tramp: qedemmu qedem ilgirileymiz, néfit bahasining örlep kétishini xalimaymen

amérika qoshma ishtatliri pirézidénti donald tramp, iranning néfit éksportigha qaritilghan émbargolarning qedemmu qedem ijra qilinidighanliqini éytti.

tramp: qedemmu qedem ilgirileymiz, néfit bahasining örlep kétishini xalimaymen

türkiye awazi radiyosi xewiri: donald tramp aqsarayda irangha yürgüzülgen émbargo toghrisida toxtilip, omumiy émbargolar bilen iranning néfit éksporti mesilisining bir – biridin ayrim halda muhakime qilinghanliqigha isharet qildi. u, irangha qarshi nahayiti küchlük we qattiq pozitsiyege ötkenliklirini eskertip, «(irangha qarita) hazirghiche körülgen eng küchlük émbargolarni yolgha qoyduq, lékin, néfit mesiliside bir qeder asta ilgirileshni xalaymiz, dunyada néfit bahalirining ösüp kétishini xalimaymen» dédi.

néfit bahasi mesiliside amérikining temkin pozitsiyede bolidighanliqining signalini bergen tramp, «buning iran bilen bir alaqisi yoq, iranning néfiti (éksporti) ni derhalla nölge chüshürüshüm mumkin, emma undaq qilghanda, bazarlarda endikish peyda bolidu. néfit bahalirining ösüp kétishini xalimaymen» dégenlerni qeyt qildi.

yene bir tereptin amérika tashqi ishlar ministiri mayk pompéyo, iran émbargoliri toghrisida ijtimaiy taratqu tori tiwittérdiki adrési arqiliq erebche uchur tarqitip,  «amérika qoshma ishtatliri, iran xelqi bilen hemkarliq ichide. 40 yil etrapidiki nachar iqtisadiy tüzülme we chiriklikning külpitini hemmidin köp iran xelqi tartti. iran tüzümining dégenlirining eksiche, émbargolar ashliq, yéza – igilik, dora we tébbiy lazimetliklerni sétiwélishni öz ichige almaydu» dédi.

amérika tünügün, 2015 – yilidiki yadro kélishimi bilen teng emeldin qaldurulghan émbargolarning énérgiye, maliye we déngiz toshumuchiliqi sahelirige alaqidar ikkinchi basquchini qaytidin yürgüzüshke bashilghanidi.


خەتكۈچ: tramp , émbargo , iran , amérika

مۇناسىۋەتلىك خەۋەرلەر