning rehberlikide qazaq xelqining ulughwar nishanlargha qarap ilgiriwatqanliqini tekitlidi.

fatih dönmez türkiyening dölet we xususiylar igiliki saheside mol tejribisi barliqini, bu tejribini qazaqistanning alaqidar orun we shexsliri bilen ortaqlishishqa teyyar ikenlikini éytti.

dönmez qazaqistanning türkiyede texminen 170 milyon dollarliq  sélinmisi barliqinimu eskertip mundaq dédi: «türkiye karxanchilargha köplep purset we imtiyaz yaritip bermekte. bügün bu jayda türkiye bilen qazaqistan arisida 1 milyard 700 milyon dollar qimmitide 18i soda bolup jemiy 22 kélishimning imzalinishigha shahit bolimiz. qazaqistan pirézidénti nursultan nezerbayéwning ziyariti türtkiside bu  kélishimlerge yéngi layiheler qoshulup  munasiwitimizning téximu küchiyishini arzu  qilimiz. »


خەتكۈچ: énérgiye , türkiye , qazaqistan

مۇناسىۋەتلىك خەۋەرلەر