кишилик һоқуқ тәшкилатлири җамал қашиқчи вәқәсиниң мустәқил һалда тәкшүрүлүшини тәләп қилди

хәлқара кишилик һоқуқ тәшкилатлири журналист җамал қашиқчи вәқәсидә сәуди әрәбистанниң ақланмаслиқи үчүн вәқәниң хәлқаралиқ сәвийәдә мустәқил һалда тәкшүрүлүшини тәләп қилди.

кишилик һоқуқ тәшкилатлири җамал қашиқчи вәқәсиниң мустәқил һалда тәкшүрүлүшини тәләп қилди

түркийә авази радийоси хәвири: хәлқара кәчүрүм тәшкилати, кишилик һоқуқни көзитиш тәшкилати, чегра һалқиған журналистлар тәшкилати вә журналистларни қоғдаш комитети қатарлиқ тәшкилатлар бирләшкән дөләтләр тәшкилатиниң баш мәркизидә қошма ахбарат елан қилиш йиғини өткүзүп, сәуди әрәбистанлиқ өктичи журналист җамал қашиқчиниң ақивитиниң ениқлап чиқилиши үчүн хәлқаралиқ сәвийәдә мустәқил һалда тәкшүрүш елип берилишини тәләп қилди.

журналистларни қоғдаш комитетиниң директор йардәмчиси роберт маһоней, бу һәқтә мундақ деди: «түркийә вәқәни өз вақтида, ишәнчилик вә очуқ - ашкара һалда тәкшүрүш үчүн бирләшкән дөләтләр тәшкилатидин йардәм елиши лазим, чүнки, бирләшкән дөләтләр тәшкилатиниң тәкшүрүш ишлириға дахил болуши, сәуди әрәбистанниң ақлиниши, йаки башқа һөкүмәтләрниң рийад билән болған мунасивәтлирини сақлап қелиш үчүн вәқәниң теги – тәктини йошуруш урунушлириға тақабил турушниң әң йахши капалитидур.»

кишилик һоқуқни көзитиш тәшкилатиниң директори лоис чарбоннаму җамал қашиқчиниң аилиси вә пүткүл дунйаниң вәқәниң әсли маһийитидин хәвәр тепиш һоқуқиниң барлиқини ейтти.

хәлқара кәчүрүм тәшкилатиниң нийу йорк вә бирләшкән дөләтләр тәшкилати ишлири директори шерине тадрос, бирләшкән дөләтләр тәшкилати вәқәни ишәнчилик һалда тәкшүрмигән тәқдирдә, сәуди әрәбистан самалиридики гуманлиқ қара булутларниң тарқалмайдиғанлиқини әскәртиш билән бир вақитта, хәлқаралиқ сәвийәдики тәкшүрүшниң түркийәгиму пайдилиқ икәнликини тәкитлиди.

сәуди әрәбистанлиқ ислаһатчиларға нисбәтән муһим мунбәр һесаблинидиған «‹вәтән› гезити» гә муһим төһпиләрни қошқан һәмдә ғәрб таратқулирида оттура шәрқ райониға мунасивәтлик хәвәрлири билән тонулған җамал қашиқчи, 2 – өктәбир күни рәсмийәтлирини беҗириш үчүн сәуди әрәбистанниң истанбулдики баш консулханисиға киргәндин кейин из - дерәксиз йоқап кәткәниди.



مۇناسىۋەتلىك خەۋەرلەر