amérika: paraxotlirimizning teywen boghuzidin ötüshi xelqaraliq qanungha uyghun
xitay hökümiti bayanat élan qilip, amérikani «bir xitay» siyasiti pirinsipigha emel qilishqa chaqirdi.
türkiye awazi radiyosi xewiri: xitay tashqi ishlar ministiri bayanatchisi xua chünying axbarat élan qilish yighinida, tünügün (22-öktebir) amérikaning «USS Curtis Wilbur» we «USS Antietam» namliq ikki herbiy paraxotining teywen boghuzidin ötkenlikini yéqindin közitiwatqanliqlirini eskertip, mezkur mesilidiki endishelirini amérika hökümitige yetküzgenliklirini bildürdi.
bayanatchi xua chünying teywen mesilisining xitay zémin pütünlüki we igilik hoquqigha chétilidighanliqini, shundaqla teywen mesilisining amérika-xitay munasiwetliride eng muhim we sezgür mesile ikenlikini tekitlidi.
u mundaq dédi:
«amérikani <bir xitay> siyasitige emel qilishqa chaqirimiz. ikki dölet munasiwetliri we teywen boghuzigha ziyan salmasliq üchün, washington hökümiti teywenge munasiwetlik mesililerde diqqet qilishi kérek.»
amérikaning ikki herbiy paraxoti tünügün teywen boghuzidin ötken idi.
amérika dölet mudapie ministirliqi (péntagon, besh burjeklik bina) bayanatchisi rob menning bu heqte toxtalghanda: «ikki herbiy paraxotimiz xelqaraliq qanungha uyghun, burundin dawamlishiwatqan teywen boghuzidin ötüsh herikitini emelge ashurdi. paraxotlar teywen boghuzidin ötüp, amérikaning erkin we qatnishi rawan hindi-tinch okyan rayoni mesilisige köngül bölidighanliqini körsetti» dégen idi.
béyjing hökümiti «bir xitay siyasiti» ni tekitlep, xelqaraliq jemiyette xitaygha peqet özlirining wekillik qilidighanliqini ilgiri sürüp, teywen musteqilliq élan qilghan teqdirde zorluq küch ishlitish mumkinlikini eskertip kelmekte.
gomindang hökümiti 1949-yili kommunistik hökümetning hakimyet tiklishi netijiside teywenge qéchip hakimiytini dawamlashturghan idi. kommunistik hakimiyet xitaygha teywendiki gomindang hökümitining wekillik qilishini étirap qilmighan idi.
