nezerbayéw: qazaqistanning latin élipbesige ötüshi bashqa tillargha tesir körsetmeydu

qazaqistan pirézidénti nursultan nezerbayéw, kiril élipbesidin latin élipbesige ötüshning rusche sözlishidighanlargha, rus tili we bashqa tillargha tesir körsetmeydighanliqini éytti.

nezerbayéw: qazaqistanning latin élipbesige ötüshi bashqa tillargha tesir körsetmeydu

türkiye awazi radiyosi xewiri: pirézidént nursultan nezerbayéw, dölitining latin élipbesige ötüshi musapisi bilen munasiwetlik bir yighinda söz qilip, latin élipbesige ötüshning tarixiy ehmiyetke ige ikenlikini eskertken halda, «dunyada héchbir dölet xelqi bilen yéngi élipbesi toghrisida bizchilik bes – munazire qilip baqmidi. hemmining pikrini bilish biz üchün muhimdur» dégenlerni qeyt qildi.

nursultan nezerbayéw, latin élipbesige ötüsh toghrisida 300 din artuq teklip tapshurup élinghanliqini bildürüp, «yashlarningmu bu musapini qollap – quwwetlishi bizge jasaret béghishlimaqta» dédi.

latin herplik qazaq élipbesi layihesige alaqidar bes – munazirilerge aldinqi qatardiki dölet organliri we ilim ehliliriningmu aktip awaz qoshqanliqini bildürgen nezerbayéw, pilanning tüzülüshide dunyaning tejribilirining nezerge élinghanliqini tilgha élip ötti. u, til sahesidiki islahatning bashqa tillarning güllinishige, tereqqiyatigha ziyan yetküzmesliki we kishilik hoquqni depsende qilmasliqi kéreklikini tekitlep, «qazaq élipbesining latin élipbesige ötüshi herqandaq ehwalda rusche sözlishidighan kishilerning, rus tili we bashqa tillarning heq – hoquqlirigha tesir körsetmeydu. rus tili oxshashla ishlitilishni dawamlashturidu. yéngi élipbege ötüsh qazaq tilining öginilishige qolayliq yaritip béridu.» dédi.

kiril élipbesidin latin élipbesige ötüshke teyyarliniwatqan qazaqistan, 2018 – yilidin bashlap derslik kitablirini latin élipbesi boyiche bésishni pilanlimaqta.

qazaqistan pirézidénti nursultan nezerbayéw buningdin ilgiri bayanat bérip, 2025 – yilighiche pütkül kitablarni, qerellik neshriy efkarlar we resmiy höjjetlerni latin élipbeside tarqitishni pilanlawatqanliqlirini élan qilghanidi.



مۇناسىۋەتلىك خەۋەرلەر