өзбекистан аракан мусулманлири тоғрисида байанат елан қилди

өзбекистан, бирма даирилирини аракан мусулманлириға йүргүзүлүватқан зораванлиқ вәқәлирини тохтитишқа чақирди.

өзбекистан аракан мусулманлири тоғрисида байанат елан қилди

түркийә авази радийоси хәвири: өзбекистан ташқи ишлар министирлиқи байанат елан қилип, бирмадики вәзийәтниң, болупму аракан мусулманлири дучар болуватқан зораванлиқ вәқәлириниң өзбекистанда әндишә йаратқанлиқини билдүрди.

өзбекистанниң дунйа кишилик һоқуқ хитабнамиси вә б д т  да көрситилгән пиринсиплар билән ислам һәмкарлиқ тәшкилатиниң нишан вә вәзипилирини чиқиш қилған һалда, һәр түрлүк зораванлиқ қилмишлирини әйибләйдиғанлиқи әскәртилгән байанатта, «бирма һөкүмитини, бигунаһ мусулманларға йүргүзүлүватқан зораванлиқ вәқәлиригә хатимә берилиши, зораванлиқ вәқәлириниң алдиниң елиниши вә сақлиниватқан мәсилиниң пәқәт тинч усуллар билән һәл қилиниши үчүн зөрүр болған барлиқ чарә – тәдбирләрни йолға қойушқа чақиримиз» дегән ибариләргә орун берилди.

байанатта йәнә, өзбекистан һөкүмитиниң араканлиқ мусапирларниң еһтийаҗлирини қамдаш үчүн йардәм әшйалирини йоллашни қарар қилғанлиқиму қәйт қилинди.

бирма армийәсиниң қораллиқ милитаристларға қарши күрәш қилидиғанлиқини илгири сүрүп, аракандики пуқраларға қаратқан 25- авғусттин буйанқи һуҗумлирида миңларчә мусулман һайатидин айрилди. бирма даирилири, районға кириш – чиқишларға рухсәт қилмиғанлиқи үчүн, һазирчә өлгән пуқралар санини толуқ ениқлап чиқиш имканийити йоқ.

армийә билән милләтчи буддистларниң һуҗумлирида 150 дин артуқ йеза вәйран қилип ташланди. он миңларчә араканлиқ мусулман һайати бихәтәрликини нәзәрдә тутуп райондин қечишқа тиришмақта.

бирмадин қачқан пуқралар тағлиқ районлар, наф дәрйаси йаки деңиз йоли арқилиқ баңладиш тәрәпкә өтмәктә.



مۇناسىۋەتلىك خەۋەرلەر