зулумға учриғучиларниң йенида болуш

түркийәниң барлиқ җамәлиридә бир туташ оқулидиған җүмә хутбилири – 36 (авазлиқ)

зулумға учриғучиларниң йенида болуш

зулумға учриғучиларниң йенида болуш

 әзиз қериндашлар! җүмә күниңлар мубарәк болсун!

аллаһ таала қуран кәримдә мундақ дәйду:

«һәргизму аллаһ таалани залимларниң қилмишлиридин хәвәрсиз дәп ойлап қалмиғин. аллаһ уларни җазаға тартишни қорқунчтин көзлири чәкчийип кетидиған бир күнгә созуватиду» (сүрә ибраһим 42 – айәт)

пәйғәмбәр әләйһиссалам һәдис - шәриптә мундақ дәйду:

«бир йаманлиқни көргән киши күчи йәткән тәқдирдә уни қоли билән түзәтсун, буниңға күчи йәтмисә, тили билән түзәтсун. буниңғиму күчи йәтмисә, йаманлиққа қәлби билән қарши турсун. бу әһвал (йәни қәлби билән қарши туруш) иманниң әң төвән тәқәззасидур» (муслим, иман баби 78 – һәдис)

әзиз қериндашлар!

әпсуски ислам дунйаси болуш сүпитимиз билән йәнә қайғулуқ бир һейтни баштин кәчүрдуқ. қәлблиримиз азаблинип, көзлиримиз йашқа толди.  һейт шатлиқини чин қәлбимиздин һес қилалмидуқ.  һәҗниң мәнивий муһитиғиму толуқ мәниси билән шуңғийалмидуқ. қурбанлиқ қилишниң һайаҗаниғиму толуқ чөмиләлмидуқ. чүнки ислам дунйасидики түгимәс тоқунушлар, зораванлиқ вә талаш – тартишлар йүрикимизни пучилашни давамлаштурди. униң үстигә аракандики мусулман қериндашлиримиз дуч кәлгән зулум – сетәм, вәһшийанә қәтлиамлар йүрикимизни болушиға зидә қилди. бигунаһ зулумға учриғучиларниң узақ дийарлардин көтүрүлгән налә – пәрйатлири бизни чоңқур азабқа ғәрқ қилди.

мана бүгүнки күндә мусулманлар дуч келиватқан наһәқчилиқлар, асассиз бөһтанлар, зораванлиқ вә зулум – сетәмләр һәммимизни азаблимақта. лекин буниңдинму азаблиқ болғини, бу барлиқ нәһәқчиликләргә қарши инсанларниң бипәрваларчә муамилә қиливатқанлиқидур. қурулуштики мәқсити дунйадики зулум вә наһәқчиликләрниң алдини елиш һесаблинидиған аталмиш органларниң сүкүт қилип туривелишидур. бигунаһ мәзлумларниң әршни титритиватқан пәрйатлириға хәлқараниң қариғу – гас болувалғанлиқидур. деңиз қирғиқиға җәсити чеқип қалған бир балина белиқи үчүн сәпәрвәрлик башлаватқан инсанларниң әмдиликтә деңиз қирғиқиға җәсити чеқиватқан кичик балиларни кәлгәндә, көрмәскә селиватқанлиқидин ибарәттур.  инсанларниң ачлиқтин җан беришигә вә кичик бала, айал, мойсипит демәстин, өй - маканлиридин қоғлап чеқирилишиға қарши инсап вә виҗданлириниң қимир қилмаслиқи, җумлидин мусулманлар дуч келиватқан қәтлиамларға башқиларниң көзлирини йүмүвалғанлиқидин ибарәттур.

әзиз мөмин қериндашлар!

улуғ динимизда бир инсанни қәтли қилғанлиқ, пүтүн инсанийәтни қәтли қилғанлиқ билән охшаш һесаблиниду. чүнки бизниң етиқадимизда инсан, инсан болғанлиқи үчүнла әзиздур. инсанниң өзила аллаһниң бир айити болғанлиқи үчүн һөрмәтликтур. инсанларниң җени, етиқади, мал – мулки вә абиройи чеқилишқа болмайдиған һәққидур.  һеч бир киши етиқади түпәйли инсанлиқ һәқ – һоқуқидин вә әркинликлиридин мәһрум қалдурулса болмайду. өй – маканлири вә йурт – дийарлиридин қоғлап чеқирилса болмайду. зораванлиққа вә вәһшанийәткә дучар қелишқа техиму болмайду. бизниң етиқадимизда биравға зулум қилиш уйақта турсун, һәтта зулумға сүкүт қилишқиму болмайду. мәйли сәвәби немә болушидин қәтий нәзәр, залимға йан бесишқа, зулумға учриғучиға йүз өрүшкә қәтий болмайду. пәйғәмбәр әләйһиссаламниң төвәндики һәдиси, мусулманларниң бу нуқтидики түпки пиринсипидур:

 «инсанлар бир залимни көргәндә,  униң зулмини тосмиса, аллаһниң омумий йүзлүк азабиға дучар болуши муһәққәқтур» (әбу давуд)

әзиз қериндашлар! биз шундақтиму етиқадимизниң тәқәззаси бойичә қәтий үмидсизләнмәймиз. биз шуниңға ишинимизки, залимлар һаман бир күни тегишлик җазасини чоқум чекиду. бу барлиқ көңүлни ғәш қилидиған ишлар әлбәттә ахирилишиду.  биз пәқәт тарихи бойичә инсанийәткә үмид болған бир милләтниң әвладлири болуш сүвитимиз билән иттипақлиқ руһимизни урғутуп, зулумға учриғучиларға, мәсум вә мәһрум инсанларға йардәм қолимизни сунушни давамлаштурайли. тили, ирқий вә йүрти немә болушидин қәтий нәзәр худди өтмүштикигә охшашла бүгүнки күндиму залимға қарши туруп, зулумға учриғучиларниң йенидин орун алайли. йалғуз қалсақму «әң катта йардәмчимиз аллаһдур» дегән етиқадимиз билән зулумниң барлиқ түлиригә қарши көкрәк керәйли! душмәнләрниң һәммиси бирлишип үстимизгә кәлгән тәқдирдиму, әң катта күч – қудритимизниң зулумға учриғучиларниң дуалири икәнликини унтумайдиған қәтий аң билән һәр даим һәққанийәтни һәққигә йариша мудапиә қилайли! наһәқчиликкә һәргиз сүкүт қилип турмайли! «мусулманларниң әһвалиға көңүл бөлмәйдиғанлар мусулманлардин әмәс» (тәбәрани) дегән һәдис – шәрипниң тәқәззаси бойичә қериндашлиримизға игә чеқайли! сөйүнчимиз вә азаблиримизни, җумлидин пүтүн бар – йоқимизни қериндашлиримиз билән ортақлишайли!

әзиз қериндашлар! ундақта келиңлар, бу улуғ җүмә күнидә улуғ пәрвәрдигаримизға қолимизни сөзүп йелинип - йалвурайли!  

и аллаһим!  дунйаниң һәр қайси җайлирида мәвҗутлуқини сақлап қелиш үчүн муҗадилә қиливатқан қериндашлиримизға рәһмитиң билән муамилә қилғин! уларни балдуррақ қийинчилиқлиридин қутқазғин!  

и алаһим! аракан қатарлиқ дунйаниң охшаш болмиған җайлирида қәтлиамлар түпәйли һайатидин айрилған қериндашлиримизға рәһмәт қилғин! йаридар болған қериндашлиримизға балдуррақ шипалиқ ата қилғин!

и аллаһим! пүтүн инсанийәтниң виҗдани һесаблинидиған әзиз миллитимиздин йардимиңни айимиғин!

инсанийәткә вә ислам дунйасиға парасәт, бәсирәт, хатирҗәмлик вә бирдәкликни нәсип қилғин!  бизләрни адимийлиқини унутқанлардин әмәс, инсандәк йашиайдиғанлардин қилғин! амин!!!!

 



مۇناسىۋەتلىك خەۋەرلەر