jenubiy koréye hökümiti donald trampqa naraziliq bildürdi

türkiye awazi radiyosi xewiri: jenubiy koréye pirézidénti mon jiyainning dölet xewpsizlik meslihetchisi mon chungin, jenubiy koréyening musteqil we toluq igilik hoquqluq dölet ikenlikini, shimaliy koréyege qaritilghan émbargolarni bikar qilish üchün amérikaning  testiqlishigha éhtiyaji yoqliqini éytti.

yonxap xewer agéntliqining bu heqtiki xewiride, meslihetchi mon jenubiy koréye-amérika munasiwetlirige ikki musteqil we igilik hoquqluq pirinsipi nuqtisidin muamile qilish lazimliqini bildürgenliki eskertildi.

shimaliy koréyege qaritilghan émbargolarning bikar qilinidighanliqi toghrisida jenubiy koréyening bayanat bérishige qarita amérika pirézidénti donald trampning «testiqimiz bolmay turup héch ish qilalmaydu»dégen teriqide jawab qayturushigha naraziliq bildürgen meslihetchi mon: testiq dégen ibaret tolimu xata, buning ornigha meslihet we muresselishish dégen sözlerni ishletse téximu muwapiq bolatti, pirézidént tramp jenubiy koréye amérika bilen meslihet qilmay yaki muresseleshmey turup émbargolarni bikar qilalmaydu, déyishi lazim idi, dédi.

mon  jenubiy koréye hökümitining shimaliy koréyege qaritilghan émbargolarni bikar qilish üchün, amérika testiqigha éhtiyaji yoqliqini eskertip: jenubiy koréye musteqil we toluq igilik hoquqluq dölettur. amérika pirézidénti némishqa bundaq gep qilidu? biz némishqa amérikining buyruqi boyiche heriket qilghudekmiz? eger heriket qilsaq undaqta biz musteqil dölet emesmu?, dédi.

jenubiy koréye tashqi ishlar minsitiri kang kiyung xiya bu yil 10-öktebirde bayanat bergende, jenubiy koréye hökümitining 2010-yili jenubiy koréyelik 45 paraxot xadimining ölümige seweb bolghan hujumdin kéyin, shimaliy koréyege qaratqan émbargolarning köp qismini bikar qilish üstide muzakire ötküzüliwatqanliqini bildürgenidi.

bu bayanattin kéyin tramp jenubiy koréyening amérikaning testiqi bolmay turup, shimaliy koréyege qaritilghan émbargolarni bikar qilalmaydighanliqini bildürüp mundaq uchur yazghanidi: «jenubiy koréye bizning testiqimiz bolmay turup buni qilsa bolmaydu, ular testiqimiz bolmay turup héch ish qilmaydu.»