amérika arakanliq musulmanlar duch kéliwatqan zulum toghruluq doklat élan qildi

amérika hökümiti birma armiyesining arakanliq musulmanlarni qéri-yash we chong-kichik démestin hujum nishani qilip sistémliq halda qirghin qilip kéliwatqanliqini bildürdi.

amérika arakanliq musulmanlar duch kéliwatqan zulum toghruluq doklat élan qildi

türkiye awazi radiyosi xewiri: amérika hökümiti teripidin élip bérilghan tekshürüshte, birma armiyesining arakanliq musulmanlarni qéri-yash we chong-kichik démestin hujum nishani qilip sistémliq halda qirghin qilip  kéliwatqanliqi bildürüldi.

amérika tashqi ishlar ministirliqi teripidin birmadiki zulumlardin qéchip bangladéshtin panahliq tiligen mingdin artuq arakanliq musapir bilen élip bérilghan söhbetke asasen teyyarlap chiqilghan doklatta, birma armiyesining arakanliq musulmanlargha éghir zulum salghanliqi alahide tekitlendi.

20 betlik doklatqa asaslanghanda, söhbet élip bérilghan arkanliq musulmanlarning köp qismi shahit bolghan jinayet we zorawanliq weqelirining %84ning jawabkarining birma armiyesi ikenlikini bildürüshken.

arakanliq musulmanlar basqunchiliq, qurani kerimni köydürüsh, insanlarning béshi yaki beden ezasini késish, bowaq we balilarni urush yaki öltürüsh, eskerlerning tughut esnasidiki ayallargha hujum qilishi qatarliq jinayi qilmishlargha shahit bolushqan.

doklatta mundaq déyildi: «bu qétimqi tekshürüsh arakan wilayitidiki zorawanliq we zulumning tolimu éghirliqini namayen qilip berdi.» doklatta yene zorawanliq weqeliride 38mingdin artuq binagha ot kétip köyüp külge aylanghanliqi eskertildi.

b d t ning bildürüshiche, 2017-yili 25-awghusttin bashlap arakanni tashlap bangladéshqa qachqanlarning sani 700 minggha yetken. xelqara insan heqliri organliri süniy hemrah körünüshliri bilen yüzlerche yézining yoq qilinghanliqini delillep chiqti.

b d t we xelqara  insan heqliri teshkilatliri arakanliq musulmanlargha sélinghan zulumni «étnik tazilash» yaki «irqiy qirghinchliq»dep atap kelmekte.

xelqara yardem organlirining arakan wilayitige kirishige tosalghu bolup kéliwatqan birma hökümiti, arakanliq musulmanlarni qayturup kélish toghrisida bergen wedisini hazirghiche ishqa ashurmidi.

insan heqliri teshkilatliri arakanliq musulmanlar birmada bixeterlik berpa  qilinmay turup arakangha qaytqan teqdirde, éghir zulumgha duchar bolidighanliqlirini bildürmekte.



مۇناسىۋەتلىك خەۋەرلەر