xuawéy shirkitining diréktori qolgha élindi

xitayning téxnologiye shirkiti xuawéyning xojayini rén jéngféyning qizi we shirketning pul – muamile ishliri diréktori méng wenjo amérika qoshma ishtatlirining iran émbargolirigha boysunmighanliqi bilen eyiblinip kanadada qolgha élindi.

xuawéy shirkitining diréktori qolgha élindi

türkiye awazi radiyosi xewiri: kanada edliye ministirliqi teripidin bu heqte élan qilinghan bayanatta eskertilishiche, amérika qoshma ishtatlirining irangha yürgüzüwatqan émbargo qararlirigha riaye qilmasliq bilen eyiblinip  washingtonning telipige binaen   1 – dékabir küni  kanadaning wankowér shehiride qolgha élinghan méng wenjo 7 – dékabir jüme küni sotlinidiken.

méng wenjo amérika qoshma ishtatlirigha tapshurup bérilgen teqdirde, niyu york ishtatining sherqiy rayonluq sot mehkimiside sotlinidiken.

amérika qoshma ishtatliri edliye ministirliqi xitayning eqilliq téléfon we uchur - alaqe mehsulatlirini  ishlepchiqiridighan dangliq shirkiti xuawéy üstidin, irangha qaritilghan émbargolarni depsendqilish bilen eyiblep aprél éyida tekshürüsh bashlatqanidi.

amérika – xitay otturisida yéqinda hasil qilinghan soda kélishimige nisbeten xewp teshkil qilishi mölcherliniwatqan bu xewer, pul – muamile dunyasigha selbiy tesir körsetti.

bu xewer tarqalghandin kéyin, asiya pay chéki bazarliri zor derijide töwenlesh bilen échildi, amérika qoshma ishtatlirining qerellik péréwot chekliride bolsa töwenlesh alametliri körülmekte.

niyu york waqti saet 23.45 étibari bilen (enqere waqti saet 07.45)  Standard&Poor’s ning 500 qerellik péréwot chekliride % 1.3, Dow Jones  ning qerellik péréwot chekliride % 1,4 we Nasdaq ning qerellik péréwot chekliride bolsa  % 1.6 töwenlesh körüldi.


خەتكۈچ: iran , émbargo , xitay , amérika , kanada , xuawéy

مۇناسىۋەتلىك خەۋەرلەر