b d t: 39 dölet jiddiy yardemge muhtaj

türkiye awazi radiyosi xewiri:  birleshken döletler teshkilati yémek – ichmek we yéza igilik teshkilati teripidin bu heqte élan qilinghan yazma bayanatta, bu heqte élan qilinghan doklatqa asaslanghanda, 39 döletning jiddiy yardemge muhtaq ikenliki tekitlinip mundaq déyildi: « afriqida 31, asiyada 7 we  karib rayonida bir bolup, jemiy 39 dölet jiddiy yémek - ichmek yardimige muhtaj. teshkilatimiz uzundin buyan élip bériwatqan paaliyetliri dawamida éniqlap chiqishiche, uzaq mezgillik toqunushlar, éghir muhit bulghinish hadisiliri we öy – makanliridin ayrilip qélish qatarliq weqeler sewebidin milyonlarche bash panahsiz insan jiddiy yémek - ichmek yardimige muhtaj boluwatidu. sherqiy afriqa we yéqin sherq rayonidiki yémek - ichmek jehettiki xewpning asasliq amilini, toqunushlar we öy – makansiz qélish hadisiliri teshkil qilmaqta. afriqining jenubiy qismi, yéqin sherq rayoni we jenubiy amérikida qurghaqchiliq sewebidin yéza igilik mehsulatlirini ishlepchiqirish miqdari barghanséri töwenlewatidu.»

bayanatta yene mundaq déyildi: «yemende dawamlishiwatqan toqunushlar sewebidin, aldinqi yildin buyan acharchiliq tehditige duch kéliwatqan we jiddiy yardemge muhtaj boluwatqan insanlarning sani % 5 lik éshish bilen 17.8 milyongha yetti. ottura afriqa jumhuriyitining nopusining % 43 ti, yeni texminen 2 milyon kishi jiddiy yémek - ichmek yardimige muhtaj. süriyede texminen 6.5 milyon kishi we bashqa 4 milyon insan acharchiliq xewpige duch kelmekte. afghanistan, burkina faso, burundi, yéshil tumshuq aralliri, kaméron, ottura afriqa jumhuriyiti, chad, kongo, shimaliy koréye, kongo démokratik jumhuriyiti, jibuti, éritiriye, eswatini, éfiyopiye, giwéniye, hayti, iraq, kéniye, lésotho, libériye, liwiye, madaghasqar, malawi, mali, mawritaniye, mozambik, birma, nigér, nigériye, pakistan, sénégal, sirraliyon, somali, jenubiy sudan, sudan, süriye, uganda, yemen, zimbabowi qatarliq döletler jiddiy yémek - ichmek yardimige muhtaj.»