allahning ibaditidin bash tartqan kishi sheytangha ibadet qilidu

türkiye awazi radiyosi: nisa sürisi, 114 – 121 - ayetler. ularning yoshurun söhbitiining tolisida xeyriyet yoqtur. peqet sediqighe yaki yaxshiliqqa yaki kishilerni epleshtürüshke emir qilghan kishiler (ning yoshurun söhbiti) buningdin mustesna. kimki u (ish) larni allahning raziliqini tilesh yüzisidin qilidiken, uninggha büyük ejir ata qilimiz[114]. kimki özige (möjiziler arqiliq) toghra yol éniq bolghandin kéyin, peyghemberge (yeni uning emrige) muxalipetchilik qilidiken, möminlerning yolidin gheyriyge egishidiken, uni öz yoligha qoyup bérimiz, uni (axirette) jehennemge kirgüzimiz, jehennem némidégen yaman jay![115]. allah özige birer nersining shérik keltürülüshini (yeni mushriklik gunahini) elwette meghpiret qilmaydu, buningdin bashqini (allah özi) xalighan ademge meghpiret qilidu, kimki allahqa shérik keltüridiken, u heqiqeten qattiq azghan bolidu[116]. ular (yeni mushriklar) allahni qoyup, peqet (özliri) chishi (namlar bilen atiwalghan) butlargha ibadet qilidu, peqet allahning ibaditidin bash tartqan sheytangha ibadet qilidu[117]. allah sheytanni rehmitidin yiraq qildi, sheytan éytti: «men elwette séning bendiliringdin mueyyen sandikilerni igileymen[118]. shundaqla choqum ularni azdurimen, ularni xam xiyal qildurimen (yeni hayat uzun, qiyamet, hésab élish yoq dégendek batil eqidilerni könglige salimen), ularni choqum chahar paylarning (butlargha nezre qilip belge üchün) qulaqlirini yérishqa buyruymen, ularni choqum allahning mexluqatini özgertiwétishke (yeni qullarni axta qilish, ulargha meng oydurushqa oxshash) ishlargha buyruymen». kimki allahni qoyup sheytanni dost tutidiken, u (dunya we axirette) opochuq ziyan tartqan bolidu[119]. sheytan ulargha (yalghan) wedilerni béridu we ularni xam xiyalgha salidu (yeni emelde ishqa ashmaydighan arzularni könglige salidu), sheytan ulargha peqet yalghannila wede qilidu[120]. ene shularning baridighan jayi jehennemdur, ular jehennemdin qachidighan jay tapalmaydu[121].