zulumgha uchrighuchilarning yénida bolush

türkiyening barliq jameliride bir tutash oqulidighan jüme xutbiliri – 36 (awazliq)

zulumgha uchrighuchilarning yénida bolush

zulumgha uchrighuchilarning yénida bolush

 eziz qérindashlar! jüme küninglar mubarek bolsun!

allah taala quran kerimde mundaq deydu:

«hergizmu allah taalani zalimlarning qilmishliridin xewersiz dep oylap qalmighin. allah ularni jazagha tartishni qorqunchtin közliri chekchiyip kétidighan bir künge sozuwatidu» (süre ibrahim 42 – ayet)

peyghember eleyhissalam hedis - sheripte mundaq deydu:

«bir yamanliqni körgen kishi küchi yetken teqdirde uni qoli bilen tüzetsun, buninggha küchi yetmise, tili bilen tüzetsun. buningghimu küchi yetmise, yamanliqqa qelbi bilen qarshi tursun. bu ehwal (yeni qelbi bilen qarshi turush) imanning eng töwen teqezzasidur» (muslim, iman babi 78 – hedis)

eziz qérindashlar!

epsuski islam dunyasi bolush süpitimiz bilen yene qayghuluq bir héytni bashtin kechürduq. qelblirimiz azablinip, közlirimiz yashqa toldi.  héyt shatliqini chin qelbimizdin hés qilalmiduq.  hejning meniwiy muhitighimu toluq menisi bilen shungghiyalmiduq. qurbanliq qilishning hayajanighimu toluq chömilelmiduq. chünki islam dunyasidiki tügimes toqunushlar, zorawanliq we talash – tartishlar yürikimizni puchilashni dawamlashturdi. uning üstige arakandiki musulman qérindashlirimiz duch kelgen zulum – sétem, wehshiyane qetliamlar yürikimizni bolushigha zide qildi. bigunah zulumgha uchrighuchilarning uzaq diyarlardin kötürülgen nale – peryatliri bizni chongqur azabqa gherq qildi.

mana bügünki künde musulmanlar duch kéliwatqan naheqchiliqlar, asassiz böhtanlar, zorawanliq we zulum – sétemler hemmimizni azablimaqta. lékin buningdinmu azabliq bolghini, bu barliq neheqchiliklerge qarshi insanlarning biperwalarche muamile qiliwatqanliqidur. qurulushtiki meqsiti dunyadiki zulum we naheqchiliklerning aldini élish hésablinidighan atalmish organlarning süküt qilip turiwélishidur. bigunah mezlumlarning ershni titritiwatqan peryatlirigha xelqaraning qarighu – gas boluwalghanliqidur. déngiz qirghiqigha jesiti chéqip qalghan bir balina béliqi üchün seperwerlik bashlawatqan insanlarning emdilikte déngiz qirghiqigha jesiti chéqiwatqan kichik balilarni kelgende, körmeske séliwatqanliqidin ibarettur.  insanlarning achliqtin jan bérishige we kichik bala, ayal, moysipit démestin, öy - makanliridin qoghlap chéqirilishigha qarshi insap we wijdanlirining qimir qilmasliqi, jumlidin musulmanlar duch kéliwatqan qetliamlargha bashqilarning közlirini yümüwalghanliqidin ibarettur.

eziz mömin qérindashlar!

ulugh dinimizda bir insanni qetli qilghanliq, pütün insaniyetni qetli qilghanliq bilen oxshash hésablinidu. chünki bizning étiqadimizda insan, insan bolghanliqi üchünla ezizdur. insanning özila allahning bir ayiti bolghanliqi üchün hörmetliktur. insanlarning jéni, étiqadi, mal – mulki we abiroyi chéqilishqa bolmaydighan heqqidur.  héch bir kishi étiqadi tüpeyli insanliq heq – hoquqidin we erkinlikliridin mehrum qaldurulsa bolmaydu. öy – makanliri we yurt – diyarliridin qoghlap chéqirilsa bolmaydu. zorawanliqqa we wehshaniyetke duchar qélishqa téximu bolmaydu. bizning étiqadimizda birawgha zulum qilish uyaqta tursun, hetta zulumgha süküt qilishqimu bolmaydu. meyli sewebi néme bolushidin qetiy nezer, zalimgha yan bésishqa, zulumgha uchrighuchigha yüz örüshke qetiy bolmaydu. peyghember eleyhissalamning töwendiki hedisi, musulmanlarning bu nuqtidiki tüpki pirinsipidur:

 «insanlar bir zalimni körgende,  uning zulmini tosmisa, allahning omumiy yüzlük azabigha duchar bolushi muheqqeqtur» (ebu dawud)

eziz qérindashlar! biz shundaqtimu étiqadimizning teqezzasi boyiche qetiy ümidsizlenmeymiz. biz shuninggha ishinimizki, zalimlar haman bir küni tégishlik jazasini choqum chékidu. bu barliq köngülni ghesh qilidighan ishlar elbette axirilishidu.  biz peqet tarixi boyiche insaniyetke ümid bolghan bir milletning ewladliri bolush süwitimiz bilen ittipaqliq ruhimizni urghutup, zulumgha uchrighuchilargha, mesum we mehrum insanlargha yardem qolimizni sunushni dawamlashturayli. tili, irqiy we yürti néme bolushidin qetiy nezer xuddi ötmüshtikige oxshashla bügünki kündimu zalimgha qarshi turup, zulumgha uchrighuchilarning yénidin orun alayli. yalghuz qalsaqmu «eng katta yardemchimiz allahdur» dégen étiqadimiz bilen zulumning barliq tülirige qarshi kökrek kéreyli! dushmenlerning hemmisi birliship üstimizge kelgen teqdirdimu, eng katta küch – qudritimizning zulumgha uchrighuchilarning dualiri ikenlikini untumaydighan qetiy ang bilen her daim heqqaniyetni heqqige yarisha mudapie qilayli! naheqchilikke hergiz süküt qilip turmayli! «musulmanlarning ehwaligha köngül bölmeydighanlar musulmanlardin emes» (teberani) dégen hedis – sheripning teqezzasi boyiche qérindashlirimizgha ige chéqayli! söyünchimiz we azablirimizni, jumlidin pütün bar – yoqimizni qérindashlirimiz bilen ortaqlishayli!

eziz qérindashlar! undaqta kélinglar, bu ulugh jüme künide ulugh perwerdigarimizgha qolimizni sözüp yélinip - yalwurayli!  

i allahim!  dunyaning her qaysi jaylirida mewjutluqini saqlap qélish üchün mujadile qiliwatqan qérindashlirimizgha rehmiting bilen muamile qilghin! ularni baldurraq qiyinchiliqliridin qutqazghin!  

i alahim! arakan qatarliq dunyaning oxshash bolmighan jaylirida qetliamlar tüpeyli hayatidin ayrilghan qérindashlirimizgha rehmet qilghin! yaridar bolghan qérindashlirimizgha baldurraq shipaliq ata qilghin!

i allahim! pütün insaniyetning wijdani hésablinidighan eziz millitimizdin yardimingni ayimighin!

insaniyetke we islam dunyasigha paraset, besiret, xatirjemlik we birdeklikni nesip qilghin!  bizlerni adimiyliqini unutqanlardin emes, insandek yashiaydighanlardin qilghin! amin!!!!

 


خەتكۈچ: jüme xutbiliri

مۇناسىۋەتلىك خەۋەرلەر