türkiyening süriyediki taktikliri

tetqiqatchi jan ajunning témigha munasiwetlik analizi

türkiyening süriyediki taktikliri

türkiyening süriyediki taktikliri

süriyediki toqunushni peseytish we terepler arisida tinchliq berpa qilish üchün qurulghan astana mixanizmisi wezipisini melum derijide ada qilip kéliwatidu. türkiye, rusiye we iran hamiyliqida dawamlishiwatqan bu mixanizma dairiside békitilgen sürkilishni peseytish rayonlirigha süriye hakimiyiti, iran we rusiye izchil hujum qoghap keldi we bu rayonlarni qolgha kirgüzüwaldi, netijide idlibning istiratégiyelik orni biraqla yuqiri kötürüldi.  idlibning bashqa sürkilishni peseytish rayonlirigha qarighanda biwaste türkiyege chégralinishi türkiyening qolidiki kozurni téximu kücheytti. esed qisimlirining qorshawi astida turuwatqan rayonlardiki öktichiler idlib we firat qalqini herbiy herikiti élip bérilghan rayonlargha kélip orunlashti, netijide idlib öktichilerning qelesige aylandi. idlib waqitning ötüshige egiship bashqa toqunushni peseytish rayonliridin perqliq halgha kelmekte, türkiyening 12, rusiyening 10, iranning 7 közitish nuqtisi bolghan idlibte toqunush yoq déyerlik. bolupmu türkiye teripidin berpa qilinghan közitish nuqtiliri türtkiside esed hakimiyiti süriyelik öktichilerge hujum qilalmaydighan weziyet shekillendi.

türkiyening idlibtiki közitish nuqtiliri bezi jehetlerdin paydiliq bolghan bolsimu, bezi jehetlerdin qiyinchiliqlarni tughdurmaqta. türkiye bir tereptin chégradin rayongha biwaste her türlük lazimetliklerni asanla yötkiwatqan bolsa, yene bir tereptin rayondiki qalduq térrorchilar we esed qisimlirining tehditi seweblik  türkiyening rayonda tinchliqni berpa qilish xizmetliri melum derijide ongushsizliqqa uchrimaqta.  bir qétim türkiye eskerliri rayongha türlük lazimetliklerni yötkewatqanda toxtitip qoyulghan bir aptomobilning partlap kétishi sewebidin ziyan kélip chiqqanidi, buningdin tashqiri, esed qisimliri we iran yantayaq bolup kéliwatqan shie qoralliq unsurliri pat-pat türkiye eskerlirige xiris qilidighan ishlarmu yüz bérip turdi. türkiyening süriyediki toqunushlargha xatime bérish üchün eskerlirini aldinqi sepke orunlashturushi emeliyete türkiyening rayondiki urushni toxtitish nyiiti we iradisining roshen ipadisi bolup hésablinidu.

türkiye bir tereptin astana söhbetliri arqiliq esed hakimiyiti we süriye öktichiliri arisidiki urushni toxtitip insanlarning jeng sewebidin ölüp kétishige xatime bérip, terepler arisida muzakire ötküzüshke sharait yaritip bériwatqan bolsa, yene bir tereptin süriyediki qalaymiqanchiliqtin paydilinip kéliwatqan térrorchilargha zebe bérishni dwamlashturmaqta. firat qalqini herbiy herikitini élip bérish arqiliq daésh térrorchilirini türkiye chégrasidin qoghlap chiqarghan türkiye armiyesi, uzun ötmeyla afrin rayonini p k k – y p g  térrorchiliridin teltüküs tazilidi. türkiyening her ikkili herbiy herikette yerlik öktichi küchler bilen hemkarliq ornitishi hem türkiyening rayondiki nopuzini hemde türkiyening rayonda mustemlikchi küch emeslikini körsitip béridu. türkiye süriyede bir tereptin tinchliq we amanliqning berpa qilish üchün zor küch chiqirip kéliwatqan bolsa, yene bir tereptin térrorchilargha zerbe bérish kürishini élip bérish arqiliq özining dölet bixeterlikini qoghdimaqta. derweqe, firat qalqini herbiy herikitidin kéyinla daésh térrorchilirining türkiyege qaratqan hujumliri roshen derijide azaydi. oxshashla, zeytun shéxi herbiy herikitidin kéyinmu hatay we amanos taghliridiki p k k térrorchilirining hujumliri körinerlik peseydi.

lékin türkiyening térrorluq teshkilatlirigha zerbe bérish heriketliri bashqa rayonlarda izchil dawamlashmaqta. iraqtiki zerbe bérish heriketliridin sirt, süriyening shimalidiki p k k –y p g térrorchilirighimu qattiq zerbe bérilmekte. amérikining térroluq teshkilati y p g gha yantayaq bolup kélishi sewebidin rayondiki térrorizimgha zerbe bérish heriketliri melum derijide cheklimige uchrash bilen birge, türkiyening dölet xewpsizlikimu tehditke yoluqmaqta. türkiye bilen amérika arisida térrorluq teshkilati y p g we munbich rayonining kelgüsi qatarliq mesililer uzundin buyan muzakire témiliri bolup kelmekte. amérika munbichni qolgha kirgüzüwalghanda türkiyege térrorluq teshkilati y p g ning rayondin chékinip chiqishi toghrisida wede bergenidi, biraq amérikining wediside turmasliqi sewebidin natoning ittipadéshi bolghan bu ikki dölet arisida sürkilish peyda boldi. amérikining sabiq tashqi ishlar ministiri réks tillérsonning türkiyege kélip munbich mesilisini tashqi ishlar ministiri mewlüt chawushoghlu bilen muzakire qilishi netijiside pirinsip jehette ikki dölet arisida birdeklik hasil boldi. lékin donald trampning réks téllérsonni wezipisidin élip tashlap ornigha mayk pompyéoni teyinlinishi bilen weziyet özgerdi. türkiye tashqi ishlar ministiri mewlüt chawushoghlu bayanat bérip, türkiye bilen amérika arisida munbich mesiliside layihe kélishimi hasil qilinghanliqini, mezkur layihe kélishimining tepsilatlirining pat yéqinda élan qilinidighanliqini bildürdi. chawushoghluning bu bayanatidin kéyin yerlik menbelerning bildürüshiche, y p g qoralliq unsurliri rayonni tashlap kétish üchün teyyarliq qilishqa kiriship ketken. türkiye bilen amérika arisidiki kélishim dairiside y p g térrorluq teshkilati munbichni tashlap firatning sherqige ketti, türkiye bilen amérika bolsa rayonning bixeterlikini saqlash mesul boldi we ikki dölet birlikte munbichning yerlik hakimiyitini we saqchi qisimlirini békitip chiqti. türkiye bilen amérika arisida munbich mesiliside birdeklik hasil qilinghan bolsimu, firatning sherqide  y p g térrorluq teshkilatining mewjut bolup turushi ikki dölet arisida süriyeni chöridigen mesililerning pat yéqinda tügimeydighanliqini körsitip béridu. biraq munbichte türkiye we amérika birlikte heriket qilishi ikki dölet arisidiki alaqini, kordinatsiyeni we ishenchini ashuridu. munbichta kélishim hasil qilghan bu ikki dölet süriyening bashqa rayonliridimu kélishim hasil qilalashi mumkin.


خەتكۈچ: amérika , türkiye , daésh , süriye

مۇناسىۋەتلىك خەۋەرلەر