қирғизистанда хәлқара етно мәдәнийә фестивали башланди

қирғизистан пирезиденти соронбай җәенбековниң қоллиши астида 2-сентәбир мурасим билән башланған «3-нөвәтлик дунйа әнәниви тәнтәрбийә мусабиқилири» ичидин орун алған хәлқара етно мәдәнийәт фестивали башланди.

etno kultur festivali1.jpg
etno kultur festivali2.jpg
etno kultur festivali3.jpg

түркийә авази радийоси хәвири: иссиқ көл райониниң бостәри йезисидики номад амфи тийатирида өткүзүлгән фестивалниң ечилиш мурасимиға, қирғизистан баш министири муһәммәдкали абилғазийев қатнашти.

у йилтизи көчмән чарвичилиққа тутишидиған хәлқләрниң етно мираслирини қоғдашни мәқсәт қилған хәлқара етно мәдәнийәт фестивалиниң ечилиш мурасимида сөз қилди вә мундақ деди:

«хәлқара етно мәдәнийәт фестивали 3-нөвәтлик әнәниви тәнтәрбийә мусабиқилириниң бир түврүкидур. мусабиқиләр сайисида йәр шарилишиватқан бу дәвирдә, етно-мәдәнийәтләрниң, дунйадики көчмән чарвичи хәлқләр вә етнографлириниң хәлқара сәвийәдә тәрәққий қилишини, омумлишишини вә тонитилишини мәқсәт қилимиз.»

у йуқири техника вә дунйави илмий мувәппәқийәтләр оттуриға чиқиватқан күнимиздә, мәдәнийәтләрниң бибаһалиқини қоғдашқа мәҗбур икәнликлирини тәкитлиди.

у сөзидә йәнә, қирғизистанда икки күндин буйан давамлишиватқан тәнтәрбийә мусабиқилириниң, дунйада 2018-йилдики әң муһим мәдәнийәт паалийәтлири арисидин орун алғанлиқини әскәртти вә мундақ деди:

«тәнтәрбийә мусабиқилиридә, җәнубий америкалиқлар, викиңлар, моңғуллар, хитайлар, әрәбләр, йапонлар вә түрк тиллирида сөзлишидиған хәлқләр бир-бирини толуқлайду. бу мусабиқиләрниң манас дастаниниң мәрт қәһримани вә дунйаға даңлиқ йазғучи чиңгиз айтматовниң йуртлирида өткүзүлгәнликидин толиму хушалмиз. меһманларниң қирғиз хәлқи билән тәҗрибилирини ортақлишишини, бу йәрниң бузулмиған тәбиий мәнзирәси вә иссиқ көл билән пәйда болидиған әң йахши хатирилирини мәмликәтлиригә апиришини үмид қилимиз.»

у дунйа әнәниви тәнтәрбийә мусабиқилириниң сайисида, қирғизистан хәлқиниң, тупрақлириниң, тәбий муһитиниң, өрп-адәтлири вә миллий алаһидиликлириниң дунйаға тонилиши үчүн әң йахши пурсәткә еришкәнликлирини қәйт қилди.

қирғизистан баш министири муһәммәдкали абилғазийевниң сөзидин кейин, хәлқ сәнәтчилири қәдимки түрк сазлириниң тәңкәш қилишида номур көрсәтти.

үч күн бойичә һәр күни кәчтә номад анфи тийатирида өткүзүлидиған фестивалда 350 йәрлик вә чәт әллик сәнәтчи «етно уссул», «етно модел», «етно базар», «етно өй» вә «һекайә, ривайәт сөзләш» қатарлиқ паалийәтләр орунлаштурулиду.

түркийә һава йоллири ширкити, қирғизистан  GSM ширкити, канаданиң сентерра канчилиқ ширкити қатарлиқ ширкәтләр, анадолу агентлиқи вә түркийә радийо-телевизийә идариси т р т (TRT) ортақ болған бу қетимқи 3-нөвәтлик дунйа әнәниви тәнтәрбийә мусабиқилириниң асаслиқ қоллиғучилири болди. түрк һәмкарлиқ вә кординатсийә агентлиқиму бу мусабиқиләргә йардәм қилди.



مۇناسىۋەتلىك خەۋەرلەر