фирансийәдә бир айалға һуҗум қилип, баш йағлиқини еливетишкә мәҗбурлаш вәқәси йүз бәрди

фирансийәниң сайинт куентин шәһиридә йеқилғу баһасиниң өрләп кәткәнликигә наразилиқ билдүрүлгән намайиш җәрйанида, бир гуруппа намайишчиларниң бир айални баш йағлиқини еливетишкә мәҗбурлиғанлиқи оттуриға чиқти.

фирансийәдә бир айалға һуҗум қилип, баш йағлиқини еливетишкә мәҗбурлаш вәқәси йүз бәрди

 

түркийә авази радийоси хәвири: фирансийә аммивий таратқуси «France Info» ниң хәвәр қилишичә, шәнбә күни сайинт куентин шәһиридики намайишта, «сериқ җилиткиликләр» дегән нам билән тәшкилләнгән паалийәтчиләрдин бир гуруппа кишиләр аптомобилиниң ичидә олтурған баш йағлиқлиқ бир айалға дәсләптә һақарәт қилған, андин баш йағлиқини еливетишкә мәҗбурлиған.

хәвәрдә билдүрүлишичә, намайишни тәшкиллигүчи әһвалдин хәвәр тепип, баш йағлиқлиқ айалға һуҗум қилған намайишчиларни агаһландурған вә уларға қарши чиққан.

вәқәгә шаһит болған 70 йашлиқ бир айал йәрлик мәтбуатларға бәргән байанатида, «қиммәтчиликкә қарши намайишни қоллаймиз, бирақ инсанларға һуҗум қилиш үчүн намайиш қилишқа болмайду» дегән.

бу арилиқта чарәнтә тәптиш мәһкимиси иҗтимаий таратқу һесабидин елан қилған байанатида, намайиш җәрйанида «сериқ җилиткиликләр» дегән нам билән тәшкилләнгән намайишчилардин бәзиләрниң бир аптомобилни қоршивелип, аптомбилдики кишигә һақарәт қиливатқанлиқиға даир көрүнүшләр ашкариланғандин кейин, дело турғузуп тәкшүрүш башлиғанлиқи елан қилинди.  

фирансийә миқйасида шәнбә күни өткүзүлгән намайишларда һөкүмәтниң йеқилғуға қошумчә баҗ қойғанлиқиға наразилиқ билдүрүлгән иди. намайишчилар йүзлигән коча вә йолларни тосуп намайиш өткүзгән иди.

фирансийә ички ишлар министирлиқи намайишқа тәхминән 287 миң кишиниң қатнашқанлиқини, йүз бәргән вәқәләрдә 1 киши һайатидин айрилип, 409 кишиниң йаридар болғанлиқини вә 157 кишиниң назарәткә елинғанлиқини елан қилған иди.



مۇناسىۋەتلىك خەۋەرلەر