«utqanda gérmaniyelik, utturuwetkende köchmen»

tetqiqatchi jan ajunning témigha munasiwetlik analizi

«utqanda gérmaniyelik, utturuwetkende köchmen»

«utqanda gérmaniyelik, utturuwetkende köchmen»

yawropada irqchiliq we islam endishisi hadisiliri barghanche omumlashmaqta. yawropa ittipaqining ghol küchliridin bolghan gérmaniyede, natsist sotsiyalist partiyesi höküm sürgen dewirdikige oxshash keypiyat bash kötürüshke bashlidi. irqchiliq we islam endishisi hadisiliri normal haletke kéliwatqan gérmaniyede yüz bergen mesut özil setchiliki we  uning gérmaniye döletlik putbol komandisidin ayrilip chiqishi irqchiliq we islam endishisi hadisilirining qanchilik éghirliqini körsitip béridu.

mesut özilning jumhur reis rejep tayyip erdoghan bilen engliyede birlikte resimge chüshüshi gérmaniye taratquliri we gérmaniyediki siyasetchiler teripidin gérmaniye jemiyitide dunya longqisidin ilgiri mesilige aylanduruldi. eslide mesut özil 2010-yildin buyan jumhur reis rejep erdoghan bilen her körüshkende xatire resimge chüshüp kéliwatqanidi, biraq bu qétim mesut özil irqchilarning hujum nishanigha aylandi. irqchilar mesud özilge haqaret qilish bilenla boldi qilmay tehdit sélishti, mesut özil irqchilarning bu qilmishlirigha süküt qildi, gérmaniye putbol fédratsiyesi bashliqi réyinhard girindél mesut özilni jumhur reis rejep tayyip erdoghan bilen resimge chüshkenliki üchün kechürüm sorashqa qistidi, mesut özilning sewr qachisi toshti we buni qetiy ret qildi.

gérmaniye döletlik putbol komandisining bu yilqi dunya longqisida shallinip kétishige qarita pütkül gérmaniye taratquliri gérmaniyening shallinip kétish xewirini mesut özilning resimi bilen birlikte tarqitishi we gérmaniye putbol fédratsiyesi bashliqi réyinhard girindélning gérmaniye döletlik putbol komandisining dunya longqisidin shallinip kétishidin mesut özilning mesul ikenlikini jakarlishi qatarliqlar mesut özilni ghezeblendürdi. derweqe, mesut özil jumhur reis rejep tayyip erdoghan bilen resimge chüshüshtin ilgiri ömre ibaditini ada qilish üchün mekkige barghanda chüshken resimlirini ijtimaiy taratqularda ortaqlishishi sewebidinmu éghir haqaret we hujumlargha duchar bolghanidi.

mesut özil sükütini buzup bayanat bérishke mejbur boldi. eslide mesut özilning zor jasaret bilen twittér adrésida inglizche élan qilghan bayanati gérmaniyede irqchiliq we islam endishisi hadisilirining qaysi sewiyege bérip yetkenlikini körsitip béridu. mesut özil mundaq yazdi: «ghelibe qilghanda gérmaniyelik bolimen, utturup qoyghanda köchmen...»mesut özil bu qétimi  bayanati bilen musulmanlarning ikkinchi muhemmed elisi bolghanidi. gérmaniye bolupmu gérmaniye putbol fédratsiyesini qattiq tenqid qilghan mesut özil, gérmaniyede yashawatqan türk we musulmanlarning qelb sadisigha terjima boldi.

mesut özil bayanatida gérmaniyediki irqchliq, tengsiz muamile we qosh bisliq ölchemlerni tenqid qilip, özining hem türkiye üchün hemde gérmaniye üchün soqup turidighan qelbining barliqini tekitlidi. mesut özilning jumhur reis rejep tayyip erdoghan bilen chüshken resimge adaqqiche ige chiqishi we gérmaniye üchün qolgha keltürgen zor utuqlirining eksiche irqchi hujumlargha duch kélishini dadilliq bilen tilgha élishi emeliyette gérmaniyede yashawatqan türklerning hés-tuyghulirini ashkarilap béretti. gérmaniyede yashawatqan türkler ijtimaiy taratqularda mesut özilni qehriman élan qilishti.

mesut özilning bayanati gérmaniyediki türkler we musulmanlarning qelb sadalirini yangritip ularning hés-tuyghulirigha wekillik qilghan bolsimu, néme üchün bir putbolchi we parlamént ezasining türk we musulmanlarning hés-tuyghulirigha wekillik qilalmasliqi kishini oylanduridu. gérmaniye parlaméntidiki  türk parlamént ezaliri we gérmaniyediki siyasiy partiyelerning türk we musulmanlargha  toluq wekillik qilalmasliqi we ularning derdige bolalmasliqi gérmaniyege nisbeten chong mesililerdin biri hésablinidu. bir tereptin gérmaniyede irqchiliq we islam endishisi hadislirining bash kötürüshi yene bir tereptin gérmaniyediki türkler we musulmanlargha wekillik qilidighan birmu parlamént ezasi bolmasliqi kishini heqiqeten epsuslanduridu.

gérmaniyediki bu zitliq sewebidin gérmaniyede yashawatqan türkler we musulmanlarning heq-hoquqlirini qoghdash we ulargha ishench bérish üchün türkiye gérmaniyede aktip siyaset yolgha qoyushi kérek. türkiye gérmaniye jemiyitide nopuzini hés qildurup gérmaniyediki türkler we musulmanlar üchün xizmet qilsa gérmaniyediki türkler we musulmanlar jasaretlinidu we achchiq heqiqetlerni dadilliq bilen jakarliyalaydighan minglarche mesut özil chiqidu. türkiye gérmaniyede aktip siyaset yolgha qoyalmighan teqdirde, gérmaniyediki türkler we musulmanlar irqchiliq we islam endishisi yamrap ketken gérmaniye jemiyitide yashashqa mejbur bolidu.



مۇناسىۋەتلىك خەۋەرلەر