нәзәрбайев: қазақистанниң латин елипбәсигә өтүши башқа тилларға тәсир көрсәтмәйду

қазақистан пирезиденти нурсултан нәзәрбайев, кирил елипбәсидин латин елипбәсигә өтүшниң русчә сөзлишидиғанларға, рус тили вә башқа тилларға тәсир көрсәтмәйдиғанлиқини ейтти.

нәзәрбайев: қазақистанниң латин елипбәсигә өтүши башқа тилларға тәсир көрсәтмәйду

түркийә авази радийоси хәвири: пирезидент нурсултан нәзәрбайев, дөлитиниң латин елипбәсигә өтүши мусаписи билән мунасивәтлик бир йиғинда сөз қилип, латин елипбәсигә өтүшниң тарихий әһмийәткә игә икәнликини әскәрткән һалда, «дунйада һечбир дөләт хәлқи билән йеңи елипбәси тоғрисида бизчилик бәс – муназирә қилип бақмиди. һәмминиң пикрини билиш биз үчүн муһимдур» дегәнләрни қәйт қилди.

нурсултан нәзәрбайев, латин елипбәсигә өтүш тоғрисида 300 дин артуқ тәклип тапшуруп елинғанлиқини билдүрүп, «йашларниңму бу мусапини қоллап – қуввәтлиши бизгә җасарәт беғишлимақта» деди.

латин һәрплик қазақ елипбәси лайиһәсигә алақидар бәс – муназириләргә алдинқи қатардики дөләт органлири вә илим әһлилириниңму актип аваз қошқанлиқини билдүргән нәзәрбайев, пиланниң түзүлүшидә дунйаниң тәҗрибилириниң нәзәргә елинғанлиқини тилға елип өтти. у, тил саһәсидики ислаһатниң башқа тилларниң гүллинишигә, тәрәққийатиға зийан йәткүзмәслики вә кишилик һоқуқни дәпсәндә қилмаслиқи керәкликини тәкитләп, «қазақ елипбәсиниң латин елипбәсигә өтүши һәрқандақ әһвалда русчә сөзлишидиған кишиләрниң, рус тили вә башқа тилларниң һәқ – һоқуқлириға тәсир көрсәтмәйду. рус тили охшашла ишлитилишни давамлаштуриду. йеңи елипбәгә өтүш қазақ тилиниң өгинилишигә қолайлиқ йаритип бериду.» деди.

кирил елипбәсидин латин елипбәсигә өтүшкә тәййарлиниватқан қазақистан, 2018 – йилидин башлап дәрслик китаблирини латин елипбәси бойичә бесишни пиланлимақта.

қазақистан пирезиденти нурсултан нәзәрбайев буниңдин илгири байанат берип, 2025 – йилиғичә пүткүл китабларни, қәрәллик нәшрий әфкарлар вә рәсмий һөҗҗәтләрни латин елипбәсидә тарқитишни пиланлаватқанлиқлирини елан қилғаниди.



مۇناسىۋەتلىك خەۋەرلەر