amérika palatasi seudi erebistangha qoral - yaragh émbargosi qararnamisi hazirlidi
amérika qoshma ishtatliri palatasida jamal qashiqchi suyiqesti toghruluq seudi erebistangha qoral - yaragh sétishni toxtitishni öz ichige alghan birqatar émbargolarni yürgüzüsh mezmun qilinghan yéngi qararname hazirlandi.
türkiye awazi radiyosi xewiri: niyu jérséy palata ezasi démokrat bob ménéndéz bilen indiana palata ezasi jumhuriyetchi tod yong bashchiliqida hazirlanghan qararnamini, jumhuriyetchi palata ezasi lindséy graham we susan kolins bilen démokrat palata ezaliridin jak réd we jéanné shahénmu qollidi.
ménéndéz, bu heqte élan qilghan yazma bayanatida, amérika qoshma ishtatliri hökümitining jamal qashiqchi suyiqestti toghruluq seudi erebistan dairiliridin 17 neper kishigila émbargo yürgüzüning yéterlik emeslikini, shunga seudi erebistangha yéngi émbargolarni yürgüzüshning zörürlükini tekitlep mundaq dédi: «jamal qashiqchi jinayiti ochuq - ashkara we qobul qilghili bolidighan shekilde tekshürülüshi kérek. bu qararname arqiliq, dölet mejlisi kishilik hoquqqa qanchilik derijide riaye qlidighanliqini yene bir qétim namayen qildi. seudi erebistan yemende urushni dawamlashturuwatidu. mejlisimiz yemende toqunushlargha derhal xatime bérilishini telep qilidu.»
yong bu heqte élan qilghan bayanatida, mundaq dédi: «bu qararname sayisida, yemendiki barliq tereplerge, toqunushlarning téximu éghir insaniy tiragédiyelerni keltürüp chiqiridighanliqini bildürüsh hemde ularni ichki urushiqa xatime bérish meqsitide söhbet üstilige olturughuzushta muhim rol oynishi mumkin.»
melumatlargha qarighanda, bu qararnamide, amérika qoshma ishtatlirining seudi erebistangha wede qilghan barliq qoral – yaraghlarni sétishni toxtitishi, bu dairide oq - dora, bomba, bashqurulidighan bomba, urush ayropilanliri, tanka we qoralliq aptomobillarni sétip bérishni toxtitishi telep qilinidiken. shuning bilen bir waqitta, qararname, amérika qoshma ishtatlirining yemendiki seudi erebistangha ait urush ayropilanlirigha yéqilghu bérishni meniy qilishni, yemenge insanperwerlik yardemlerning kirishige tosalghu bolghanlargha, jamal qashiqchining öltürülüshi bilen chétishliqi bar barliq kishilerge émbargo yürgüzüshni, seudi erebistanning kishilik hoquq depsendichilikliri heqqide dölet mejlisige doklat sunushni mezmun qilidiken.
bu qararnamining qanunlishishi üchün, qararname aldi bilen hem dölet mejlisi omumiy kéngishining hem awam palatasining testiqishidin ötüshi kérek iken.
seudi erebistanliq zhurnalist jamal qashiqchi 2 – öktebir küni öylinishke alaqidar resmiyetlirini béjirish üchün barghan seudi erebistanning istanbuldiki bash konsulxanisida wehshiylerche öltürülgenidi.
