хуавей ширкитиниң директори қолға елинди

хитайниң технологийә ширкити хуавейниң хоҗайини рен җеңфейниң қизи вә ширкәтниң пул – муамилә ишлири директори мең вәнҗо америка қошма иштатлириниң иран ембарголириға бойсунмиғанлиқи билән әйиблинип канадада қолға елинди.

хуавей ширкитиниң директори қолға елинди

түркийә авази радийоси хәвири: канада әдлийә министирлиқи тәрипидин бу һәқтә елан қилинған байанатта әскәртилишичә, америка қошма иштатлириниң иранға йүргүзүватқан ембарго қарарлириға риайә қилмаслиқ билән әйиблинип  вашингтонниң тәлипигә бинаән   1 – декабир күни  канаданиң ванковер шәһиридә қолға елинған мең вәнҗо 7 – декабир җүмә күни сотлинидикән.

мең вәнҗо америка қошма иштатлириға тапшуруп берилгән тәқдирдә, нийу йорк иштатиниң шәрқий районлуқ сот мәһкимисидә сотлинидикән.

америка қошма иштатлири әдлийә министирлиқи хитайниң әқиллиқ телефон вә учур - алақә мәһсулатлирини  ишләпчиқиридиған даңлиқ ширкити хуавей үстидин, иранға қаритилған ембарголарни дәпсәндқилиш билән әйибләп апрел ейида тәкшүрүш башлатқаниди.

америка – хитай оттурисида йеқинда һасил қилинған сода келишимигә нисбәтән хәвп тәшкил қилиши мөлчәрлиниватқан бу хәвәр, пул – муамилә дунйасиға сәлбий тәсир көрсәтти.

бу хәвәр тарқалғандин кейин, асийа пай чеки базарлири зор дәриҗидә төвәнләш билән ечилди, америка қошма иштатлириниң қәрәллик перевот чәклиридә болса төвәнләш аламәтлири көрүлмәктә.

нийу йорк вақти саәт 23.45 етибари билән (әнқәрә вақти саәт 07.45)  Standard&Poor’s ниң 500 қәрәллик перевот чәклиридә % 1.3, Dow Jones  ниң қәрәллик перевот чәклиридә % 1,4 вә Nasdaq ниң қәрәллик перевот чәклиридә болса  % 1.6 төвәнләш көрүлди.



مۇناسىۋەتلىك خەۋەرلەر