istanbuldiki aliy rehberler yighini we süriye

tetqiqatchi jan ajunning témigha munasiwetlik analizi

istanbuldiki aliy rehberler yighini we süriye

istanbul aliy rehberler yighini we süriye

istanbulda firansiye, gérmaniye, rusiye we türkiye qatarliq döletler aliy rehberler yighini ötküzdi. yighinda süriyede tinchliq berpa qilish üchün asasiy qanun komitéti qurushqa oxshash muhim qararlar chiqirildi. yighinda süriye toghruluq muhim qararlar chiqirilghan bolsimu, lékin süriyede yenila weziyet jiddiy halette turmaqta. süriye-iraq chégrasida daésh we y p g térrorluq teshkilatliri otturisida toqunush yüz bermekte, süriye-türkiye chégrasi liniyeside y p g térrorchiliri pat-pat türkiye terepke oq chiqirip türkiyeni aware qilmaqta, türkiye armiyesi y p g térrorchilirining bazilirini bombardiman qilmaqta, idlib rayonidiki her qaysi guruhlar otturisida toqunush yüz bermekte. bu ehwallar süriyede tinchliq berpa qilishning unchiwéla asan emeslikini we nurghun xizmetlerni ishlesh lazimliqini körsiitp béridu.

istanbulda körüshken 4 döletning rehberliri süriyede tinchliq berpa qilish üchün muhim qararlarni chiqardi. uzundin buyan kéngesh qilip kéliniwatqan süriye asasiy qanun komitéti qurup chiqish pilanining bu qétimqi yighinda küntertipke kélishi süriyening kelgüsige melum derijide tesir körsitidu. yéngi asasiy qanun tüzüp chiqish pilani süriyede tinchliq berpa qilish üchün muhim qedem hésablanmisimu, lékin süriye mesilisini tüptin hel qilalmaydu. asasiy qanun tüzüp chiqilghandin kéyin süriye xelqining awazigha qoyulidu, lékin buni ishqa ashurush unchiwéla asan emes. milyonlarche süriyelik hélihem özge diyarlarda yashimaqta, yene milyonlarche süriyelik yurt-makanlirini tashlap özge memliketlerge köchüp ketti, uning üstige esed hakimiyiti süriye xelqige pasport bérishni toxtiwetti, bu qiyinchiliqlar süriyede yéngi asasiy qanunni el rayigha sinash paaliyitining ongushluq élip bérilishida zor tosalghularni peyda qilidu. istanbulda chaqirilghan aliy rehberler yighinida yene, idlibte oq chiqirishni toxtitish kélishimini dawamlashturush, térrorchilargha qarshi izchil herbiy-heriket élip bérish qatarliq mesliler üstidimu pikir birliki hasil qilindi. derweqe, p y g térrorluq teshkilatidek süriyening zémin pütünlikige tehdit shekillendürüwatqan guruhlargha zerbe bérish xizmetliride türkiye zor netijige érishti.

emdi süriyening weziyitide meydangha kelgen özgirishlerge qaytip kéleyli: süriye-iraq chégrasida y p g bilen daésh térrorluq teshkilatliri  otturisida toqunush yüz bérip kelmekte. y p g térrorluq teshkilati amérika, italiye we firansiyege oxshash döletlerning yantayaq bolushi arqisida, yene bir térrorluq teshkilati daéshning changgilidiki hajin liniyesige birnechche ay ilgiri hujum qozghidi. rayonda meydangha kelgen boran-chapqun apitidin paydilanghan daésh, y p g térrorchiliri nechche ay urunup aran qolgha kirgüzgen rayonni bir nechche kün ichidila tartiwaldi. daéshning melum derijide küchiyishige egiship, daésh térrorchiliri qaytidin iraq chégrasigha yéqinlap keldi, iraq dairiliri daéshning hujumigha qarshi bezi tedbirlerni aldi, hashdi shabi küchliri bolsa rayongha ewetildi. daéshning küchiyishige qarita, rayongha zapas qoshun ewetken y p g térrorchiliri xelqaraning yardimige ériship turupmu daéshning ilgirilishige tosalghu bolalmidi. daéshqa qarshi küresh qilishni bahane qilip, salahiyitini qanunluq qiliwalghan y p g teshklatining daéshni toluq yoq qilish niyitining bar yoqliqini bilish tolimu tes, hetta  y p ning bundaq niyitining barliqi gumanliq.

süriyening sherqiy jenubida y p g térrorluq teshkilati bilen daésh otturisida yüz bergen toqunushlarda y p g térrorchliri nisbeten passip orun chüshüp qaldi, daésh üstünlikni igilidi. daéshtin zerbe yigen y p g térrorchiliri süriyede shimalida türkiye eskerlirige kichik kölemde hujum qozghap kelmekte, türkiye armiyesi bolsa p y g térrorchilirigha tewe bazilarni bombardiman qilmaqta. eyn el erebning gheribidiki chégra liniyesidiki töpiliklerde türkiyege tehdit shekillendürüwatqan y p g qoralliq küchlirige, türkiye topchi qismi éghir zerbilerni bermekte. buningdin sirt, tal abyad chégra liniyeside türkiye eskerliri bilen y p g térrorchiliri otturisida toqunush yüz berdi. etisi tekrar eyn el erebning gheribide hujum nishani qilinghan y p g baziliridin türkiye chégrasidiki herbiy mashinilargha tankaatarlar étildi. y p g térrorchiliri bu qétimqi hujumini körünüshke élip tarqatti. bu hadisilerdin kéyin, y p g ning hajin rayonida daéshqa qarshi élip barghan hujumini, türkiyening bombardimanliri sewebidin toxtatqanliqini jakarlishi, emeliyette y p g ning daéshni pilani we meqsiti dairiside wastige aylanduruwalghanliqini körsitip béridu.

idlibtimu yéngi özgirishler meydangha keldi. sochi kélishimi türtkiside idlibning hujumgha uchrash éhtimali töwenlidi, hetta yoq boldi. ötken hepte idlib rayonida heyet tehrir ush-sham térrorluq teshklati bilen nureddin zengi qoralliq küchliri otturisida toqunush yüz berdi. süriyelik öktichilerning heyet tehrir ush shamgha qarshi élip barghan hujumlirining uzun dawamlishishi, idlib rayonining weziyitining tolimu murekkep ikenlikini körsitip béridu. süriyede tinchliq berpa qilish üchün idlibte uzun muddetlik oq chiqirishni toxtitishni ishqa ashurush tolimu muhimdur.


خەتكۈچ: süriye , türkiye , térrorluq

مۇناسىۋەتلىك خەۋەرلەر