қизилай җәмийити ғәззәдики дохтурханиларға дора йардәм қилди

түрк қизилай җәмийити һәйити 8.5 тонна дора йардимини йәткүзүш үчүн бәйт һанун чегра еғизидин өтүп муһасирә астидики ғәззәгә йетип кәлди.

қизилай җәмийити ғәззәдики дохтурханиларға дора йардәм қилди

түркийә авази радийоси хәвири: түрк қизилай җәмийитиниң башлиқи кәрәм киник бу һәқтә байанат елан қилип, түнүгүн (2-декабир) наблустин ғәззәгә 8.5 тонна дора йәткүзгәнликлирини билдүрди. у: «пәләстингә йардәм йәткүзүшимизниң ғайиси, алди билән, бу районда барғансери чоңийиватқан сәһийә җәһәттики еһтийаҗларни азирақ болсиму қандуруштур. биз ғәззәдә бирликтә һәр хил лайиһәләрни әмәлгә ашуруватқан әл әмәл йетим-йисирлар мәркизиниму зийарәт қилдуқ» деди.

у әл әмәл йетим-йисирлар мәркизидә туридиғанларға, йемәк-ичмәк вә кийим-кечәк йардәмлирини қилғанлиқлирини, кона биналарни йеңилаш, қоғдаш астида туруватқан йетим-йисирлар сани билән уларға сунулған хизмәтләрниң сүпитини ашуруш қатарлиқ йардәмләр арқилиқ, әл әмәл йетим-йисирлар мәркизини давамлиқ қоллайдиғанлиқлирини қәйт қилди.

у пәләстин қизилай җәмийити үчүн селиватқан тәбиий апәт вә йүк тошуш мәркизиниң қурулушини нәқ мәйданда тәкшүрүп-тәтқиқ қилғанлиқлирини билдүрди. у: «ғәззәдики қисқа зийаритимиздә түрк қизилай җәмийити қилалайдиған йардәмләрни байқап, йардәмләрни йәткүзүш үчүн мунасивәтлик органлар билән көрүшимиз» деди.

түркийәдин әвәтилгән вә керәклик рухсәтләрни елиш җәрйанида, ишғал астидики ийордан дәрйасиниң ғәрбий қирғиқиниң наблус шәһиридә пәләстин қизилай җәмийитиниң искилатиға бесип қойулған дориларни басқан аптомобиллар ғәззәгә бериш үчүн йолға чиққан иди.

бу дориларниң райондики дохтурханиларниң әң аз дегәндә алтә айлиқ еһтийаҗини қамдийалайдиғанлиқи билдүрүлмәктә.



مۇناسىۋەتلىك خەۋەرلەر