түркийә билән қазақистанниң сода мунасивити барғанчә күчәймәктә

енергийә вә тәбиий байлиқлар министири фатиһ дөнмәз түркийә билән қазақистан арисидики сода омумий соммисини ашурушниң әһмийитини тәкитләп өтти.

түркийә билән қазақистанниң сода мунасивити барғанчә күчәймәктә

түркийә авази радийоси хәвири: енергийә вә тәбиий байлиқлар министири фатиһ дөнмәз, түркийә билән қазақистан арисидики сода соммисини бир нәччә йил ичидә 10 милйард долларға йәткүзүшни нишан қилғанлиқлирини ейтти.

фатиһ дөнмәз әнқәрәдә чақирилған түркийә-қазақистан селинма мунбиридә: сода соммисини 10 милйард долларға йәткүзүш үчүн сода мунасивитимизни техиму күчәйтишимиз керәк, деди.

йеқинқи мәзгилләрдә түркийә билән қазақистанниң бирликтә йолға қойуп келиватқан актип ташқи сийаситиниң дунйа тинчлиқи үчүн муһим әһмийәткә игә икәнликини алаһидә әскәртип өткән дөнмәз мундақ деди: «районимизниң аманлиқи вә байашатлиқи үчүн астана вә истанбулда давамлишиватқан музакириләр түркийә билән қазақистанниң зор тиришчанлиқлириниң ипадисидур. ортақ тарих вә йилтиздин кәлгән түркийә билән қазақистан арисидики мунасивәт өзгә дөләтләр арисидики мунасивәтләргә қариғанда техиму күчлүк.»

қазақистандики түрк карханчилириниң селинма соммисиниң 3 милйард 200 милйон долларға йәткәнликини ейтқан дөнмәз, русийә вә хитайдин қалса түркийәниң қазақистанда әң көп селинмиси болған 3-дөләт икәнликини әскәртти.

фатиһ дөнмәз түрк ширкәтлириниң қазақситанда телеграфтин банкичилиқ вә пул-муамиләгичә, енергийәдин айродурум башқурушқичә болған нурғун саһәгә мәбләғ салғанлиқини, қазақистан пирезиденти нурсултан нәзәрбайевниң рәһбәрликидә қазақ хәлқиниң улуғвар нишанларға қарап илгириватқанлиқини тәкитлиди.

фатиһ дөнмәз түркийәниң дөләт вә хусусийлар игилики саһәсидә мол тәҗрибиси барлиқини, бу тәҗрибини қазақистанниң алақидар орун вә шәхслири билән ортақлишишқа тәййар икәнликини ейтти.

дөнмәз қазақистанниң түркийәдә тәхминән 170 милйон долларлиқ  селинмиси барлиқиниму әскәртип мундақ деди: «түркийә карханчиларға көпләп пурсәт вә имтийаз йаритип бәрмәктә. бүгүн бу җайда түркийә билән қазақистан арисида 1 милйард 700 милйон доллар қиммитидә 18и сода болуп җәмий 22 келишимниң имзалинишиға шаһит болимиз. қазақистан пирезиденти нурсултан нәзәрбайевниң зийарити түрткисидә бу  келишимләргә йеңи лайиһәләр қошулуп  мунасивитимизниң техиму күчийишини арзу  қилимиз. »



مۇناسىۋەتلىك خەۋەرلەر