xitay amérikining baj qararigha qarshi heriketke ötti

türkiye awazi radiyosi xewiri: xitay hökümiti 60 milyard dollar qimmitidiki amérika tawarlirigha %10qoshumche tamozhna béji qoyushni qarar qildi.

xitay dölet kéngishige qarashliq tamozhna bashqurush idarisi teripidin bu heqte élan qilinghan bayanatta, amérikadin import qilinidighan 60 milyard dollar qimmitidiki 5207 xil tawargha %10 qoshumche tamozhna béji qoyushning qarar qilinghanliqi bildürüldi.

bayanatta amérika tawarliridin qoshumche tamozhna béji élish belgilimisining 24-séntebirde resmiy yolgha qoyulidighanliqi eskertildi.

xitayning amérika hökümitining 200 milyard dollar qimmitidiki xitay tawarlirigha %10qoshumche tamozhna béji qoyushni qarar qilghan künge udullap mushundaq qararni chiqirishi alahide diqqet qozghidi.

bu heqte xitay tashqi ishlar ministirliqi: «amérikaning öz aldigha mushundaq qarar chiqirip soda saheside békinmichilik qilishini hergiz toghra tapmaymiz»dep bayanat bergen bolsa, xitay soda ministirliqimu «qanuniy heq-hoquqlirimiz we menpeetlirimiz bilen xelqara soda tertipini qoghdash üchün amérikigha tégishlik jawabni qayturimiz»dégen mezmunda bayanat berdi.

donald tramp tünügünki bayanatida texminen 200 milyard dollar qimmitidiki xitay tawarlirigha%10  qoshumche tamozhna béji qoyush belgilimisining 24-séntebirde yolgha qoyulidighanliqini we buning mushu yilning axirghiche dawamlishidighanliqini,  2019-yil 1-yanwardin bashlap  bolsa qoshumche tamozhna béjining %25 ashurulidighanliqini éytqanidi.

amérika bilen xitay arisidiki soda urushining tereqqiyati

amérika pirézidénti donald tramp hökümitining bu yil 23-martta xitaydin import qilinidighan polat-tömür we alyuminlargha %25 qoshumche tamozhna béji  qoyushni qarar qilishi xitay bilen amérika arisida soda urushining qozghilishigha seweb bolghan tunji hadise hésablinidu.

xitay hökümiti washingiton hakimiyitining xitaydin import qilinidighan polat-tömür we aliyuminlargha qoshumche tamozhna béji qoyush belgilimisige qarita, amérikidin import qilinidighan 128 xil tawardin %15tin %25kiche qoshumche tamozhna béji élish belgilimisini yolgha qoydi.

amérika arqidinla xitay shirketlirining amérikiliq shirketlerning téxnikiliri we eqliy mülüklirige qanunsiz yollar bilen ériship kéliwatqanliqlirini bildürüp, 50 milyard dollar qimmitidiki xitay tawarlirigha qoshumche tamozhna béji qoyush belgilimisini ijra qildi.

xitay hökümiti amérika hakimiyitining bu qararigha derhal  jawab qayturdi we  xitay soda ministirliqi amérikadin import qilinidighan 50 milyard dollar qimmitidiki 659 xil tawargha %25 qoshumche tamozhna béji qoyushni qarar qildi.

amérika pirézidénti donald tramp 18-iyunda bayanat bérip, nawada xitay hökümiti amérikining qoshumche tamozhna béji belgimisige qarshi heriketke ötken teqdirde, 200 milyard dollar qimmitidiki xitay tawarlirigha qoshumche tamozhna béji qoyulidighanliqini bildürdi.

amérika soda ministirliqining sanliq melumatlirigha asaslanghanda, bultur xitaydin import qilinghan barliq tawarning qimmiti 505 milyard 500 milyon dollargha yetken bolsa, bu yil ichide xitaydin import qilinghan tawarlarning omumiy sommisi 250 milyard dollar bolghan.