بىتەرەپ ئەمەس، بەلكى تەڭپۇڭ خەۋەرچىلىكنى قوللايمىز

ت ر ت (تۈركىيە رادىيو-تېلېۋىزىيە ئىدارىسى) باش مۇدىرى ئىبراھىم ئەرەن خەۋەرچىلىكنى ئوبيېكتىپ بولمايدۇ دەپ چۈشىنىدىغانلىقلىرىنى، بىتەرەپ ئەمەس، بەلكى تەڭپۇڭلۇققا ئىگە خەۋەرچىلىكنى قوللايدىغانلىقلىرىنى بىلدۈردى.

بىتەرەپ ئەمەس، بەلكى تەڭپۇڭ خەۋەرچىلىكنى قوللايمىز

تۈركىيە ئاۋازى رادىيوسى خەۋىرى: ت ر ت نىڭ ساھىبخانلىقىدا، تۈركىيەنىڭ ئاخباراتچىلىق تەجرىبىسىنى دۇنيا بىلەن ئورتاقلىشىش مەقسىتىدە ئانتاليادىكى ئەلىتە لارا مېھمانخانىسىدا ئۆتكۈزۈلگەن 5-نۆۋەتلىك مېديا تەلىم-تەربىيە پىروگراممىسى ئۇيۇشتۇرۇلدى.

ت ر ت باش مۇدىرى ئىبراھىم ئەرەن 70 دۆلەتتىن كەلگەن 162 مېديا خىزمەتچىلىرىگە بېرىلگەن تاماق زىياپىتىدە سۆز قىلدى. ئۇ مېديا تەلىم-تەربىيە پىروگراممىسىنىڭ تۈركىيەنىڭ ئاخباراتچىلىق تەجرىبىسىنى دۇنيا بىلەن ئورتاقلىشىشنى مەقسەت قىلىدىغانلىقىنى ئېيتتى.

ئۇ پىروگرامما رامكىسىدا، تېلېۋىزىيە، خەۋەر، رادىيو ۋە يېڭى مېديا تۈرلىرى بويىچە لېكسىيە يىغىنلىرىنىڭ ئۇيۇشتۇرۇلغانلىقىنى بىلدۈرۈپ، تۈركىيە تېلېۋىزىيە چاتما فىلىملىرىنىڭ 15 يىلدا غايەت زور ئىلگىرىلەشلەرنى قولغا كەلتۈرگەنلىكىنى، تۈركىيەدە ئىشلەنگەن 100 دىن ئارتۇق تېلېۋىزىيە چاتما فىلىمىنىڭ چەت ئەللەرگە سېتىلغانلىقىنى تەكىتلىدى.

ئۇ «تىرىلىش ئەرتۇغرۇل» ناملىق تېلېۋىزىيە چاتما فىلىمىنىڭ، تۈركىيە تارىخىدا كۆرۈرمەنلەر سانىدا ئەڭ چوڭ رېكورت ياراتقانلىقىنى ئەسكەرتتى. ئۇ مۇنداق دېدى:

«تىرىلىش فىلىمى 100 دىن ئارتۇق دۆلەتكە سېتىلىۋاتىدۇ، دۇنيادا كۆرۈلۈۋاتقان تېلېۋىزىيە چاتما فىلىملىرىنىڭ %30 نى تۈركىيە فىلىملىرى ئىگىلەيدۇ. بۇ ناھايىتى مۇھىم رەقەم. نېمە ئۈچۈن تۈركىيەنىڭ تېلېۋىزىيە چاتما فىلملىرى بۇنچىلىك يۇقىرى ئورۇننى ئىگىلەيدۇ؟ چۈنكى تۈركىيە كۆپ مەدەنىيەتلىك دۆلەت. مۇنداقچە ئېيتقاندا، تۈركىيە كۆپ مەدەنىيەتلىك بولۇشنى قوبۇل قىلغان، كۆپ مەدەنىيەت بىلەن ياشاشنى ئوڭۇشلۇق ھەل قىلغان ۋە بۇنىڭدىن پەخىرلىنىدىغان بىر دۆلەتتۇر، ئىجتىمائىي قۇرۇلمىسى جەھەتتىن ئائىلىگە ئەھمىيەت بېرىدىغان، ئائىلىنى مەركەز قىلغان مەدەنىيىتىمىز بار، بۇلار تېلېۋىزىيە فىلىملىرىمىزدە ئەكس ئېتىدۇ.»

ئۇ تۈركىيە تېلېۋىزىيە چاتما فىلىملىرىنىڭ ھەر بىر قىسمىنىڭ ئوتتۇرا ھېساب بىلەن 110 مىنۇت بولىدىغانلىقىنى ئەسكەرتتى. ئۇ: «تۈركىيەدە يىلىغا 80 دىن 90 غىچە تېلېۋىزىيە چاتما فىلىمى ئىشلىنىدۇ، بىر تېلېۋىزىيە چاتما فىلىمى پەسلى بويىچە 36 ھەپتە قويۇلىدۇ، بۇ ناھايىتى مۇقىم بىر ساھەنى پەيدا قىلىدۇ، رىقابەت-بۇ ساھەدە ئىشلەپچىقىرىلغان مەھسۇلاتلارنىڭ چەت ئەللەرگە سېتىلىشىنى كاپالەتكە ئىگە قىلغان ئامىل ھېسابلىنىدۇ. تۈركىيە تېلېۋىزىيە ساھەسىدە رىقابەت ناھايىتى كەسكىن» دېدى.

ئۇ دۇنيادا خەۋەرچىلىكنىڭ ئوخشىمىغان يۈزلىنىشكە قاراپ مېڭىۋاتقانلىقىنى بىلدۈرۈپ، مۇنداق دېدى:

«دۇنيادا خەلقئارا خەۋەرچىلىك دېگىنىمىزدە، بىر-ئىككى قانال ئېسىمىزگە كېلەتتى. ھازىر ئوخشىمىغان قاناللار بۇ ۋەزىپىنى ئۆتەۋاتىدۇ. ت ر ت بولۇش سۈپىتىمىز بىلەن، بىزنىڭ خەۋەرچىلىك چۈشەنچىمىز بويىچە ئوخشىمىغان نۇقتىئىينەزەرلەرنى تىكلەشنى ئۈمىد قىلىمىز. خەۋەرچىلىكنى ئوبيېكتىپ بولمايدۇ دەپ چۈشىنىمىز، بىتەرەپ ئەمەس، بەلكى تەڭپۇڭ بولغان خەۋەرچىلىكنى قوللايمىز. قاتىل بىلەن ئاجىزغا ئوخشاش مۇئامىلە قىلالمايمىز. سۆزۈمنى تەكرارلايمەن، بىز بىتەرەپ ئەمەس، بەلكى تەڭپۇڭ بولغان خەۋەرچىلىكنى قوللايمىز. ئىنسان بولۇش سۈپىتىمىز بىلەن، ھېس-تۇيغۇلارنى ئارىلاشتۇرماي خەۋەرچىلىك بىلەن شۇغۇللىنىشىمىز مۇمكىن ئەمەس. خەۋەرچىلىك تىلىمىزدا، مۇشۇ جۇغراپىيەگە خاس، ئىنساننى مەركەز قىلغان، يازغان ھېكايىلىرىمىزدە ئىنساننى چۈشەندۈرىدىغان تىل يارىتىشنى نىشان قىلىمىز. سىلەرنىڭمۇ ئىنساننى مەركەز قىلغان، تەڭپۇڭ، دۇنياۋى ۋىجداننىڭ ئاۋازى بولىدىغان خەۋەرچىلىك بىلەن شۇغۇللىنىشىڭلارنى، تېلېۋىزىيەدە جەمئىيەتنىڭ ئىجتىمائىي ئېھتىياجى نەزەردە تۇتۇلغان پىروگراممىلارنى ئىشلىشىڭلارنى ئۈمىد قىلىمىز.»



مۇناسىۋەتلىك خەۋەرلەر