köchmenler mesilisi girétsiyening béshini aghritmaqta

türkiye awazi radiyosi xewiri: girétsiye köch siyasiti ministiri dimitris witas, adem sanining zich we sharaitining nachar bolushi sewebidin tenqid qilinip kéliniwatqan ege aralliridiki lagérlardin 6000 musapirning bashqa jaygha tarqaqlashturulidighanliqini éytti.

witas ministirliq binasida ötküzülgen muxbirlarni kütüwélish yighinida girétsiyediki köch mesilisi üstide toxtaldi.

midilli, sisam we sakizgha oxshash sherqiy ege arallirigha bulturqigha qarighanda téximu jiq qanunsiz köchmenning kelgenlikini éytqan dimitris witas, 2018-yilida 28 ming köchmenning kelgenlikini bildürdi.

ministir witas arallardiki köchmen lagérlirida adem sanining köp, sharaitning nachar bolushi sewebidin, 2018-yilida 23mingdin artuq musapirning bashqa köchmenler lagéri we öylerge jaylashturulghanliqini eskertip:bu yil axirighiche 6000 musapirni bashqa lagérgha yötkeymiz, dédi.

bu yil 290 köchmenning türkiyege qayturulghanliqini éytqan dimitris witas, 886 köchmenning öz istiki bilen dölitige qaytqanliqini, 177 musapirning ailerni jem qilish pirogrammisi dairiside gérmaniyege ewetilgenlikini éytti.

ministir witas merich deryasi arqiliq girétsiyege kélidighan köchmen sanining bulturqigha qarighanda téximu köpeygenlikini éytip, 2018-yili ichidila 14250 köchmenning bu yolni ishlitip kelgenlikini bildürdi.

türkiyening köch mesililirini yaxshi bir terep qilip kéliwatqanliqini éytqan ministir witas, yawropa ittipaqi bilen türkiyening köchmenler mesiliside téximu köp kélishimlerni tüzüshi kéreklikini tekitlep ötti.

witas türkiyening 3 milyon 500 mingi süriyelik bolup jemiy 4 milyon 500 köchmenge sahibxanliq qiliwatqanliqini éytip: köchmenlik toghrisida chaqirilghan barliq yighinlarda köchmenler mesiliside türkiye bilen hemkarliq ornitishning tolimu muhimliqini tekitlep kéliwatimiz, dédi.

köchmenlik mesilisi boyiche bu yil 26-28-öktebir künliride ötküzülgen kartepe aliy bashliqlar yighinigha qatnashqanliqini eslitip ötken dimitris witas, 2019-yili yanwarda ichki ishlar ministiri sulayman soyluning afénani ziyaret qilishqa kélidighanliqinimu éytti.

witas adem etkeschilikige zerbe bérish we köch dolqunining aldini élish xizmetliride ikki döletning xewpsizlik qisimlirining hemkarliq ichide ikenlikini bildürdi.

texminen 10 ming kishi sighidighan ege arallirida 20mingdin artuq musapir yashaydu.