сәуди әрәбистан йоқап кәткән журналист җамал қашиқчиниң өлгәнликини етирап қилди

сәуди әрәбистан һөкүмити 2  - өктәбир күни истанбул баш консулханисиға киргәндин кейин из - дерәксиз йоқап кәткән сәуди әрәбистанлиқ журналист җамал қашиқчиниң «консулхана бинасида йүз бәргән патпарақчилиқ нәтиҗисидә өлгәнликини» етирап қилди.

сәуди әрәбистан йоқап кәткән журналист җамал қашиқчиниң өлгәнликини етирап қилди

түркийә авази радийоси хәвири: сәуди әрәбистанниң рәсмий «‹ SPA › хәвәр агентлиқи» ниң бу һәқтә елан қилған хәвиридә, сәуди әрәбистан баш тәптиш мәһкимиси тәрипидин елип бериливатқан тәкшүрүш нәтиҗисидә, җамал қашиқчиниң сәуди әрәбистанниң истанбулда турушлуқ баш консулханисиға киргәнлики, андин униң бу йәрдики башқа сәуди әрәбистан пуқралири билән талаш – тартиш қилишқа башлиғанлиқи, талаш – тартишниң патпарақчилиққа айлинип кәткинлики, буниң нәтиҗисидә җамал қашиқчиниң һайатидин айрилғанлиқи әскәртилди, сәуди әрәбистан баш тәптиш мәһкимисиниң вәқәни давамлиқ тәкшүрүватқанлиқи, вәқәгә четишлиқи барлиқи билән әйиблинип, 18 сәуди әрәбистан пуқрасиниң қолға елиғанлиқи қәйт қилинди. шуниң билән бир вақитта, журналист җамал қашиқчиниң өлүп кетишигә сәвәб болған барлиқ җавабкарлардин һесаб елинидиғанлиқи вә адаләткә тапшурулидиғанлиқи, дәрвәқә, баш тәптиш мәһкимисиниң қолға чүшүргән барлиқ дәлил – испатларни ортақлишиватқанлиқи, җавабкарларни сотқа тапшурушқа тәййарлиниватқанлиқи тәкитләнди.

йәнә бир тәрәптин, сәуди әрәбистан түркийәниң җумһур рәис рәҗәп таййип әрдоған һөкүмити  йетәкчиликидә җамал қашиқчи вәқәсини тәкшүрүш җәрйанида зич һәмкарлашқанлиқидин интайин хурсән икәнликини билдүрди.

рийад, түркийә даирилириниң гуманлиқ кишиләр тоғрулуқ ортақлашқан мәлуматларниң җамал қашиқчи вәқәсиниң ениқлап чиқилишида муһим рол ойниғанлиқини уқтурди.

буниңдин башқа йәнә, сәуди әрәбистан хан сарийи бу һәқтә қарарнамә елан қилип, сәуди әрәбистан ахбарат ишлири баш оргининиң директор йардәмчиси әһмәд асириниму өз ичигә алған йуқири дәриҗилик 5 кишини вәзиписидин елип ташлиди.

сәуди әрәбистан ахбарат ишлири баш оргинини қайтидин тәшкилләш үчүн тәхт вариси шаһзадә муһәммәд бин сәлман башчилиқида министирлиқ комитети қурулуши қарарлаштурулди.



مۇناسىۋەتلىك خەۋەرلەر