әрәбистан әдлийә министири «әләрәбиййә» ниң қашиқҗи тоғрисидики соаллириға җаваб бәрди

сәуди әрәбистан әдлийә министири вәлид самани, журналист җәмал қашиқҗи (хашиқҗи) вәқәсигә алақидар тәкшүрүш вә сотлаш мусаписиниң қачан ахирлишидиғанлиқиниң ениқ вақти йоқлуқини ейтти.

әрәбистан әдлийә министири «әләрәбиййә» ниң қашиқҗи тоғрисидики соаллириға җаваб бәрди

түркийә авази радийоси хәвири: самани сәуди әрәбистанниң иқтисадий йардими билән хизмәтлирини давамлаштуруватқан дубәй мәркәзлик «әләрәбийә телевизийәси» ниң соаллириға җаваб берип, падишаһлиқниң қанун вә әдлийә мусаписиниң ениқ икәнликини, бу делоға мунасивәтлик һәрқандақ бир тәләпниң охшаш делоларниң усул вә методлириға параллел болидиғанлиқини билдүрди.

у, қашиқҗи делосиға мунасивәтлик тәкшүрүш вә сотлаш мусаписиниң қачан ахирлишидиғанлиқи тоғрисидики бир соалға, «мәйли тәкшүрүш, мәйли сотлашта болсун, муддәт вә рәсмийәтләр җинайи ишлар қанунлири бойичә бекитилиду. тәкшүрүш вақит алиду вә қачан ахирлишидиғанлиқи техиму муәййәнләшмиди. баш тәптиш мәһкимисиниң тәкшүрүшни ахирлаштурушини күтүватимиз» дәп җаваб бәрди.

самани буниңдин илгири сәуди әрәбистан рәсмий хәвәр агентлиқи – спаға байанат берип, «қашиқҗи вәқәси әрәбистан падишаһлиқиниң игилик һоқуқи даирисидики бир земинда йүз бәрди» дегәниди.

рийад даирилири, 2 – өктәбирдә сәуди әрәбистанниң истанбулдики консулханисиға кирип кәткәндин кейин издерәксиз йоқап кәткән қашиқҗиниң «консулханидики җедәл нәтиҗисидә өлүп кәткәнлики» ни елан қилғаниди.

сәуди әрәбистан рәсмий хәвәр агентлиқи – спаниң хәвиридә, сәуди әрәбистан баш тәптиш мәһкимисиниң тәкшүрүши нәтиҗисидә, җәмал қашиқҗи истанбул консулханисиға кирип, у йәрдики башқа сәуди әрәбистанлиқлар билән дәталаш қилишқа башлиғанлиқи, талаш – тартишниң җедәлгә айланғанлиқи, нәтиҗидә қашиқҗиниң һайатидин айрилғанлиқи» илгири сүрүлгәниди.



مۇناسىۋەتلىك خەۋەرلەر