америкида бир мусулман сийасәтчи дуч кәлгән айримчилиқ дәталаш пәйда қилди

җумһурийәтчи партийәниң форт ворс райони шөбисиниң муавин башлиқлиқиға сайланған шаһид шафи (әсли пакистанлиқ) ниң «мусулман болғанлиқи» үчүн вәзиписидин елип ташлиниш урунушиға учриши наразилиқ пәйда қилди.

америкида бир мусулман сийасәтчи дуч кәлгән айримчилиқ дәталаш пәйда қилди

түркийә авази радийоси хәвири: америка қошма иштатлирида ийун ейида җумһурийәтчи партийәниң форт ворс райони шөбисиниң муавин башлиқлиқиға сайланған шаһид шафи (әсли пакистанлиқ) ниң «мусулман болғанлиқи» үчүн вәзиписидин елип ташлиниш урунушиға учриши наразилиқ пәйда қилди.

буниңдин 28 йил илгири америкиға берип йәрләшкән вирач, тексаш иштати совтлейк шәһәрлик һөкүмәтниң әзаси, ийун ейида җумһурийәтчи партийәниң форт ворс районлуқ шөбисиниң муавин башлиқлиқиға сайланған шаһид шафиниң «ислам дини вә бәлгилимилиригә садиқ болғанлиқи, исламий террорлуқ гуруппилири билән алақиси болуш еһтималиниң барлиқи» илгири сүрүлүп, җумһурийәтчи партийәниң районға мәсул әмәлдари боррие обриен вә униң қоллиғучилири тәрипидин вәзипидин елип ташлиниши тәләп қилинди.

обриен шафини вәзипидин елип ташлишини тәләп қилған җумһурийәтчи партийәниң районлуқ шөбисиниң башлиқи дарл естон байанат берип, «(обриенниң) буниңға көрсәткән бирдинбир сәвәб униң (шафиниң) мусулман болуши иди. маңа көрсәткән бирдинбир сәвәб бу иди» деди.

партийә үмики әзаси җорҗ п.буш болса, шафиға қаритилған төһмәтләр вә вәзиписидин елип ташлиниши торисидики тәләпниң америка қиммәт – қарашлириға мас кәләйдиғанлиқини билдүрүп, «район мәсуллири, ишчан бир партийә әмәлдарини пәқәт дини етиқадиға асасән вәзиписидин елип ташлашқа урунуш қилмишини тохтитишқа чақиримән. техиму сиғдурушчан бир җумһурийәтчи партийә үчүн хизмәт қилишимиз вә тексасни қолимизда тутуп турушни халайдиған болсақ, өзимизни вәйран қилишни тохтитишимиз керәк» дегәнләрни қәйт қилди.

йәнә бир тәрәптин, тексас мәҗлисиниң башлиқи җой страусму иҗтимаий таратқу торидики адреси арқилиқ байанат берип, «бәзи партийә мәсуллири бир партийә әмәлдарини етиқади йүзисидин партийәдин чиқириветишкә тиришиватиду. нумус қиларлиқ, америка вә җумһурийәтчи қиммәт – қарашларға мас кәлмәйдиған бир қилмиш, пүткүл әмәлдарлар тәрипидин тохтитилиши керәк» деди.

шафиниң қоғлап чиқириш үчүн һәрикәткә өткән обриен башчилиқидики партийәниң башқа әзалири болса, буш вә страусниң байанатлириға қаттиқ наразилиқ билдүрди.

шафини диний турмушиға диққәт қилиш, мунтизм һалда җамәгә бериш билән әйиблигән әмәлдарлар, өзлиригә қарши чиққан партийә әзалирини болса, тексас иштатиға «исламий шәриәт түзүминиң елип келинишигә йардәмчи болуш» билән әйиблиди.



مۇناسىۋەتلىك خەۋەرلەر